o_O بدتمیز

امریکہ میں ہر سال اکتوبر کی اکتیس کو ہالوین کا تہوار منایا جاتا ہے۔ اس میں لوگ اپنے گھروں کو بھوت بنگلے کی طرز پر سجاتے ہیں۔ یارڈ میں پتلے اور ڈھانچے کھڑے کرتے ہیں۔ بیرونی دیواروں جھاڑیوں پر جالے بناتے ہیں۔ اس رات سب لوگ ہالووین پارٹی منعقد کرتے ہیں جس میں سب کے سب ڈراؤنے روپ بنا کر ملتے ہیں۔

بچے اس شام ٹرک اور ٹریٹ کرتے نظر آتے ہیں۔ اس کے لئے آپ ایک دو دن پہلے جا کر کافی ساری candies لے آئیں۔ مہذب معاشرے کے قاعدے الگ ہوتے ہیں۔ لہذا اگر آپ نے گھر کے باہر لائٹ آن کی ہوئی ہے تو اس کا مطلب ہے کہ بچوں کو آنے کی دعوت ہے۔ اگر گھر کے باہر لگی روشنی گل ہے تو اس کا مطلب ہے کہ آپ کا participate کرنے کا کوئی موڈ نہیں لہذا بچے بیل بجا کر آپ کو تنگ نہیں کریں گیں۔

پچھلے سال ہالووین سے چند دن قبل ایک سفید فام شخص سٹور میں داخل ہوا۔ نشے میں لگ رہا تھا۔ آخر کار سگریٹ لیا۔ باہر جاتے جاتے کہتا۔ یو انڈین؟ میں نے کہا ہاں۔ کہتا اللہ و اکبر، اسلام و علیکم۔ پھر بے تحاشہ ہنسنے لگا کہتا میں ہالووین پر اپنے دوستوں کو ایسے ڈراؤں گا۔ اس کا خیال تھا کہ شائد ہم انڈین ہیں تو ہندو ہیں۔ مجھے اس کی بات اس وقت سے چمٹ گئی ہے۔

اس سال پاکستان میں بم دھماکے پر دھماکہ ہوا۔ بینظیر کے آنے سے قبل بھی دھماکے ہوئے۔ اسی طرح کہیں مجھے کسی نے سلام کیا۔ میں نے وعلیکم سلام کہا۔ ارد گرد کافی افریقن امریکن تھے۔ یہ لوگ عام طور پر بالکل پروا نہیں کرتے۔ لیکن ایک افریقن امریکن کہتا مسلم لوگ خود کش حملہ کر کے 42 کنواریاں حاصل کرتے ہیں۔ میں نے اس سے کہا تمہیں کس نے کہا۔ کہتا بس مجھے علم ہے۔ کیا ایسا نہیں ہوتا؟ میں نے کہا نہیں ایسا ہرگز نہیں ہوتا تمہیں مسلمانوں کے بارے میں کچھ علم نہیں تمہیں کسنے ایسا کہا؟ وہ کہتا نہیں مجھے علم ہے۔ ارد گرد کے دو تین افریقن امریکن کہتے اسے تمہارے دین کا کچھ علم نہیں جانے دو۔

ہالووین کی ڈیکوریشن دیکھ کر باقی دیسی لوگوں کو کیا خیال آتا ہو گا؟ کوئی پسندیدہ ڈراؤنی کہانی۔ میرے جیسے بدتمیز کو کوئی سخت ناپسند آنٹی۔ کسی کو فلم تو کسی کو کوئی ڈرامہ۔ مجھے اس سال ہالووین کی ڈیکوریشن دیکھ کر پاکستان یاد آتا رہا۔ حالات بدتر اور حکمران بدترین۔ مسخ چہروں والی اپوزیشن اور گھٹیا اعمال والی پارلیمنٹ۔ بد روحیں جمع بین کر رہی ہیں۔ باز ہی نہیں آتی۔

اس کے بعد ایمرجنسی لگ گئی۔ اخلاقی پستی کا یہ عالم کہ ایک شخص من مانی کی انتہا کر رہا ہے اور لوگ ملک ٹوٹنے کا خطرہ بھی مول لینے کو تیار ہیں۔ چودھریوں سے تو عوامی نفرت بڑھنی ہی ہے بینظیر اس کا مقابلہ کیسے کرے گی علم نہیں۔ خاص طور پر انڈین میڈیا بینظیر کو جیسے پیش کر رہا ہے وہ قابل غور ہے۔

