بدتمیز

نااہل اشخاص کو دنیا بھی میں مراتب اور منصب عطا ہوتے ہیں۔ صدر بش سے لے کر صدر پاکستان تک سب اس قول کے ثبوت ہیں۔ خود میری مثال سامنے ہے۔ جس قدر نااہلیت مجھ میں ہے کسی میں کم ہی ہو گی۔ لیکن پھر بھی قدیر صاحب مجھے وڈا گردانتے ہیں اور محب علوی کو غلط فہمی ہے کہ میں کسی قسم کی فہم و فراست لئے ہوئے ہوں۔ حالانکہ سچ تو یہ ہے کہ ان دونوں سے  میری دور کی بھی سلام دعا نہیں۔

اردو ٹیک پر بلاگ بنانے کی ذمہ داری میں نے اس شوق میں اٹھائی تھی کہ کچھ کوالٹی بلاگ حاصل ہوں (اور مجھے بہت خوشی ہوتی ہے چند ایک نئے بلاگز پر پوسٹس دیکھ کر۔) لیکن میری پروگرامنگ اتنی ہی ہے جتنی ایک شیر خوار بچے کی بولنے کی اہلیت۔ لہذا اب ایک بلاگ خراب ہو تو تب دوسرا۔ کوئی کہے بھیا ہیکرز کا کارنامہ ہے تو کوئی کہے جب انتظامیہ کے بلاگ محفوظ نہیں ہیکرز سے تو عام بلاگر کے کیا ہونگے۔ میں ہنسو اور حیران ہوں کہ ہر بات ہیکرز کے سر کیوں ڈالی جاتی ہے جیسے ہر مسئلہ کی تان امریکہ پر ٹوٹتی ہے۔

صرف وہ بلاگ خراب ہونے کی سعادت حاصل کئے ہیں جو کہ ورڈ پریس 2.3 پر بنے تھے۔ اس سے پہلے بننے والے بالکل صحیح کام کر رہے تھے۔ لہذا یہ ورڈ پریس کا مسئلہ تھا جیسے سائن ان نہ ہونا وغیرہ نا کہ ہیکرز کا کمال یا پھر کوئی اور وجہ۔

مجھے اس سارے کام میں بہت سے لوگوں کا تعاون حاصل رہا ہے۔ لہذا کام وہ کرتے ہیں اور نام میرا بنتا ہے۔ ورنہ تو مجھے آتا جاتا کچھ نہیں۔ اب اگر اس وضاحت کے باوجود بھی کسی کو میرا یقین نہیں اور شبہ ہو کہ مجھے کچھ آتا جاتا ہے اور ٹیسٹ کرنا چاہے تو میرا بھرم قائم رکھنے کے لئے دو تین کام کریں۔

اول اور اہم ترین پہلے تو خود ہی کوئی دو چار ہاتھ پاؤں مار لیں کہ مسئلہ بس تقریبا حل ہوا ہو اور میں دیکھ کر ہی نمبر بنا لوں۔

دوم ضرور ضرور ضرور بتائیں کہ آپ نے آخری دفعہ کیا کیا تھا جو یہ مسئلہ ہوا۔ جیسے پلگ ان ایکٹیویٹ کیا تھا یا تھیم میں کچھ کوڈ شامل کیا تھا وغیرہ وغیرہ۔

تیسرے۔ اپنی لاگن انفارمیشن بھیجیں کیونکہ اس کے بغیر میں کوڈ شامل یا ردو و بدل نہیں کر سکتا۔

ایک اہم بات کہ بلاگ سے چھیڑ چھاڑ کرنے کی بجائے ایک ٹیسٹ بلاگ بنا لیں۔ اور اس پر سارے کام سیکھیں۔ اپنے بلاگ کو آفیشل رہنے دیں۔ یہ آپ لوکل سرور پر بھی انسٹال کر سکتے ہیں۔ اور پلگ انز انسٹال کرنے سے پہلے اس کے آفیشل صفحہ پر جا کر دیکھیں کہ آیا وہ ورڈ پریس کے ورژن سے کمپیٹیبل ہے بھی کہ نہیں۔

