o_O بدتمیز

کل  میں نے ایسے ہی سلائس کی سائیڈ الگ کی اور اس کو کھانے لگا۔ فورا فلیش بیک ہوا اور مجھے کچھ یاد آیا۔ چھوٹے ہوتے مجھے سلائس کی سائیڈز، نان کا درمیانی حصہ اور لال مرچوں والا انڈہ بہت زہر لگتا تھا۔ لال مرچوں کا تو حل یہ نکالا گیا کہ اس کو کالی مرچوں سے تبدیل کر دیا گیا۔ نان ویسے ہی جلدی اکٹر جاتا تو درمیانی حصہ واپس ہاٹ پاٹ میں لیکن سلائس کی سائیڈز کا کوئی حل نہیں تھا۔ لہذا میں دونوں سلائسز کی سائیڈز الگ کرتا ان کو بڑی مشکل سے نگلتا پھر مزے سے سلائس کھاتا اور پھدک کر ڈبل بیڈ کے آخری کونے پر پہنچ جاتا۔ کیونکہ اب دوائی کا وقت ہونے لگتا تھا۔ < ?xml:namespace prefix = o ns = "urn:schemas-microsoft-com:office:office" />

چھوٹے ہوتے بیمار ہونا اتنا برا نہیں ہوتا تھا جتنا ڈاکٹر کے پاس جانا اور دوائی لینا۔ اب ابو کہیں چلو ڈاکٹر کے پاس چلیں میں کہوں نہیں جانا لیکن ابو زبردستی اٹھائیں جیکٹ پہنائی اور پہنچ گئے ڈاکٹر کے پاس۔ اب ڈاکٹر صاحب کے ایک طرف بندوں کا حصہ ہوتا تھا ایک طرف عورتوں کا۔ بیچ میں ڈاکٹر صاحب نے اپنی میز سجائی ہوتی تھی اور ان کے میز کے بالکل سامنے کمپاؤڈر کے لئے “حجرہ” بنایا ہوتا تھا جہاں سے وہ صرف دوا بنا کر نازل ہوتے تھے۔ ڈاکٹر صاحب آپ کے منہ میں تھرما میٹر گھسا دیتے ہیں جبکہ آپ کا سر درد ہونے کے باعث دل چاہ رہا ہوتا ہے کہ کلینک میں موجود سبھی باتونی لوگوں کے منہ میں ایک ایک تھرما میٹر گھسا دیں۔

اب دوائی سے میرا ازل کا بیر ہے۔ اتنی کڑوی لگتی تھیں کہ بس۔ اب ہوتا کچھ یوں تھا کہ امی نے ڈبل بیڈ دیوار کے ساتھ جوڑا ہوا تھا کہ بچے نیند میں نیچے نہ گر جائیں۔ لہذا میں بیڈ کے آخری possible کنارے پر کھڑا نہیں پینی نہیں پینی کی رٹ لگائے ہوتا تھا۔ اب امی کبھی ابو کا ڈراوا دیں یا شام کو ڈاکٹر صاحب کا۔ کبھی اگر کمزوری زیادہ ہو تو تو میں جان چھڑانے کے لئے جا کر پی لیتا تھا اور پھر دھم سے گر کر سو گیا۔ نہیں تو امی کو پیڈ پر آنا پڑتا تھا۔ اب کبھی دوائی گر گئی تو دوائی کے ساتھ ساتھ ایک آدھ تھپڑ بھی پڑ جاتا تھا۔

بڑے ہونے پر میں نے دوائی کے ساتھ سوتیلوں جیسا سلوک شروع کر دیا۔ کتنا ہی سر دکھے یا زکام ہو یا کھانسی میں دوائی نہیں لیتا تھا۔ کھانسی کی کھوں کھوں کا علاج امی نے گنڈیریاں کھلا کر کیا ہوا تھا۔ اور سچ میں یہ کام کرتا ہے۔ آپ صرف دو دن کھائیں اگر کھانسی کو فوری آرام نہ آئے تو مجھے کہیں میں آپ کو رونڈیک بھیج دونگا۔ لہذا بڑے ہو کر بھی میں نے گنڈیریاں ہی ڈھونڈی کبھی بھی دوائی نہیں لی۔ زکام کا علاج وہی ڈاکٹروں والا کہ چھینکیں مار لیں یا ٹشو خود ہی ٹھیک ہو جاتا تھا۔

