بدتمیز

پڑھنے اور پڑنے میں وہی فرق ہے جو امریکہ اور پاکستان میں ہے۔ پاکستانی فارغ وقت میں پڑتے ہیں اور امریکی پڑھتے ہیں۔ ہاں دونوں طرف کی حکومتیں یکسر الٹ ہیں۔ امریکی حکومت اکثر پڑتی دیکھائی دیتی ہے جبکہ پاکستان حکومت اکثر ہدایات پڑھتی دیکھائی دیتی ہے۔

امریکہ میں تقریبا سبھی کتابیں بیسٹ سیلر ہوتی ہیں۔ بڑے لوگ بڑے اخباروں کے بیسٹ سیلر تو چھوٹے لکھاری چھوٹے قصبوں کے بیسٹ سیلر۔ افریقن امریکن میں لڑکے ہر قسم کی فلم چٹ کر مارتےہیں اور لڑکیاں ناول پڑھنے سے فرصت نہیں پاتیں۔ بس اسٹیشن ہو یا بس کے اندر فٹ پاتھ پر یا مال کے باہر ہر وقت بہت سے لوگوں کے ہاتھوں میں کتاب ہوتی ہے۔

ابھی چند دنوں پہلے کسی امریکی کا پڑھا اب نام پھسل گیا ہے بڑا مشہور بندہ تھا۔ اس کی بیٹی اس کو کہانیوں کی کتاب دے کر اس کی گود میں بیٹھ کر کہانی سنتی تھی۔ روزانہ ایک ہی جیسی کہانیاں سنا سنا کر تنگ آ کر اس نے ایک دن ٹیپ ریکارڈر میں اپنی آواز میں وہ کہانیاں ریکارڈ کر دیں۔ بیٹی نے پھر آ کر کہا کہ کہانی سناؤ تو اس نے کہا بیٹا تم ٹیپ سے سن سکتی ہو بیٹی نے تنک کر کہا لیکن میں اس کی گود میں بیٹھ نہیں سکتی۔ خود میرے کزنز کو اتنا شوق تھا کمبخت سب کے سب کوئی رسالہ میگزین کتاب نہیں پڑھتے تھے مجھے کہتے تھے کہانی سناؤ۔ کافی سالوں بعد جب میرے کزنز امریکہ سے آئے تو ساتھ کہانیوں کی کتابیں لائے۔ اب تصویریں دیکھ لیتے تھے سمجھ نہیں آتی تھی تو مجھ سے پڑھواتے تھے۔ یہ بہر حال پہلے والوں سے بہتر تھے۔ جو خود سست ترین تھے۔

یہ عادت ڈالی جاتی ہے اسکولوں سے۔ اسکول میں ایک اسائنمنٹ ہوتی ہی کسی کتاب یا ناول کو پڑھنا ہے۔ اگر آپ اپنے کسی فیملی ممبر کو بھی کوئی کتاب پڑھواتے ہیں تو اس کے الگ سے مارکس ملتے ہیں۔ نتیجتا مجھ پڑھے لکھے جاہل اور فارغ ترین شخص کو کہیں نہ کہیں سے کتاب پڑھنے کی دعوت ملتی رہتی ہے۔ حد تو یہ ہے میری سنجیدہ شکل دیکھ کر بھی بچے باز نہیں آتے اور جن کے بچے چھوٹے ہیں ان کے والدین باز نہیں آتے۔ یار یہ ذرا کتاب تو پڑھ دینا بچے کی کو ایکسٹرا مارکس ملنے ہیں۔ اب کتاب دیکھیں اور ان کا منہ دیکھیں۔ پھر سوچیں کہ سر یہ کتاب آپ خود کیوں نہیں پڑھتے۔ صبح خاتون اسٹور کھولتی ہیں تو رات کو صاحب بند کرتے ہیں۔ وقت نہیں۔ اگر بچے کے لئے وقت نہیں تو امریکیوں پر ہنسنا کیسا؟

