بدتمیز

میری بزرگوں سے نہیں بنتی۔ اپنے بزرگ تو مجھ سے تنگ ہیں ہی مجھے دوسروں کے بزرگ بھی عقل سے پیدل ہی لگتے ہیں۔ اب بزرگوں کی ڈیفینیشن میرے نزدیک مجھ سے پانچ منٹ بڑا بھی میرا بزرگ ہی ہے۔ کسی بھی بندے کے بزرگ ہونے کی دو نشانیاں ہوتی ہیں۔ اول یہ ہر کام میں درست ہوتے ہیں دوئم نئے زمانے کے ساتھ چلنے سے انکاری ہوتے ہیں۔

ہمارے بزرگوں کو ایک بات سمجھ نہیں لگتی۔ کاٹ یعنی چھکڑا تیار کرنا اور بات ہوتی ہے اور اس چھکڑے کو کھینچنا اور بات ہوتی ہے۔ ہم نسل در نسل چھکڑے تیار کر کر کے اس کو کھینچنے کے لئے بیٹے نام کا بیل استعمال کرتے ہیں۔ مسئلہ یہ ہے کہ جس بیٹے نے اپنا چھکڑا کھینچنا ہوتا ہے وہ اپنے ابا کا چھکڑا کھینچ کر اس قدر لاغر ہو چکا ہوتا ہے کہ مجبورا اس کو اپنا چھکڑا بیٹے سے کھینچوانا پڑتا ہے اور یہ ایک چین چلتی جا رہی ہے۔

مجھے اس پر ذرا اعتراض نہیں ہوتا اگر مجھے پاکستان سے دو تین لوگوں کے اکٹھے حالات نہ پتہ لگے ہوتے۔ یہ تینوں میرے دوست ہیں۔ مجھ سے اکثر لوگ فون نمبر مانگ لیتے ہیں لیکن فون نہیں کرتے۔ آج ایک نے کیا تو سب کے حالات پتہ چلے۔

پہلے کو ہم فراز فرض کرتے ہیں۔ یہ بہت لائق تھا۔ قد میں چھوٹا رہ گیا تھا اور چھوٹے قد کا مرد ہمیشہ احساس کمتری میں مبتلا رہتا ہے۔ یہ اس وقت تقریبا عضو معطل ہو کر پڑا ہوا ہے۔ میں اس کی بہت عزت افزائی کرتا تھا۔ حالات خراب ہوئے تھے انٹر سے میں نے اسکو بہت سمجھایا تھا کہ یار یا تم اکیڈمی جوائن کرو یا پھر کمپیوٹر سائنس رکھو نہیں تو تم فیل ہو جاؤ گے۔ میری نہیں سنی یا شائد گھر والوں نے نہیں سنی۔ یہ انٹر میں اسی مضمون میں سپلی لے کر بیٹھ گیا۔ میں نے سمجھایا لیکن اگلے سال اس نے پیپرز نہیں دئے۔ اسکو کویت جانے کی آفر ہوئی وہاں اس کے انکل کا بزنس تھا لیکن یہ میرے سامنے ناچے کہ میں جو بنوں گا پاکستان میں رہ کر بنوں گا ساری دنیا باہر کتے نہلاتی ہے اور یہاں صاحب بنتی ہے میں نے اس کو کہا تم یا تو پڑھائی شروع کرو یا جا کر کتے نہلاؤ لیکن کچھ کرو ضرور لیکن نہیں سنی۔ اس کے گھر میں پیپلز پارٹی کی حکومت تھی دو بڑی بہنیں اور امی جنہوں نے شائد طعنے دے دے کر اس کو آج اس حال تک پہنچایا ہے۔ میں نے آنے سے پہلے اس کو کہا تھا کہ آج جن دوستوں کی تم بات کرتے ہو کہ فلاں ماسٹرز ہے اور فلاح پوسٹ گریجویٹ یہ کل کو تم کو نہیں ملیں گیں اس نے میری بات کو بکواس جانا۔ اب یہ حضرت سارا دن گھر بیٹھتے ہیں کوئی کام نہیں کرتے اور گھر والے پریشان ہیں۔ گھر والے پہلے بچے کو پریشان کرتے ہیں پھر پریشان ہوتے ہیں۔ اب جب سنا کہ میں جا رہا ہوں تو کہے یار کاش میں بھی چلا جاتا۔