سر درد نے بہت تنگ کیا تھا۔ بڑے ہو کر سرگرمیاں بڑھ گئیں تو گرمیوں میں تو ہر ہفتے ہی ہوا کرتا تھا۔ اب ڈسپرین لینے کو دل نہیں کرتا تھا کہ آخر کار دوائی میں شامل ہے۔ لہذا سارا دن صبر کرو رات کو سو۔ صبح ٹھیک ہو گیا تو بہت اچھی قسمت نہیں تو اگر سردیاں ہیں تو possibility ہے کہ صبح بھی ٹھیک نہیں ہو گا تو اب ڈسپرین لے لو۔ اور لو بھی کیسے؟ اس پر لکھا ہوتا تھا دو گولیاں پانی میں حل کر کے۔ میں آدھی گولی پانی میں حل کر کے پی لیتا تھا نہیں تو سر درد کا علاج سونا ہی رکھا ہوتا تھا۔

اب پچپن میں حالات بدل گئے ہیں۔ اب میں دوائی کے ساتھ مزید برا سلوک کرتا ہوں۔ اب گولی تو پوری لے لیتا ہوں لیکن اس پر لکھا ہوتا ہے ہر چار گھنٹے بعد یا ہر آٹھ گھنٹے بعد۔ میں ایک ڈوز لے کر تین دن انتظار کرتا ہوں کہ دوا نے کام دیکھایا کہ اثر دیکھایا۔ نتیجہ تقریبا دو ہزار ڈالر کا نقصان نکلا۔ اس لئے شئیر کر رہا ہوں میری طرح کی غلطی مت کریں۔

امریکہ میں ایسا نہیں ہوتا کہ آپ کوئی بھی دوا جا کر لے آئیں۔ کچھ میڈیسینز prescription ہیں اور کچھ non prescription ہیں۔ non prescription کو over the counter بھی کہا جاتا ہے یعنی آپ اسٹور سے جا کر خرید سکتے ہیں۔ prescription drugs کے لئے آپ کو جا کر ڈاکٹر سے نسخہ لکھوانا پڑتا ہے۔ ڈاکٹر مناسب سمجھے تبھی لکھ کر دیتا ہے۔ اس کی دو وجوہات ہیں ایک تو فیمس کہ بہت سی ڈرگز نشہ آور بھی ہوتی ہیں۔ دوسرے یہ کہ ہو سکتا ہے آپ اپنی ڈاکٹری لگائیں اور کسی کو وہ دوا دے دیں جو اس کو نہیں بھی چاہئے۔

اب ہوا صرف اتنا تھا کہ ہر سال کی طرح اس سال بھی میں نے سالانہ ٹھنڈ لگوائی۔ سردی کے موسم کا اندازہ مجھے تب تک نہیں ہوتا جب تک ٹھنڈ نہ لگے۔ (ہیں نہ الٹے کام میرے) بس ٹھنڈ لگے گی تبھی گرم کپڑے پہنیں جائیں گیں ورنہ نہیں۔ بس ٹھنڈ لگوائی۔ لیکن دوائی نہیں لی۔ نتیجتہ فلو کی شکل اختیار ہو گئی۔ اب فلو کی دوائی نہیں ہوتی۔ ویسے بھی میں دوائی ایسے لے رہا تھا کہ آج لے لی اور پھر ویٹ کے کچھ اثر ہوا کہ نہیں اب فلو صاحب نمونیا میں کنورٹ ہو گئے۔ لیکن بخار نہیں تھا تو مجھے احساس نہیں ہوا۔

ساتھ میں کھانسی بھی تھی لیکن میں نے پروا نہیں کی۔ باہر ٹھنڈ میں جا کر raking کرتا رہا۔ نتیجتا کچھ کچھ ہوا۔ ڈاکٹر صاحب نے فرمایا تو نہیں لیکن جو انہلیر دیا ہے وہ asthma کنٹرول کا ہے۔ لہذا ہم دونوں سے نبٹ رہے ہیں۔ آپ کو اگر فلو کے ساتھ جسم درد ہو لیکن بخار نہ ہو تو میری طرح ہفتہ بالکل انتظار مت کریں نمونیا بغیر بخار کے بھی ہو جاتا ہے۔ میں تو اوپر جاتے جاتے بچا ہوں پچھلے منگل کو سانس بالکل بند تھی۔ میں ڈھیٹ پھر جا کر سو گیا اور یہی کہوں کے ڈاکٹر کے پاس نہیں جانا اب ٹھیک ہے۔ وہ تو دوپہر کو ماموں آئے صبح کا حال سن کر زبردستی لے گئے۔ فرمایا اس حال میں اگلے دیر نہ کرنے کے لئے ایمبولینس سے نہیں ہیلی کاپٹر سے لے کر جاتے ہیں اور تم مزے سے سو رہےہو۔

