بدتمیز

قدو یعنی قدیر احمد رانا ملتانی بالکل مت پڑھیں نہیں تو اپنی ذمہ داری پر پڑھیں۔ شکریہ

یہ سب شروع ہوا تھا ایک تصویر سے۔ ٹھہرئیے میں آپ کو فلیش بیک میں لے چلتا ہوں۔ قدو میرا بچپن کا یار کچھ عرصہ پہلے ناراض تھا۔ وجہ صرف اتنی تھی کہ قدو صاحب مجھے ڈکٹیٹر نمبر دوئم مانتے ہیں۔ پہلا نمبر کمال مہربانی سے صدر پاکستان کو دے رکھا ہے دوسرا ان کی فرمائشیں ان کی اماں ابا پوری کر سکتے ہیں یا آنے والے چند سالوں میں ایک بدنصیب خاتون کریں گیں۔ کم از کم میرے بس سے یہ باہر کی بات ہے۔ لہذا جلالی طبعیت کے باعث انہوں نے اپنے فون میل میسینجر سب بند کر ڈالے۔

اتنے میں محب نے ایک دن کہا فون تو کرو ذرا۔ میں معصوم فون کیا تو محب آگے سے قدیر سے زیادہ میری اصلاح پر مائل تھے۔ خیر میں نے کہا مجھے تو بالکل پرواہ نہیں اور قدو صاحب یا کوئی اور اگر سب کچھ بند کرے بیٹھتا ہے تو ذرا سب کچھ آن کر کے دیکھے کہ میں کانٹیکٹ کرنے کی کوشش کرتا ہوں کہ نہیں۔ قدو کا جواب تھا یقینن نہیں۔

اب ایک دن ہم بیٹھے ہوئے تھے تصور جاناں کئے ہوئے کہ قدو نازل ہوئے۔ کچھ دیر تو ایسے پھرتے رہے جیسے لنگور سڑک پر پھرے تو درخت ڈھونڈتا ہے۔ پھر قدو کا جوش ایمانی ذرا دھیما پڑا تو انہوں نے پوچھنا شروع کیا کہ میں اکڑا کس بات پر ہوا ہوں میں نے کہا بھائی سردی سے، فلو اور کھانسی کے ساتھ۔ قدو کو پہلے تو تین دن یقین نہ آیا پھر ایک دن محبت میں انہوں نے اپنی تصویر بھیجی جو کسی جگہ زبردستی کھینچی گئی تھی لہذا انہوں نے منہ کے ساتھ وہ حال کیا جو خواتین کریں تو بندہ خون کے گھونٹ پیتا ہے لیکن قدو کرے تو سکون کا سانس لیتا ہے یعنی انہوں نے اپنے بوتھے شریف پر ایک عدد وائٹ ڈاٹ سے پردہ کیا ہوا تھا۔ میں نے کہا پوری بھیجو فرمایا گیا پہلے تم کہ میں تم پر اعتبار نہیں کرتا۔ میں نے کہا بہت بہتر۔

اس سے قبل ہمارے پاس قدو کی ایک وہ تصویر تھی جو انہوں نے سائیڈ پوز سے کھینچوائی تھی جس کا عذر جو کہ اندر کی بات یہ ہے کہ اس دن کسی خاتون سے رخ روشن کی ایک سائیڈ گہنوا کر آئے تھے لہذا سائیڈ پوز سے لینی پڑی۔ اب اتنے سالوں بعد اس قابل ہو سکے کہ کیمرہ کا سامن کر سکیں نتیجہ وہ تصویر ہے جو یہ دیکھانے سے انکاری ہیں اور عذر یہ کہ بہت بری ہے یعنی ان کا خیال ہے کوئی اچھی تصویر لگائیں تو لوگ ان پر ڈل جائیں۔

اب میں کہتا ہوں تصویر دو اور یہ فرماتے ہیں نہیں۔ پھر یہ فرماتے ہیں یہ یہ کر دو اور میں کہتا ہوں پہلے تصویر دو۔ لہذا ساری پسوڑی تصویر کی تھی۔ ایک دن انہوں تصویر کو ری سائز کیا اور بھیج دی۔ میں ان کے لئے اپنی ایک تصویر لے چکا تھا جس میں ان کو اپنے حسن و جمال کے شاکس اور آفٹر شاکس سے بچانے کے لئے سردی کی وجہ سے پہنی ہوئی ٹوپی کو آنکھوں تک نیچے کر لیا تھا لیکن قدو کے ری سائز کے جواب میں ان کو اپنی کے بجائے کسی اور کی سائیڈ پوز سے لی گئی تصویر بھیج دی۔ بےایمانی کے جواب میں بےایمانی ہی ہوتی ہے۔ تو ابھی تک ہم تصویر پر لڑ رہے ہیں۔

قدو اکثر بہت جلدی میں بھاگ جاتا ہے عام طور پر آپ اپنی سنا کر نکل لیتے ہیں۔ جیسے مختلف جگہوں پر پروٹیکٹڈ یا اوپن فورمز پر میرے خلاف کچھ نہ کچھ پراپیگینڈہ کیا جاتا ہے جس کا لب لباب سستی ہوتا ہے۔ لہذا ایک دن یہ ایسے ہی بھاگ رہے تھے اور میں ان کو گانا سنا رہا تھا کہ