دوسرے دوست کے گھر کے حالات بھی بگڑے جب ابا جان وفات پا گئے۔ بھابھی نے پر پرزے نکالے۔ بھائی کو دوسرے شہر رہنا ہوتا تھا۔ وہ کہاں تک برداشت کرتا۔ کبھی کبھی پھٹ پڑتا کبھی بیگم پر تو کبھی ان پر۔ دوسرے نمبر کا بھائی بالکل نکما۔ اب بڑے کے بعد بچی کھچی ذمہ داری اس پر۔ اب حالات بہتر تو ہیں لیکن بہنوں کی شادی اور نئے گھر پر بھابھی کے مکمل کنٹرول کی کوشش سے نمٹتے نمٹتے اس کو بھی کام کرنا پڑتا ہے۔ اب اسکو باجی بھابھی بھائی امی سب کی باتیں سننا پڑتی ہیں جو کہ باجماعت سنائی جاتی ہیں۔

تیسرا دوست۔ اس کی کافی ذمہ داریاں تھیں۔ سب سے بڑا ہے۔ ابھی اپنے جھگڑے نہیں گھر میں بیٹھی پیپلز پارٹی یعنی پھپھو کی حکومت سہہ رہا ہے۔ میں نے اس کو بہت دفعہ سمجھایا ہے کہ بہت سی چیزیں مردوں کو خود کرنی پڑتی ہے اور عورت کو خاوند کے بعد بیٹے سے امید ہوتی ہے۔ تم اگر پھپھو کو نہیں روک سکتے تو تم پر لعنت ہے۔ اب ہوتا کچھ یوں ہے کہ میری شہہ سے اس نے کچھ تو کنٹرول کیا ہے لیکن زیادہ کرنے سے گھبرا جاتا ہے۔ چکن آؤٹ۔ پھر میرے پاس آ کر رونے۔ ماسٹرز کر لیا ہے لیکن جاب ابھی تک ملی نہیں۔ دماغ آسمان پر ہے کہ جاب ملے کوئی 15000 کی۔ میں نے کافی عزت افزائی کی۔

ہمارا معاشرہ بہت ظالم ہے۔ شادی کی تو یا تو پھنے خان عورت کو انسان نہیں سمجھتے یا پھر محنت مزدوری اتنی کہ گھر کے لئے وقت نہیں ملتا۔ وہ صابر شاکر بچہ کو سب کچھ سمجھ لتی ہے نتجتہ اولاد باپ سے دور ہوتی جاتی ہے۔ جب بیٹے کے سر ذمہ داری تو رہنا بھی اس کے سر پر اور طعنے بھی اس کو۔ اب ایسے میں بیٹا چھوڑ دے تو برا اور آپ اچھے کہ آپ کے منہ سے جو پھول جھڑتے ہیں وہ؟ بیٹے کی شادی کی تو اس میں دخل اندازی۔ سارے جہاں کی مثالیں اور جب بچہ کوئی مثال دے تو اس سے مجرمانہ انداز میں آنکھیں چرائی جاتی ہیں۔

میں یہ نہیں کہتا کہ گھر والوں کو چھوڑ دو گھر والوں کا فرض بنتا ہے کہ اگر کوئی ان کے لئے کچھ کر رہا ہے تو اس پر اس کے لئے پریشانیاں مت کھڑی کریں۔ بہرحال وہ اپنی زندگی ان کے لئے صرف کر رہا ہے۔ طعنے دینے سے پرہیز کریں۔ اس کی اپنی بھی زندگی ہے جو اس نے بسر کرنی ہے۔ اس کی گدھے کی طرح آپ کے لئے محنت آپ پر احسان ہے نہ کہ پروانہ کہ اس کی ذاتی زندگی میں مداخلت کریں۔

اگر آپ کو یہ بے ربط باتیں سمجھ نہیں لگیں تو رب کا شکر ادا کریں۔ یہ صرف یاداشت کے لئے ہیں اور مجھے علم ہے کہ مکمل مفہوم کیا ہے۔ شکریہ

Popularity: 23%