o_O بدتمیز

بس صاحب جب ہماری حرکات قابل گردن زنی ہوئیں اور ہماری پرواز ان حدود سے تجاوز کرنے لگیں جن کو ہمارے ابا جان نے متعین فرمایا تھا تو ہمارا چرچا ہر جگہ ہونے لگا۔ جسطرح کوئی نوجوان ہاتھ سے نکلا جا رہا ہو تو اس کی شادی کر دینے کی صلاح ملتی ہے اسی طرح ہماری حرکات کے بعد کل زمانہ ہمیں اسکول داخل کرانے کے مشوروں کے ساتھ ساتھ اسکولوں کا پتہ بھی بتانے لگا۔ کچھ قصور اس میں ہمارا بھی تھا کہ امی نے جو قاعدہ پڑھنے بٹھایا اس کو پڑھتے پڑھتے ہم وقتی طور پر انتقال فرما جاتے اور پھر کھانے کے وقت ہی اٹھائے جاتے۔

لہذا امی نے دیکھ بھال کر جن ہمسائی کے بچے اخلاق میں سب سے اچھے تھے ان کے اسکول کا چناؤ کیا جو کہ ایک سرکاری اسکول تھا جس کی اضافی خوبی اس میں پہلی کلاس سے ہی انگلش کا پڑھانا تھا جبکہ اس زمانے میں انگلش 6 جماعت سے پڑھائی جاتی تھی۔

بس جناب ایک دن ہمیں پکڑ کر ہماری پیشی ایک استانی کے حضور ہوئی جنہوں نے گھر میں کمائی میرا مطلب ہے ٹیوشن سینٹر کھول رکھا تھا۔ انہوں نے پہلے تو کہا کہ بچہ کچی پکی نہیں پڑھ کر آیا؟ پھر پاس بیٹھے ایک بچے کی رف کاپی پر میرا ٹیسٹ لیا اور کہا لے آیئے گا آرام سے داخلہ مل جائے گا۔ اب مجھے تو نہیں علم تھا کہ کیا بلا سر پڑنے والی ہے پر میری امی بڑی خوش تھیں۔

ٹیسٹ والے دن ہم وہاں پہنچے تو دیکھا کہ امیوں کا ایک اژدہام ہے جو اپنے بچے بالکل ویسے پہلا پھسلا کر لائی تھیں جیسے قصائی بکرے کو لے جاتا ہے کیونکہ جیسے ہی استانیوں نے بچوں کو ان کی اماؤں سے علیحدہ کیا تو جو جو سر بجے وہ مجھے ابھی تک یاد ہیں۔ ایک بچہ میری کلاس میں تو اس قدر عمدہ تھا کہ اس کی امی کو کمرہ امتحان کے دروازے پر سارا وقت کھڑا ہونا پڑا

میں خود چونکہ اتنی کڑیاں دیکھ کر پھولے نہیں سماں رہا تھا (نہیں نہیں غلط مطلب لینے کی ضرورت نہیں میرے خاندان اور میرے محلے میں اس وقت دور دور تک منڈے پیدا نہیں ہوئے تھے لہذا میری دوستی لڑکیوں سے ہی تھی) لہذا میری امی مجھے چھوڑ کر واپس گھر دوپہر کا کھانا لینے چلی گئی تھیں۔

واپس آ کر میری امی کے مطابق وہ تو سارا رستہ پریشان تھیں کہ ان کا لال کہیں یہاں سر نہ بجا رہا ہو پر ہم سارا وقت اسکول کے میدان میں مٹر گشت فرماتے رہے۔ کھانے کے بعد دوبارہ ایک سیشن انٹرویو کا تھا جس میں ہیتھرو ایرپورٹ کی طرح مابدولت کو پورے اسکول کے اندر سے گھمایا گیا جہاں ہم برٹش دور کی اس عمارت کے نقش و نگار دیکھ دیکھ کر متاثر ہوتے رہے۔ سب سے افسوس کن بات یہ تھی کہ ہم اول آ کر اسکول میں داخلےکے حقدار پائے گئے نتیجہ ہماری آزادیاں اگلے چودہ پندرہ سالوں تک ضبط ہو گئیں۔

Popularity: 1% [?]