o_O بدتمیز

اگر آپ پاکستان سے امریکہ تشریف لا رہے ہیں یا آپ خاتون ہیں اور پاکستان شادی کرنے جا رہی ہیں تو اپنے متوقعہ شوہر کو کہیں کہ وہ دو کام کیجئیے اول تو الیکٹریشن کا چھوٹا موٹا کام سیکھ لیں۔ کم از کم آپ کو سوئچ بدلنے تو ضرور آنے چاہئے۔ دوسرے کچھ یوں کریں کہ روزانہ مرغ کھانا شروع کر دیں جان بھی بنتی ہے اور روزانہ مرغ کٹوا کٹوا کر اس کو دیکھ کر بندہ ٹریننگ بھی حاصل کر لیتا ہے کہ مرغ کی ہڈی پسلی ایک کیسے کی جاتی ہے۔ میں سچ مچ سنجیدہ ہوں اور کوشش کر کے دیکھ لیں کہ مرغ کے کون کون سے جوڑ سے کاٹا جاتا ہے۔ خود میرا ارادہ ہے کہ جب بھی جاؤ کسی مرغی والے کی شاگردی اختیار کروں۔

امریکہ میں دالیں حلال گوشت اور مصالحے اب تک صرف دیسی سٹور تک ملتی تھیں۔ دو سال قبل شائد میری برکت سے (خوش فہمی) Kroger نے ایشین فوڈ کا پورا aisle بنا دیا۔ ukrops پر نام کا انٹرنیشنل سیکشن ہے جہاں سپینیش فوڈ کو انٹرنیشل کہہ کر ٹھونسا گیا ہے۔ میرے خیال سے ہمارے ملک سے آنے والی چیزوں کی پیکنگ نہایت واہیات ہے۔ اگر کسی چیز کی پیکنگ اچھی ہے تو آنکھ بند کر کے شرط لگا لیں کہ کینیڈا سے آئی ہے۔ بھارت سے آنے والی چیزوں کی پیکنگ تو پاکستان سے بھی گئی گزری ہے۔

والمارٹ پر جو ایشین فوڈ کی جھنڈی لگائی ہے وہ اونٹ کے منہ میں زیرہ ہے۔ وجہ معیار ہی ہو سکتا ہے۔ تقویت اس بات سے بھی ملتی ہے کہ اس 5 ضرب 6 فٹ کے حصہ میں جو جو کچھ ہے وہ سب کا سب امریکی برانڈز میں سے ہے۔ مثال کے طور پر سویا ساس great value کمپنی کا ہے۔ کوئی بھی دیسی برانڈ نہیں ہے۔ ہاں چاولوں میں انڈیا کے ہیں لیکن وہ ہم سے زیادہ سپینش کے من پسند والے ہیں۔

امریکہ میں مسلمانوں کی تعداد کے بارے میں شکوک و شبہات ہیں۔ مسلمان خود کو آٹھ نو ملین تک بتاتے ہیں جبکہ مذاہب کی ریسرچ اس کو دو سے تین ملین تک بتاتے ہیں جس کو مسلمان یہودیوں کا پراپیگینڈہ کہتے ہیں کہ وہ نہیں چاہتے کہ مسلمان اپنی تعداد کا اثر و رسوخ استعمال کر سکیں۔ ابھی والمارٹ نے اپنے سٹورز میں حلال مرغ کا اضافہ کیا ہے۔ اس سے ایک بات تو ثابت ہوتی ہے کہ مسلمان اس قدر بڑی مارکیٹ بن چکے ہیں کہ والمارٹ جیسے بڑے ادارے ان کو ٹارگٹ کریں جبکہ ان تمام سٹورز نے پچھلے سال رمضان میں کھجوروں کے اسٹال لگائے تھے جو کہ ایک خوشگوار واقعہ تھا۔

بدقسمتی یہاں آتی ہے کہ یہ حلال مرغ پورا ثابت پیس ہے۔ کھال اتاری گئی ہے لیکن چربی نہیں۔ کلیجی پوٹا وغیرہ ایک پلاسٹک کے لفافے میں بند کر کے اس کے اندر رکھا گیا ہے اور باہر سے ایک پیکنگ۔ اگر مرغ سے دو دو ہاتھ کرنے کا نہیں بھی موڈ تو ابھی بن جاتا ہے۔ امریکی مرغ، حلال مرغ سے بڑا ہے اور قیمت میں بھی کم۔ امریکی مرغ 82 سینٹ فی پاؤنڈ ہے جبکہ حلال مرغ 1.44 ڈالر فی پاؤنڈ ہے۔ دیسی اسٹور سے آپکو جو مرغ کا پیکٹ ملتا ہے وہ 6 ڈالر کا ملتا ہے اور پورا مرغ بھی نہیں ہوتا ہاں چربی وغیرہ اتاری ہوتی ہے۔ والمارٹ سے پورا حلال مرغ 5 ڈالر تک مل جاتا ہے۔ اگر آپ نے صرف بون لیس بوٹیاں لینی ہوں تو وہ ساڑھے چار ڈالر کی 6 بوٹیاں پیکنگ میں ملتی ہیں۔ لہذا ذرا مرغ والے سے مل آئیے۔

مرغ کاٹنے کے لئے ایک چھوٹا سا ٹوکا اور بہت تیز دھار چھری لے لیں۔ عام چھری سے مرغ زیادہ ڈھیٹ ہے۔

میرے دو تین دوستوں نے پچھلی پوسٹ پڑھ کر کہا تھا کہ یہاں سبزیاں اور پھل کس طرح ملتے ہیں۔ میں نے اس کی تصاویر لے لیں۔ یہاں پیکنگ اور سہولت کے پیسے دیئے جاتے ہیں۔

سبزیاں ایسے پڑی ہوتی ہیں۔

  آلو کے کٹے ہوئے چپس۔ ان میں سادہ اور سیزنگ لگے ہوئے بھی ہوتے ہیں۔

پالک

مٹر

بھنڈی

مالٹے

سبز لیکن میٹھے انگور

انڈے

سبزیاں کھلی بھی ملتی ہیں لیکن فروزن ہی صحیح رہتی ہیں دو ہفتہ آرام سے نکل جاتے ہیں۔ اپنے علاقے میں flee مارکیٹ ڈھونڈیں۔ وہاں ارد گرد کے چھوٹے چھوٹے فارمر اور بیک یارڈ فارمر اپنے پھل اور سبزیاں بیچنے لاتے ہیں اور سبزیاں وغیرہ بہت سستی مل جاتی ہیں۔ جیسے والمارٹ پر تربوز سات ڈالر کا ہے لیکن flee مارکیٹ میں تین ڈالر کا ہوتا ہے۔ لہذا آدھی سے بھی کم قیمت پر چیزیں مل جاتی ہیں لیکن پھر پکانی بھی پڑتی ہیں فریز نہیں ہوتی۔

Popularity: 9% [?]