ستم ظریفی وہ چھ کوس دور ایک انڈین انکل رہتے ہیں ان تک نے میرا نام پتہ اپنے بچے کی کتب بینی پروگرام کے لئے استعمال کر مارا اور مجھے یکے بعد دیگرے تین "لو لیٹر" موصول ہوئے جن میں خاتون نے گزارش کی کہ میں کتاب پڑھ دوں۔ اور اگر میں کسی میگزین کی سبکرپشن ان سے کرواؤ تو متعقلہ میگزین ان کے اسکول کو عطیہ دے گا۔ چونکہ مجھ سے نہ عطیہ کا وعدہ تھا نہ میگزین "بالغان" کے تھے لہذا یہ محبت نامے ردی کی ٹوکری کی نظر کر دئے۔

کتب بینی کے شوق کا صرف اس سے اندازہ لگائیں کہ ہر شہر کی اپنی لائبریری ہوتی ہے جس میں کانفرنس روم سے لے کر سائلنس روم تک ہوتا ہے۔ اب جیسے میرے ارد گرد تینوں شہروں کی چھوٹی چھوٹی اپنی اپنی لائبریری ہے۔ ہر کچھ ماہ بعد اخبار میں لسٹ آتی ہے کہ کونسی کتب لائبریری میں ایڈ کی گئی ہیں۔ لائبریری کی رکنیت کی کوئی فیس نہیں صرف اس شہر میں رہائش پذیر ہونا لازمی ہے۔ بس آپ کا لائسنس دیکھ کر کارڈ بنا دیتے ہیں۔

بک فئیر بھی منعقد ہوتے ہیں۔ اکثر اسکولوں میں بک فئیرز میں ناولٹی آئٹم بھی ہوتی ہیں۔ سن گلاسز ٹوپیاں پرس اور ڈیکوریشن پیس وغیرہ۔ ہمارے بالکل پاس ہی ایک کاؤنٹی پرنس جارج کے اسکول کے پرنسپل نے نوٹ کیا کہ بچے بک فئیرز میں ناولٹی آئٹم زیادہ خریدتے ہیں۔ اور یہ سچ ہے میرے بھائی کزنز نے اب تک کوءی کتاب گھر لا کر نہیں دیکھائی ہمیشہ کوئی نہ کوئی ڈیکوریشن پیس لاتے ہیں۔ لہذا ان پرنسپل صاحب نے بچوں میں کتب بینی کو بڑھانے کے لئے بچوں کو چلینج کیا کہ اگر وہ 201 کتب خریدیں تو وہ ایک دن سکول جیل میں گزاریں گیں۔

اس مقصد کے لئے آرٹس کے ٹیچر اور ان کی جماعت نے ملکر اسکول کیفے ٹیریا میں ایک جیل بنائی جس میں جالیاں لگائی گئی تھیں۔ بک فئیر والے دن ایک جار میں ماربل اسٹون بھر کر رکھ دئے گئے اور جونہی کوئی بچہ کتاب خریدتا اس جار سے ایک پتھر نکال دیا جاتا۔ جلد ہی تمام 201 پتھر جار کے باہر تھے۔ اس موقع پر بچوں کو ایک اور چیلنج دیا گیا۔ اگر وہ مزید 157 کتب خریدیں تو پرنسپل صاحب جیل مین فلیورڈ بینز کھائیں گیں۔

فلیورڈ بینز ہوتی ہیں ایسی بینز یا جیلی جس میں کسی بھی قسم کے ذائقے کو شامل کیا جاتا ہے۔ یہ ذائقہ "الٹی" یعنی vomit سے لے کر ترش بھی ہو سکتا ہے۔ بچوں کو ووٹ کرنے کا حق دیا گیا کہ اس دن مسٹر پرنسپل کونسی فلیور والی جیلی کھائیں گیں۔ جلد ہی بچوں نے یہ چیلنج بھی پورا کر لیا نتیجتا پرنسپل صاحب نے ایک دن جیل میں گزارنا ہے۔ جہاں وہ الٹے الٹے ذائقے والی جیلی کھائیں گے اور مڈل اسکول کے بچے خوش ہونگے۔ بہر حال پرنسپل صاحب اپنے مقصد میں کامیاب اترے۔

Popularity: 37%