مجھے چھوڑ کر نہ جا

دل توڑ کر نہ جا

میرے رم جھم آنسو دیکھ لے

ابھی یہی تک سنایا تھا کہ قدو صاحب آفلائن ہو گئے جو کہ سراسر بدتمیزی ہے۔ اگلے دن نازل ہوئے۔ اچھے موڈ میں تھے میں نے کہا کل میرا گانا نہیں سنا تھا اگر کام نکلوانا ہے تو آج تم سناؤ نتیجتہ موصوف شروع ہو گئے۔ گانا انہوں نے کچھ یوں سنایا۔

مجھے چھوڑ کے نہ جا

دل توڑ کر نہ جا

میرے رم جھم آنسو دیکھ لے کمینے۔

میں نے کہا یہ کمینہ کہہ کر اپنا تعارف کیوں کرواتے ہو فرمایا یہ اپنا نہیں تمہارا نام لیا ہے۔ بس میں نے کہا جاؤ میں نہیں بولتا۔ اب غلطی کی ہے تو چھیا چھیا والا گانا سناؤ لہذا قدو صاحب غائب۔

اگلے دن پھر نازل ہوئے۔ فرمایا آج تم میرا گانا سنو۔ میں نے کہا سناؤ۔ گانا شروع ہوا۔

آجا تینو اکھیاں اڈیک دیاں

آ جا تینوں اکھیا اڈیک دیاں

اکھیاں اڈیک دیاں دل واجاں ماردا

آجا پردیسیاں واسطہ ہے تینوں پیار دا۔

ملاحظہ فرمایا؟ آوازیں پردیسی کو ماری جا رہی ہیں اور گانا مجھے سنایا جا رہا ہے۔ میں نے کہا استغفار۔ تمکو کیا ہوا؟ فرمایا

جی چاہتا ہے تیرے لب چوم لوں

گالوں سے لالی چرا لوں

پتہ نہیں کیا تھا۔

کسی بھی شریف آدمی کا یہ گانا سن کر جو حال ہو سکتا ہے وہی میرا ہوا۔ پوچھا تمہارے گھر میں بھائی باپ نہیں ہیں؟ یقین کالونی کے باہر چماروں کی بستی میں کوئی نئی گدھی بندھی ہو گی۔ آگے سے فرمایا یار تو میرے جذبات کی قدر نہیں کرتا۔ میں نے حیرانگی کے مارے پوچھا تم گے کب سے ہو گئے؟ فرمایا قسم سے امریکیوں کے دماغ بہت گندےہیں میں نے کہا گانا بھی ایسا ہی ہے۔ کہا پیار کے نام پر گے شپ تمکو یاد آتی ہے دیکھیے کروز کے زمانے میں شپ؟ میں نے کہا گانا کیوں ایسا منتخب کرتے ہو؟ فرمایا اب چاندنی راتیں گاؤں تو تمہیں اور مرچیں لگ جانی ہیں۔ لیں دیکھیں بھلا دن دیہاڑے مجھے وہ گانے سنا رہا ہے جو ہمسائیوں کی دیوار کے پاس جا کر گنگنایا کرتا تھا اور نہ صرف ہمسائی کے ابا بلکہ اپنے ابا سے بھی مار کھایا کرتا تھا۔

لہذا انہوں نے اگلا گانا سنانا شروع کیا۔

جب سب سوئیں

ہم جاگیں

تاروں سے کریں باتیں

چاندنی راتیں چاندنی راتیں۔

میرا یقین کریں اس وقت قدیر کی طرف دن اور میری طرف رات تھی۔

ایک دن میں نے کہا تمہاری تصویر پوسٹ کرنے لگا ہوں۔ جلال میں فرمایا گیا کہ یہ اعتماد کا کھلا خون ناحق ہے۔ میں نے پوچھا کونسا اعتماد تم نے دینے سے قبل منع نہیں کیا تھا فرمایا اب کر رہا ہوں میں نے کہا کرتے رہو۔ بس اگلے چند دنوں جب جب انہوں نے فرمائش کی میں نے تصویر پوسٹ کرنے کا اعلان کیا اور نتیجہ جلالی لہجہ۔ ایک دن میں نے کہا ایک اور دھمکی اور تمہاری تصویر ابھی کے ابھی پوسٹ اس دن سے موصوف ایسے ہو گئے جیسے تھانے سے مار کھا کر آئے ہوں۔

