o_O بدتمیز

کہا جاتا ہے کہ لڑکی دیکھنی ہو تو اس کے گھر کا کچن اور باتھ روم دیکھ لو۔ مرد کا “نصف ایمان” دیکھنا ہو تو اس کی ایڑی دیکھ لو۔ اگر Neighborhood میں پھرتے پھراتے سمجھ نہ لگ رہی ہو کہ کونسا گھر کسی دیسی کا ہو گا تو اس کا فرنٹ یارڈ دیکھ لو جہاں گھاس بڑھی ہوئی ہو بس وہی کسی دیسی کا گھر ہو گا۔ خود میرا یہ حال ہے کہ میرا پڑوسی جب تیسری دفعہ گھاس کٹوا رہا ہوتا ہے تب میں دوسری دفعہ کاٹتا ہوں۔ یعنی ایک ڈیڑھ کا ریشو ہے۔ اب گھاس تو بڑھی ہوئی ہے لیکن مزید تسلی کرنی ہو تو دیکھ لیں جس کے گھر کا wear & tear کا ذرا سا بھی مسئلہ نظر آ رہا ہو آنکھیں بند کر کے بیل بجا دیں یہ آپ کے دیس کا ہی بندہ ہے۔ اگر رات کا وقت ہو تو سارے neighborhood کے باہر چھوٹے سے پول اور دروازے کی روشنی روشن ہو گی جس کی یہ دونوں آف ہوں سمجھ لیجئے کہ کون ہو گا۔

میرے سارے ہمسائے ہم سے بہت خوش ہیں۔ پیچھے درخت ہیں جو کہ تکون کی شکل میں پھیلتے جاتے ہیں اور تھوڑا آگے کمرشل پراپرٹی ہے لہذا ادھر کا مسئلہ ہی نہیں ایک طرف ڈاکٹر صاحب ہیں جن کی نرسوں سے ہر ماہ میں آنکھ مچولی کھیل آتا ہوں۔ ہوتا صرف اتنا ہے جب میں ان کو دیکھتا ہوں وہ مجھے نہیں دیکھتیں اور جب تک وہ مجھے دیکھتی ہیں میں کہیں اور دیکھ رہا ہوتا ہوں۔ خیر دوسری طرف جو انکل ہیں ان کا دروازہ ذرا ہٹ کر ہے لہذا ان کو بھی میرے کرتوت نظر نہیں آتے۔ سامنے والا گھر ویلا ہے اور دوسرا درختوں میں چھپا ہوا۔

عام طور پر دیسی لوگ sub-urban جگہوں پر گھر لیتے ہیں لیکن مصروفیت اور پھر سستی کی وجہ سے کافی شدید غلطیاں کرتے ہیں۔ جیسے میں گھاس کی طرف سے بہت سستی کرتا ہوں۔ گرمیوں میں جب وقت ملتا ہے اس دن شدید حبس ہوتا ہے اور جب موسم اچھا ہوتا ہے تو کام ہوتا ہے۔ ایک اور غلطی پڑوسیوں پر نظر پڑنے پر فورا منہ پھیر لینا۔ یہ کافی غلط عادت ہے گوروں کو ہیلو ہائے کی بہت عادت ہوتی ہے چاہے جانتے بھی نہ ہوں یہ ضرور ہیلو کہتے ہیں۔ جیسے ایک دن گرمیوں میں باہر بہت موسم اچھا تھا میں باہر کھڑا تھا جتنے گورے گوریاں ہمارے فرنٹ یارڈ سے پیدل گزرے سب نے ہیلو کہا۔ میرے ماموں نئی جگہ شفٹ ہوئے تو وہاں کچھ دیسی پہلے سے تھے۔ ان کے بالکل ساتھ والا گورا بات کر رہا تھا کہتا سب لوگ بہت اچھے ہیں صرف فلاں انڈین۔ وجہ کہ وہ کبھی ہیلو ہائے نہیں کرتے۔

اسی طرح بزنس کی جگہوں یعنی دفاتر شاپنگ سینٹر لائبریری دکان سٹور غرض کسی بھی پبلک جگہ پر بھی یہ ایک دوسرے کو مسکرا کر ملتے ہیں یعنی ہیلو نہ بھی کہیں مسکرانا لازمی ہوتا ہے۔ یہ ان کے اخلاق کا حصہ ہے۔ ایسے ہی ان تمام جگہوں پر اگر آپ کے پیچھے کوئی آ رہا ہے تو اس کے لئے دروازہ کھولے رکھنا لازمی ہے۔ ایسا بہت ہی کم ہو گا کہ کوئی ایسا نہ کرے

ایسے ہی میں کسی جگہ تھا میں نے مذاق میں کہا یہ سامنے والا گھر کسی دیسی کا لگتا ہے۔ میزبان پہلے تو حیران ہوا پھر کہتا تم کو کیسے پتہ میں نے کہ لان کی گھاس کیاریوں میں پھیلی ہوئی ہے۔ میل باکس بالکل سیدھا نہیں ایک طرف کو جھکا ہوا ہے اور سامنے کی ایک شیٹ اکھڑی ہوئی ہے۔ اس نے بتایا ہاں دیسی ہی ہے۔

اکثر دیسیوں کو عادت ہوتی ہے کسی کو ملنے جاتے ہیں تو باہر لان میں ہی اونچی آواز میں بات کرنے لگتے ہیں۔ بچے جن کو گھر میں چڑیا گھر کی طرز پر رکھا ہوتا ہے یہاں آتے ہیں آزادی پاتے ہی ادھر ادھر بھاگتے ہیں خاتون تو اتنی پروا نہیں کرتیں مگر صاحب اردو سے پنجابی کا سفر اتنی جلدی طے کرتے ہیں جتنی جلدی مرسیڈیز صفر سے 100 تک جاتی ہے۔ اب پورے محلے میں مہمان کی پنجابی گونج رہی ہوتی ہے۔ ظاہری سی بات ہے اس میں آپ کچھ نہیں کر سکتے مہمان چلے جائیں گیں آپ رہ جائیں گیں یہیں۔

اس لئے خدا سے ہر دم دعا کریں کہ آپ کو یہاں پڑوسی اتنی دور عطا کئے جائیں کہ وہ آپ اور آپ کے مہمانوں کے شر سے بچ سکیں۔

Popularity: 14% [?]