بلاگز، تمام بلاگرز کی ذاتیات میں شامل ہیں۔ اور میں کسی کی ذاتیات میں مداخلت نہیں کرتا۔ اور مصروف اتنا ہوتا ہوں کہ کسی کے بلاگ پر ادھر ادھر تانکا جھانکی کی فرصت نہیں ہوتی۔ لہذا اگر کوئی غلط فہمی ہے کہ بلاگز کو ایڈمن چیک کر سکتے ہیں تو دل سے نکال باہر کریں۔ بلاگز صرف میں ایڈمن کرتا ہوں اور مجھے ایسی کوئی عادت نہیں۔

ابھی میں نے ایک بلاگ ٹھیک کیا ہے۔ اس کے علاوہ بھی کسی کے بلاگ میں مسئلہ ہے یا کسی کو کوئی شکائیت ہے تو فوری رابطہ کرے۔ میں ذاتیات سے بالاتر ہوں اور اگر ماضی میں کچھ تلخ کلامی ہوئی ہے یا آئندہ کہیں ہو گی تو اس کا بدلہ اوچھے ہتھکنڈوں سے لینا میری فطرت نہیں۔ جیسے میں نے کہیں ظفر احمد کا لکھا پڑھا کہ اس نے بلاگ اس لئے نہیں لکھا کہ اس کو لگا کہ اس کا بلاگ ڈیلیٹ کر دیا گیا ہے یا نامعلوم کیا اگر ان کو یا کسی کو کوئی شکائیت ہے تو براہ کرم ڈائریکٹ رابطہ کریں تھرڈ پرسن ڈالنے سے غلط فہمی بھی پیدا ہوتی ہے اور دیر بھی لگتی ہے۔ ظفر احمد نے جو تعارف لکھا تھا وہ ظاہر کرتا ہے کہ وہ اچھے بلاگر ثابت ہونگے۔ اگر وہ مطمئن نہیں تو عبید الرحمن ایمیسن پر شائد بلاگ فراہم کر رہے ہیں۔

رابطہ کے لئے میرا ای میل ایڈریس ہے thegame[at]live.com یہ میرا ہاٹ میل کا ایڈریس ہے اور ایم ایس این میسینجر تقریبا ہر وقت ہی آن رہتا ہے۔ میل کر سکتے ہیں یا ایڈ کر سکتے ہیں۔ قدیر کی طرح جواب نہ ملنے پر چراغ پا مت ہوں اگر جواب نہیں دے رہا ہوں تو یقینی طور پر میں سیٹ پر نہیں ورنہ مصروف بھی ہوں تب بھی بتا دیتا ہوں۔

چند ایک سوالات جو مجھے نہیں پسند لیکن پھر بھی آپ پوچھیں بنا نہیں رہیں گیں لہذا پیشگی بتا رہا ہوں پوچھنے پر بھی یہی جوابات ملیں گیں۔ فارغ وقت میں پوچھ کر ہم دونوں اپنا وقت برباد کر سکتےہیں۔

نام؟

بدتمیز۔

نہیں اصل نام کیا ہے؟

اصلی تے وڈا بدتمیز۔

شادی ہو گئی؟

جی نہیں۔

اچھا بچے کتنے ہیں؟

تین درجن۔

میں سب سے زیادہ ایم ایس این میسینجر کو پسند کرتا ہوں۔ یاہو سخت ناپسند ہے لیکن مجبوری کے تحت رکھا ہوا ہے۔ گوگل ٹالک کو جھنڈی دیکھائی ہوئی ہے۔ لہذا ایم ایس این انسٹال کریں اور مائیکروسافٹ کو شکریہ کا موقع دیں۔

Popularity: 19%