ایک دن میں نے کہا کہ ایک خاتون تم پر بہت ترس کھاتی ہیں اور کہتی ہیں کہ میں کیوں تم ایسے معصوم کے پیچھے پڑا رہتا ہوں۔ اب ان خاتون سے کہا ہے کہ آپ کو اتنا ترس آتا ہے تو آپ کو قدو کی تصویر دیکھا دوں پس وعدہ کیا ہے اس کے بعد کسی سے نہیں کرونگا۔ قدو صاحب کوئی دو منٹ تو میرے یاہو کو “آلودہ” کرتے رہے پھر پوچھا کیا وہ خاتون کوئی well known اردو بلاگر ہیں؟ اب جملہ خواتین بلاگر ازراہ کرم اندرونی رائے شماری کا اہتمام کر کے ایک undisputed بلاگر کا نام بتائیں تا کہ میں ہاں یا  ناں میں جواب دے سکوں۔ اب وہ خاتون خود ہی صفائی پیش کر کے اپنا نام نہ بیان کر دیں۔

میرے نہ بتانے پر قدو صاحب حد درجہ سنجیدہ ہو گئے جس کا لب لباب یہ نکلا ان کے اپنے الفاظ میں کہ اگر یہ اپنے جملے کے آخر میں ! یعنی exclamation mark لگائیں تو اس کا مطلب ہے یہ بہت سنجیدہ ہیں۔ اور جملے کے آخر میں ! لگایا ہوا تھا۔ اب میں پریشان کہ punctuation سے میری واقفیت صرف اور صرف question mark کی حد تک تھی اگر اپنی یاداشت ذرا زیادہ گھنگھالو تو ایک مارک برادران آسٹریلیا کے ہوا کرتے تھے لیکن یہ ایک نیا مارک بالکل غیر متوقع تھا۔

اسی طرح میں نے کسی کو بتایا کہ قدو کے اس نئے مارک کا کیا مطلب ہے۔ چند دنوں بعد ان کی شامت آئی ہوئی تھی تو انہوں نے بھی اپنے جملے کے آخر میں ڈھیر سارے exclamation marks ڈال دئیے میں نے معصومیت سے پوچھا اتنے ڈھیر سارے exclamation marks کا مطلب ہے آپ بھی قدیر کی طرح بہت سنجیدہ ہو؟ اب آگے سے ان کی دندیاں نکلی یا نہیں نامعلوم نا پتہ چلا کہ سنجیدہ تھے یا نہیں۔ لہذا اگر آپ اس مارک کے استعمال سے مجھے کوئی میسج دینا چاہ رہے ہیں تو ساتھ میں وضاحت بھی کریں۔

اب قدو کی بدقسمتی کہ جب میرا موڈ ہوتا ہے ان کا کام کرنے کو تب میرے پاس ونڈوز وسٹا چل رہی ہوتی ہے اور جب میرا موڈ نہیں ہوتا تب میرے پاس ونڈوز ایکس پی چل رہی ہوتی ہے۔ یہی حال سکائپ کا بھی ہے۔ ویسے بھی اب قدو تصویر دیتے نہیں نہ تصور جاناں سے لطف اندوز ہونے دیتے ہیں فٹ نازل ہو جاتے ہیں لہذا ان کی طرف سے اعلان جنگ ہے۔ اور میری طرف ہمیشہ کی طرف پائریٹ پرچم ہے۔

سکائپ پر بلانے کا بہت شوق ہے نیا نیا انسٹال کیا ہے لہذا یہ اب بولتے ہیں اور میں سنتا ہوں۔ انگلش میں کچھ گٹ پٹ کر رہے تھے میں نے کہا سمجھ نہیں آ رہی کہتے cant u understand what I said? میں کہا کیا؟ اب خود بتائیں میں سچا ہوں کہ نہیں؟

ابھی کل پرسوں میں نے کہا کہ کوئی ایسی پانچ وجوہات بیان کروں کہ میں تصویر نہ لگاؤں فرمایا

Qadeer Ahmad Rana: when I say no it means NO

میں نے کمال معصومیت سے پوچھا یہ تو ایک ہوئی باقی چار؟

Qadeer Ahmad Rana: coz I don’t want

Qadeer Ahmad Rana: coz I don’t like

Qadeer Ahmad Rana: coz it’s against trust

Qadeer Ahmad Rana: coz it can break our thin friendship

اب آپ بتائیں قدیر کو انگلش میں بتانی چاہئے تھیں؟ مجھے تو بالکل سمجھ نہیں لگی کہ کیا لکھا ہے۔

چونکہ قدیر کو میری ڈکٹیٹر شپ پر اعتراض ہے اور ان کے خیال میں سب کام جمہوری طریقے سے ہونے چاہئے لہذا مجھے پانچ ووٹ چاہئے۔ اگر پانچ ووٹ قدیر کی تصویر پوسٹ کرنے کے حق میں آئے تو تصویر پوسٹ کر دی جائے گی۔ چونکہ ملک میں جمہوریت کی طرف تیسرے فیز کی جانب کام ہو رہا ہے لہذا ایسے تمام ووٹ جو کہ تصویر پوسٹ کرنے کے خلاف ہونگے کو ناقابل قبول سمجھا جائے گا۔

اگر آپ بھی fun of a lifetime سے لطف اندوز ہونا چاہیں تو یاہو میسینجر پر یا سکائپ پر shahpar86 کو ایڈ کر لیں۔ امید ہے آپ کا وقت بہت اچھا گزرے گا۔