o_O بدتمیز

خاور نے لکھا کہ اگر مجھے ڈپر تک مارنا نہیں آتا تو لائسنس کس نے دے دیا۔ ایک موٹی سی گوری آنٹی نے۔ میٹروپولیٹن اور چھوٹی جگہوں کا یہی فرق ہے۔ میرے شہر میں چار لینز والی سڑکیں انتہائی کھلی لگتی ہیں۔ نیویارک جائیں تو چھ لینز والی سڑک بھی چھوٹی لگتی ہے۔ جیسے یہاں parallel parking کی ضرورت نہیں ہوتی نہ روڈ ٹیسٹ لیتے وقت کروا کر دیکھا جاتا ہے لیکن بڑے شہروں میں یہ لازمی ہے۔

یہاں لائسنس لینے کے لئے پاپڑ بیلنے پڑتے ہیں۔ مجھے کم از کم بھی 3٫4 دفعہ جانا پڑا تھا کبھی یہ نہیں تو کبھی وہ نہیں تو کبھی کولمبس ڈے کی چھٹی۔ لائسنس لینے سے پہلے دو قسم کے ٹیسٹ لازمی ہیں۔ ایک کمپیوٹر پر یعنی ٹچ سکرین پر ہوتا ہے دوسرا روڈ ٹیسٹ۔

کمپیوٹر والا ٹیسٹ دینے سے قبل dmv کی ایک کتاب ملتی ہے۔ اس کا مطالعہ کرنا پڑتا ہے۔ رٹا لگانے والا فیل ہوتا ہے۔ لہذا مطالعہ کریں اور اس کے قانون سمجھیں۔ ہر سٹیٹ کے dmv کی کتاب مختلف ہوتی ہے۔ اس کمپیوٹر ٹیسٹ کے دو حصے ہوتے ہیں۔ پہلے اشارے یعنی روڈ سائنز۔ یہ 10 سوال ہوتے ہیں اور 10 کے 10 کا صحیح جواب دینا لازمی ہوتا ہے۔ ایک بھی غلط ہونے کی صورت میں ٹیسٹ ختم اور وہ آپ کو بتاتے ہیں کہ اب کتنے دنوں بعد آنا۔ یہ حصہ صحیح حل کرنے پر دوسرا حصہ ہوتا ہے۔ اس کے 25 سوال ہوتے ہیں۔ ان میں سے 5 غلطیوں کی گنجائش ہوتی ہے۔ یہ ٹیسٹ مکمل کرنے پر آپ کو learners license مل جاتا ہے یعنی اس کے ساتھ ہی آپ گاڑی چلا سکتے ہیں ویسے نہیں اور کچھ رسٹرکشنز ہوتی ہیں کہ ساتھ کوئی ہو۔ کتنے سال تک کے بچے بیٹھا سکتے ہیں۔ پھر تعداد ہوتی ہے کہ اگر عمر اتنی ہے تو اتنے سالوں کے اتنے بچوں سے زیادہ نہیں بیٹھا سکتے۔ یہ ان کی ساری سٹڈی ہے کہ گاڑی میں کتنے بچے ہوں تو enough distraction پیدا ہو گی۔ اس پر میں نے اکثر دیسیوں کو ہنستے دیکھا ہے۔ بےوقوف سمجھتے نہیں ہنستے ہیں۔

روڈ ٹیسٹ میں پھر اسی طرح فارم وغیرہ بھریں۔ نمبر آنے پر خاتون کے کاؤنٹر پر پہنچ جائیں۔ فرمان ہو گا کہ گاڑی جا کر ٹیسٹ سینٹر پر کھڑی کرو اور مجھے اس کی رجسٹریشن لا کر دو۔ جی ہاں ٹیسٹ دینے کے لئے گاڑی آپ کو مہیا کرنی پڑتی ہے۔ کسی سے لینی پڑے گی۔ اگر سکول میں داخلہ لیا تھا تو وہ اپنی گاڑی دیں گیں۔ میں ماموں کی گاڑی لے گیا تھا۔ اب وہ آپ سے کہے گی انجن سٹارٹ کرو۔ لائٹس وغیرہ چلوا کر دیکھے گی۔ پھر بریک، اس کے بعد وہ پیسینجر سیٹ پر آ کر بیٹھ جاتی ہے۔ گاڑی نکالیں اور جیسے جیسے وہ کہتی ہے کرتے جائیں۔ ساتھ ساتھ وہ نوٹ کرتی جاتی ہے۔ اگر پاس ہو گئے تو بہت بہتر نہیں تو دوبارہ 15 دنوں بعد۔

رہی بات ڈپر کی تو دل تھام کر سنیئے مجھے تو وائپر بھی نہیں مل رہے تھے۔ افطار کا وقت نکلا جا رہا تھا اور بوندا باندی شروع ہو چکی تھی۔ رم جھم کی پیشگوئی تھی۔ میں اب وائپر کے لئے ہاتھ ماروں تو اشارے جل پڑیں یا ڈپر تنگ آ کر سکرین صاف کی اور نکل پڑا۔ اسی طرح ہائی وے سے گھر پہنچ گیا۔ جب گھر لا کر کھڑی کی تب وائپر ملا اور اگلی دفعہ بھی چلتی گاڑی اور برستی بارش میں اس پر تجربے کئے کہ کتنے پر سیٹ کروں۔ یہی نہیں مجھے تو پہلے دو تین دفعہ گاڑی سے اتر کر یاد آتا تھا کہ تیل ڈالنے کے لئے اندر سے کھولنا پڑتا ہے باہر سے نہیں کھل سکتا۔ تو سارا قصور ہی اس کا ہے جس نے مجھے گاڑی دے دی۔