o_O بدتمیز

خوش نصیبی صرف ایک دفعہ آپکا دروازہ کھٹکٹاتی ہے۔ اگر جواب دے دیں تو بہت اچھے نہیں تو آپ کی قسمت۔ میں ایسے صاحب کو جانتا ہوں جنکا انگلینڈ کا ویزہ لگا یہ گئے اور تین ماہ بعد واپس آ گئے۔ پھر 20 سال ویزہ لگنے کی کوشش ہی کرتے رہے۔ اسی طرح ایک اور صاحب گئے اور ایک ماہ بعد واپس آ گئے۔ ابھی تک دوبارہ ویزہ لگوانے کی کوشش کر رہے ہیں۔ میرا دوست خود کویت نہیں گیا اور مجھے کہتا تھا کہ "تم کتے نہلانے جا رہے ہو" آج یہ بھی رل رہا ہے۔ خود ہم اگر وقت پر نہ آ جاتے تو ہمارے ہاں بڑی تباہی آنی تھی۔

جب میں پاکستان کے کسی باسی سے سنتا ہوں کہ مہنگائی بڑی ہے خرچے بڑے ہیں تو میرا سوال ہوتا ہے کہ تم اس کو کم کرنے کے لئے کیا کر رہے ہو؟ جواب ندارد۔ ہم لوگ اصل کام کرنے کے بجائے اس کی تیاری میں وقت لگا دیتے ہیں اور ہم لوگ چاہتے ہیں کہ کام نہ کرنا پڑے اور سب کچھ مل بھی جائے (میں خود اس کام کا سب سے بڑا ماہر ہوں۔) پلاننگ اور ورک دو الگ الگ چیزیں ہیں۔ ہم پلاننگ کرتے ہیں کام نہیں کرتے۔ میں نے 19 سال کی عمر میں پہلی نوکری کی۔ میں نے ساتھ لوگوں کو کہا کہ تم اپنا شروع کرو بجائے یہ کہ تم کسی کے لئے کام کرو۔ لیکن ہم لوگ لگی بندھی تنخواہ میں زیادہ بہتر محسوس کرتے ہیں۔ لگی بندھی تنخواہ ان کو چاہئے جن کی فیملی ہو سنگل بندے کو تو ہاتھ پاؤں مارنے چاہئے۔

میں نے گوگل ایڈسینس سے 2003 کے دسمبر میں کھیلنا شروع کیا۔ 2005 میں میں نے 6 دوستوں کو سمجھایا۔ 2 نے بات مان لی ایک پیسے جمع کر کے کویت چلا گیا اور ایک آسٹریلیا۔ باقی 4 لاہور میں بیچلرز کر کے بھی چھوٹی موٹی نوکری کر رہے ہیں۔ ان میں سے ایک باتونی بہت تھا اور مجھے ذرا ناپسند تھا۔ اس نے جل کر سائیٹ پر کلکس کرنے شروع کر دئے اور گوگل کو خود ہی اطلاع دے۔ اب ان کا اکاؤنٹ بند ہو گیا نتیجتا کویت والے کو گھر سے پیسے منگوانے پڑتے ہیں۔ اور آسٹریلیا والا جاتے وقت اس کے پیسے اپنے بیوہ خالہ اور اس کی تین جوان بچیوں کے نام کر گیا تھا ان کا بھی کام خراب۔ گھٹیاپن کی انتہا یہ ہے کہ ڈھیٹ کہتا ہے کہ مجھے کیا پتہ تھا یہ ان کے ہیں پتہ ہوتا تو نہ کرتا۔ یعنی اس کو سمجھ ہی نہیں لگتی کہ تم نے جو حرکت کی وہ ہے ہی سرے سے غلط۔

دوزخ پر ہر گڑھے پر ایک ایک فرشتہ متعین تھا۔کہ جو بندہ باہر نکلے اس کو واپس مار کر اندر ڈال دیں۔ پاکستان والے گڑھے پر کوئی بندہ نہیں تھا۔ پوچھا گیا یہاں کسی فرشتہ کو متعین کیوں نہیں کیا گیا؟ جواب ملا کہ پاکستانی خود ہی ایکدوسرے کی ٹانگ کھینچ لیتے ہیں فرشتہ معمور کرنے کی ضرورت ہی نہیں۔ تو ہم لوگ اسی قسم کے ہیں ایک ترقی کر رہا ہوں تو دیکھا ہی نہیں جاتا اور راستہ روکنے کی کوشش کی جاتی ہے۔ میرا نظریہ اس کے برعکس ہے۔ اگر میں بہت امیر ہوں تو گرنے کی صورت میں مجھے سہارا دینے والوں کو بھی میرے نزدیک نزدیک ہونا چاہئے کہ میرا پستی کا سفر طویل نہ ہو۔ اگر میں ان سب کو غریب ہی رکھونگا تو جہاں وہ صبر شکر سے رہ رہے ہیں وہاں میرا گزارہ مشکل ہوگا۔

