o_O بدتمیز

تقریبا دو سال بعد آج ورجینیا میں برفباری ہوئی ہے۔ پچھلے سال برفباری صرف ایک دن ہوئی تھی وہ بھی صرف دو گھنٹوں کی۔ ابھی زمین پوری بھی نہیں چھپی تھی کہ ختم ہو گئی۔ اس سے پچھلے سال قابل ذکر برفباری ہوئی تھی۔ قابل ذکر کا مطلب میں یہ لیتا ہوں کہ سکول سنو ڈے کی چھٹی دے دے۔ ابھی پرسوں بھی برف باری ہوئی تھی لیکن میں اس وقت سویا ہوا تھا جب تک سو کر اٹھا بارش سب کچھ برابر کر چکی تھی۔

آج تو ہم سب نے باہر خوب انجوائے کیا۔ برف تو اتنی نہیں پڑی کہ سنو مین بناتے لیکن گولے ضرور ایک دوسرے پر اچھالے۔ دستانے نہیں پہنے تھے خودی سوچ لیں کیا حال ہوا ہو گا۔ سارا دن ہم لوگ یہی کرتے رہے دوپہر بارہ سے شام 6 بجے اندھیرا ہونے تک ہم لوگ اندر باہر کے چکر لگاتے رہے۔ کبھی فرنٹ یارڈ تو کبھی بیک یارڈ میں ایک دوسرے پر گولے پھینکیں تو کبھی گلہریوں کا پیچھا کریں۔ بس صرف سنو مین کی کمی تھی باقی ہم نے سبھی الٹی حرکتیں کیں۔

اس برفباری کی اطلاع دو دن پہلے سے تھی۔ پیٹرز برگ کے غریب کالوں کے لئے سٹی کی طرف سے ہیٹ سینٹر کو کھول دیا گیا تھا۔ اس عمارت میں سنیکس، گرم مشروبات اور ایکٹویٹیز کا اہتمام کیا جاتا ہے کہ ایسے غریب لوگ جو اس برفباری کے دوران اپنے آپ کو گرم نہ رکھ سکیں وہ یہاں آ کر اتنی دیر قیام کریں۔ یہ سب مفت مہا کیا گیا تھا۔ یہ کافروں کا حال ہے۔ سنا ہے ہمارے صدر مشرف قوم کو گندم بحران میں چھوڑ کر یورپ کی سیر پر نکلے ہیں۔ افسوس صد افسوس۔

میں ویڈیوز اپلوڈ کر رہا ہوں جیسے ہی پوری ہو جائینگی کسی دن پوسٹ کر دونگا۔ برفباری ابھی تک جاری ہے اور رات کے دو بج چکے ہیں۔ صبح چار پانج بجے آسمان صاف ہو جانا ہے اور کل تو روشن چمکدار دن کی پیشگوئی ہے۔

Popularity: 13% [?]