o_O بدتمیز

میرا ایک دوست تھا وہ اکثر بتایا کرتا تھا کہ وہ الیکٹرونکس باہر سے منگواتے ہیں۔ اور مثال پیش کی جاتی تھی کہ دس سال پہلے جو استری باہر سے منگوائی تھی وہ ابھی تک کام کرتی ہے جبکہ جو یہاں سے لی تھی وہ نہیں کرتی۔ میں اس کو بہت سمجھایا کہ یہاں بھی صحیح ملتی ہیں پر مانے نہ۔ مجھے اس کی یہ منطق کبھی سمجھ نہیں آئی کہ باہر جانے والے اس کو محب وطن نہیں لگتے تھے کہ اس کا ماٹو تھا کہ پاکستان میں رہ کر کچھ بننا ہے تو پھر پاکستان سے چیزیں کیوں نہیں لے سکتا؟ وہ میرے ایسے سوالات کے جواب میں مجھے احمق ہی سمجھتا تھا۔

خیر میرے کزن نے ps3 کی فرمائش کی۔ اب نامعلوم کزن ہی تھا کہ ان کے ابا جان کزن بن کر بات کر رہے تھے۔ میں نے کہا یہاں بھی چائنا سے ہی آتا ہے آپ وہیں سے لے لیں۔ ضرور ہمسائے سے پہلے سات سمندر کا چکر لگوا کر چیز لینی ہے۔ پر صاحب مانیں نہ۔ باقی لوگ بھی یہاں کی چیزوں کو سمجھتے ہیں کہ بالکل ٹھیک ہیں اور کوالٹی درست ہے۔

اب چائنا کا دور ہے کوالٹی سے زیادہ قیمت دیکھی جاتی ہے۔ امریکہ امریکیوں کا تو رہا ہی نہیں۔ وہ جو مشہور لطیفہ ہے محب وطن ہونے کا جس میں لکھنے والے کے پاس سب چیزیں باہر کی ہوتی ہیں اسی طرز پر امریکہ میں اب کچھ بھی نہیں بنتا۔ پہلے کپڑا پاکستان کا ہوتا تھا پر وہ بھی کچھ تو پاکستانیوں کی ہیرا پھیری اور کچھ بجلی نے ختم کر دیا۔ آجکل بنگلہ دیش کا راج ہے۔ کچھ بھارت کا بھی نظر آ جاتا ہے لیکن باقی سب چائنا ہے۔ کبھی جوتے اٹالین ہوا کرتے تھے آجکل چائنا ہیں۔

الیکٹرونکس سب کی سب چائنا ہیں۔ ڈیل سے لے کر ایپل تک سب کی پراڈکٹس چائنا سے اب شپ ہوتی ہیں۔ یعنی یہاں صرف اتنا مال منگوایا جاتا ہے جتنا آگے دیا جا سکے۔ وئیر ہاؤس میں رکھ کر اس پر خرچہ نہیں کرنا۔ ایپل کے جو ابھی نئے آئی پوڈ آئے تھے یہ امریکہ میں بیٹھ کر آرڈر کرنے پر ڈائریکٹ چائنا سے شپ ہوئے۔ اسی طرح کمپیوٹرز بھی اگر آپ کنفیگر کروائیں تو وہ چائنا میں اسمبل ہو کر وہاں سے شپ ہوتا ہے۔

اس کا ایک اور بہت دلچسپ پہلو ہے۔ افریقن امریکن سافٹ وئیرز، موویز، ویڈیو گیمز سے لے کر کونسولز اور کمپیوٹر اونے پونے داموں بیچا کرتے تھے۔ یہ فیکٹریوں سے چرا لاتے تھے۔ اب فیکٹریاں بند ہوگئیں۔ کیا کبھی ایسا ہوا کہ چین کی خبر ہو کہ وہاں سے ہارڈ وئیر چوری ہوا یا ونڈوز کی کاپیاں یا لائسنس کی چرائی گئیں؟ یعنی انہوں نے ایسا اعتماد قائم کیا کہ سرمایہ داروں کا پیسہ ان کے ہاں محفوظ ہے۔ کیا ایسا ہمارے ہاں ہو سکتا ہے؟ ہمارے ہاں تو لوٹ مار مچ جانی ہے۔ ونڈوز کی کی تو سب سے زیادہ عام ہونی ہے وہی انسٹال کیا اور وہی نوٹ کر کے بانٹ دیا۔ جب میں کہتا ہوں کہ عوام ہی سے خواص نکلتے ہیں تو لوگ اس کو نہیں سمجھتے۔ یہ چھوٹی چھوٹی باتیں سمجھیں پھر اس کی سمجھ لگے گی۔

چائنا کی چیزیں بلاشبہ کوالٹی میں کم تر ہیں۔ اسمبلنگ ناقص ہے لیکن صرف قیمت کم ہونے کے باعث مارکیٹ ان کی ہے۔ جیسے canned food کو کھولنے کے لئے اوپنر اگر چائنا کا لیں تو وہ ایک ڈالر کا ہے 50 فیصد چانس کہ ایک دفعہ بھی کام نہ کرے اور 100 فیصد چانس کے 6 ماہ کے اندر نیا لینا پڑے گا۔ پر یہاں لوکل بنا ہوا 6 ڈالر کا ہے جو کہ توڑیں تو ہی نیا لانا پڑتا ہے۔ تو یہ بہت بڑا فرق ہے۔ الیکٹرونکس میں تو بہت برا حال ہے۔ اسمبلنگ بھی ناقص ہے۔

لاکھوں کروڑوں اشیا وہاں سے بن کر آ رہی ہیں۔ پچھلے سال لیڈ کا سکینڈل تھا کہ جو کھلونے کرسمس پر شائد بھیجے گئے تھے اس پر کئے گئے رنگوں میں سیسہ کی مقدار خطرناک تھی۔ اسی کو دیکھ کر کسی نے اخبار میں ڈاکٹر کو خط لکھا کہ اس نے اپنی ماں کے لئے جو ڈنر سیٹ لیا ہے وہ سیف ہو گا کہ نہیں۔ اب ڈاکٹر صاحب لیکچر دے رہے ہیں کہ چائنا اپنا معیار بہتر کریں ہم امریکی ہیں ہم بائیکاٹ کرتے ہیں پر وہ یہ نہیں بتاتے کہ 1300 ڈالر کی چیز اگر چائنا میں بنے تو 400 ڈالر آف ہو جاتا ہے یعنی وہی چیز 900 ڈالر کی پڑی۔ اب کون کافر اس کو چھوڑے گا؟ اب اس کو تمام امریکیوں سے ضرب دیں کہ امریکیوں نے کل کتنی رقم بچا لی؟

امریکہ میں میڈیا یہ تو بتاتا ہے کہ فلاں نے یہ کیا اور فلاں نے وہ کیا پر یہ نہیں بتاتا کہ اس میں ہمارا کیا قصور ہے۔ چائنا نہ ہوتا تو امریکہ میں وہی طوفان مچنا تھا جس سے پاکستان والے آجکل لطف اندوز ہو رہے ہیں۔