میں نے کچھ ماہ پہلے یہ لکھا تھا۔ اس کا ریسپانس بہت ہی poor تھا مجھے حیرانی تو ہوئی لیکن ہر کوئی اپنے فائنانشل حالات خود بہتر سمجھتا ہے۔ تو میں نے اس کو دوسرے طریقے سے اپروچ کرنے کا سوچا کہ ہر سال 1000$ کا no question asked فنڈ ہو۔ کسی قسم کی “انکوائری” یا سوال جواب سے مبرا۔ وجہ اس کی صرف یہ تھی کہ کچھ نے انکوائری کرنے کی بات کی لیکن اجمل انکل نے بغیر کوئی سوال پوچھے رقم فراہم کر دی۔ میں نے ان سے انسپائریشن لی۔ اس سال تو ہو گیا لیکن آئندہ کے لئے؟ میں اس چینی کہاوت پر یقین رکھتا ہوں کہ بھوکے کو مچھلی کھلانے کے بجائے مچھلی پکڑنا سیکھا دی جائے۔ اب بھوکا کیسے ملا؟

مجھ سے کسی نے اجازت مانگی اور مجھے اجازت دینی پڑی۔ اس کے کام کا نتیجہ بہت شاندار نکلا۔ میں نے ایک اور کو پکڑا اور ان کو بھی کام پر لگا دیا۔ نتیجہ بہت ہی شاندار تھا۔ کام کیا تھا؟ صرف لکھنا۔ یہ لوگ لکھتے اور ایڈسینس سے پیسے بناتے۔ پیسے ڈائریکٹ ان کو ویسٹرن یونین سے مل جاتے اللہ اللہ خیر صلہ۔ پھر میں نے سوچا کہ صرف ضرورتمند کو کیوں شامل کیا جائے؟ جو بھی ایکسٹرا پیسے بنانا چاہتا ہے ان کو بھی دعوت دی جائے کونسا میرے پلے سے جاتے ہیں۔ اپنا لکھو اپنا ایڈ سینس لگاؤ اور پیسے بناؤ۔ یہاں مجھے صحیح اندازہ ہوا کہ کیا قوم ہیں ہم۔

اگر آپ دس بندوں کو کہیں تو مشکل سے ایک آمادہ ہو گا۔ باقی 9 میں سے آدھے ٹانگ کھینچنے کے درپے ہونگے اور آدھے بغیر ہاتھ پاؤں ہلائے اس سے پیسے بنانے کے خواب میں ہونگے۔ سب سے بری مثال ہے میں نے ایک دوست کو دسمبر 2003 سے سمجھانا شروع کیا اس کو کبھی سمجھ نہیں لگی کہ لکھنے پر لوگ کیوں آئیں گے اور اس کے ایڈز کو کیوں دیکھیں گیں۔ اب جب اس کو سمجھ لگی تو ڈی ایس ایل نہیں۔ اب وہ اگست سے ڈی ایس ایل لگوا رہا ہے جو کب لگے گا یہ مجھے نہیں علم اور اس کا شکوہ مجھ سے ہے کہ میں اس کی مدد نہیں کر رہا۔

وہ تمام لوگ جن کو میں نے کانٹیکٹ کیا۔ (میرا نام لینے کا موڈ نہیں) قسمت بار بار دستک نہیں دیتی۔ اگر بہت ویلے ہیں تو 6 ماہ میں اور بہت مصروف ہیں تو ایک سال میں ہر ماہ 25 ہزار سے اوپر کمانا چاہتے ہوں تو صرف دو کام کریں۔

لکھیں پر خود لکھیں۔ (یس انگلش میں ہی لکھنا ہے)

اور مسلسل لکھیں کوئی ناغہ نہیں۔ بریک نہیں لینی کہ ایک دن لکھ کر ہفتہ چھٹی۔

اور میں آپ کو گارنٹی دیتا ہوں کہ آپ اتنا آرام سے ہر ماہ کما لیں گے۔ یاد رہے کہ یہ میں آپکو Least amount کی گارنٹی دے رہا ہوں۔ اس وقت تین اس سے زیادہ کما رہے ہیں اور تین مزید نے ابھی ابھی شروع کیا ہے۔ لیکن کیا اتنا کافی ہو گا؟ نہیں میں نے ایک صاحب کو رج کے گائیڈ کیا۔ سارا طریقہ سمجھایا ان کو وقفہ وقفہ سے بتایا کہ کون کتنے پیسے بنا رہا ہے نتیجہ؟ ایک دفعہ وقتی جوش چڑھا اور تب سے اب تک ٹھنڈے کے ٹھنڈے۔ پاکستانی لوگ نہیں جانتے کے ان کے پاس ایڈ سینس کی صورت میں کتنا زبردست سورس ہے لیکن اس کا ایک چھوٹا سا نقصان ہے۔ اول ایڈسینس پاکستان سے ہونے والی بےایمانیوں کے بعد اب ایک گھر ایک اکاؤنٹ کی پالیسی پر ہے۔ دوسرے اگر کوئی حسد کر کے آپ کے درپے ہو گیا تو پھر دوبارہ آپ اکاؤنٹ بنا نہیں سکتے لہذا کوشش کریں کہ بجائے ادھر ادھر بولنے کے صرف لکھیں آپکا دوست گوگل آپ کو وزیٹرز بھیج دے گا۔