ڈاکٹر صاحب کا کلینک بالکل مختلف تھا۔ کاؤنٹر والی آنٹی کے پاس جائیں۔ اس سے کہیں فلاں ڈاکٹر کی اپوائنٹمینٹ دے دیں۔ وہ آپ کو تین چار فارم پکڑا دے گی یہ سب فل کریں۔۔ اب آپ فارم فل کریں۔ اس فارم میں آپ کی مکمل انفارمیشن بشمول سوشل سیکیورٹی نمبر لیا جاتا ہے۔ فل کر کے واپس کریں اور انتظار کریں۔ میرے سے پہلے کافی لوگ تھے لیکن ان کی اپوائنٹمینٹ دوسرے ڈاکٹرز کے ساتھ تھی لہذا میرا  نمبر فورا ہی آ گیا۔ آپ کو ایک نرس لے جا کر بلڈ پریشر چیک کرتی ہے پھر ٹمپریچر لیتی ہے۔ پھر وزن لیتی ہے۔ اس کے بعد وہ آپ کو ایک دوسرے کمرے میں لے جا کر بیٹھا دیتی ہے۔

اس کمرے میں بیٹھنے کے لئے دو کرسیاں، ایک اسٹول، ایک کیبنٹ اور ایک بیڈ ہوتا ہے۔ یعنی ڈاکٹر صاحب کھڑے رہتے ہیں۔ کمرے کے دروازے پر فلاں ڈاکٹر نیکسٹ کا پیپر لگا ہوتا ہے۔ ڈاکٹر صاحب آئیں گیں حالات پوچھیں گیں۔ پھر ناک کان گلا آنکھیں چیک کریں گیں۔ سٹیتھو سکوپ سے wheezing چیک کریں گیں۔ اس کے بعد سگریٹ اور شراب کا پوچھیں گیں۔ سچ میں سگریٹ اور شراب نہ پینا ہم لوگوں کے لئے ایک نعمت ہے۔ بہت سی دوائیں ان لوگوں پر اثر تو دور کی بات الٹا نقصان پہنچاتی ہیں۔ خاص طور پر الکوحلک لوگوں کی زندگی اجیرن ہو جاتی ہے۔ تنگ آ کر ان لوگوں کو بیماریوں والی عمر میں چھوڑنی پڑتی ہے یا شراب یا جان۔ اب ڈاکٹر صاحب گئے اور ایک مشین اٹھا لائے۔ اس میں سے بخارات نکلتے ہیں جو آپ نے منہ کے ذریعے سانس سے اندر لے جانے ہوتے ہیں۔ اب ڈاکٹر صاحب جائیں گیں اور دوا لکھ لائیں گیں۔ اور بس کام ختم۔ جائیں فیس پے کریں اور گھر کو۔

دوا ڈاکٹر کے آفس سے نہیں ملتی۔ آپ کو فارمیسی سے لینی پڑتی ہے۔ یہاں چار بڑی فارمیسیز ہیں۔ پہلی Walgreens یہ چوپیس گھنٹے کھلی رہتی ہے۔ اس کے بعد riteaid ہے۔ ایک cvs ہے اور چوتھی والمارٹ کی فارمیسی ہوتی ہے۔ والمارٹ کافی ساری دوائیں جنیریک بناتا یا بیچتا ہے لہذا یہاں بہت سستی ملتی ہیں۔ دوسرے نمبر پر وال گرینز پر سستی ہونگی۔ اب دوا لینے کے لئے بھی آپ کی مکمل معلومات کمیسٹ لے لی گی۔ ڈاکٹر کے نسخہ یہ رکھ لیتی ہے۔ یہ آپ کو واپس نہیں ملتے۔ دوا پر آپ کا نام پتا سٹیکرز سے چپکایا جاتا ہے کیونکہ یہ دوا صرف آپ استعمال کر سکتے ہیں یہ نہیں کہ کسی اور کو بھی اپنی ہی دوا استعمال کروا دیں۔ ساتھ میں ڈاکٹر کا نام بھی لکھا ہوتا ہے۔ refill ہو سکتی ہے یا نہیں یہ بھی لکھا ہوتا ہے اور کس تاریخ تک۔ ساتھ میں ہدایات کے اسٹیکر بھی کیمسٹ چپکاتی ہے کونسی کھانی ہے اور کونسی انہیل کرنی ہے کس کو ہلانا ہے اور کس  نے آپ کو ہلا چھوڑنا ہے لہذا کھانے کے ساتھ لیں۔ مجھے تو اس نے ایک نشہ دیا ہے کھا کر اتنی گہری نیند آتی ہے کہ بس۔ اتنی گہری نیند میں کبھی نہیں سویا۔

اب دوائیں کھائیں اور سوئیں۔ اور کر بھی کیا سکتے ہیں۔