صدر مشرف کو شائد اب جان کی بھی فکر ہے۔ ظاہر ہے آپ کسی کا گھر اجاڑیں گیں تو اگلا آپ کو نقصان بھی پہنچانے کی کوشش کرے گا۔ کرسی چھوڑنے کا مطلب ہے صدر اپنی جان داؤ پر لگا دیں جو کہ بہر حال ملک داؤ پر لگانے سے زیادہ اہم ہے۔

چودھریوں کی تقریر سن کر سر شرم سے جھک جاتا ہے کہ یہ صاحب ہمارے حکمران ہیں۔ میں حیران ہوں کہ ابھی تک مشرف اور حواری اس کو برداشت کیسے کر رہے ہیں؟ جن کو بیان دینا نہیں آتا کسی سے لکھوا ہی لیا کریں۔ اگر لکھواتے ہیں تو تقریر نویس کو چودھری خود ہی فارغ کر دیں (لیکن بھٹو والا فارغ نہیں) کہ ان کی عزت کا فالودہ بنا دیا ہے اس نے۔

اگر وائس چیف آف آرمی ایمر جنسی نافذ کر رہا ہے تو صدر کس لئے ہیں؟ کیا صدر کے دن گنے گئے؟ کسی وقت بھی چیف صدر کو الٹ سکتے ہیں؟ خاص طور پر اگر صاف واضح ہو کہ ایمرجنسی ملک کے وسیع تر مفاد کے بجائے ایک شخص کے وسیع تر مفاد میں ہے تب؟ اور اگر اس سب سے بڑھ کر اپنے وسیع تر مفاد میں امریکہ پاکستانی عوام کی طاقت کو انقلاب ایران کی طرز پر جانے سے روکنے کے لئے صدر مشرف کی قربانی کا فیصلہ کر لے اور چیف آف اسٹاف کو حکومت کا تختہ الٹنے کے لئے سبز جھنڈی دیکھا دے تو؟

صدر نے فرمایا اور اس کی تقریر پر چودھری اللہ دتہ نے same to same بغل بجایا۔ مجھے سمجھ نہیں لگتی اگر ایمرجنسی کی وجہ مختلف اداروں کا حدود سے تجاوز ہے اور اس کے نتیجے میں یہ اپنی اپنی “اوقات” پر آنے چاہئے تو فوج اور جرنیل صاحب کا پامالی حدود کس کھاتے جائے گا اور یہ اپنی حدود اربعہ کب پہچان کر اس کے اندر سمٹیں گیں؟ ضروری تو نہیں قبر ہی سمیٹے انسان خود بھی ہمت کر سکتا ہے نہیں تو خود کش حملہ آور تو تیار بیٹھے ہیں۔

اس سب سے بڑھ کر اگر خود کش حملہ آور اپنے مقاصد میں اس قدر پختہ ہو جائیں کہ اس جنگ کو وہ پہاڑوں سے اتر کر اسلام آباد اور تمام چھاؤنیوں میں پھیلا دیں تو؟ ان لوگوں کو دہشت گرد قرار دینے والے لوگوں سے ایک سوال تو میں پوچھنا چاہتا ہوں کہ کب کسی سویلین جگہ پر انہوں نے حملہ کیا؟ میں ان کے سخت خلاف ہوں لیکن کسی کی عزت اور جان و مال سے کھیل کر توقع رکھنا کہ وہ بدلہ نہ لے گا بےوقوفی ہے۔ ان لوگوں کے علاقوں میں آپریشنز نہیں تعلیم انصاف اور سہولیات کی ضرورت ہے۔

پچھلی دفعات کے برعکس حیرت انگیز طور پر مجھ سے کسی نے نہیں پوچھا کہ صدر نے یہ کیا کیا۔ اس کی وجہ یہ نہیں کہ یہ لوگ عادی ہو گئے ہیں۔ امریکی ہمارے برعکس بے حس لوگ نہیں۔ ہم لوگ بے حس ہیں کہ جو مرضی ہو جائے فرق ہی نہیں پڑتا ہمیں۔ اس دفعہ سب نے مجھ سے اظہار افسوس کیا۔ صدر پاکستان اگر دنیا افسوس کر رہی ہے تو آپ کیا کر رہے ہیں؟

اپنے گھروں کی روشنی رات کو الیکشن کے دوران گل رکھیں خاص طور پر حکومتی پارٹیوں کے علاقے کے دورے کے دوران، یہ خاموش احتجاج ان کو اپنی مقبولیت دیکھا دے گا۔ ویسے بھی صدر پاکستان اور حواریوں کو ووٹ چاہئے اور تہذیب یافتہ معاشرے میں ہی بتی گل ہونے پر بیل نہیں بجائی جاتی لیکن بے ضمیروں کے لئے خون پسینے کی کمائی جلانا کہاں کا انصاف ہے؟

Popularity: 15% [?]