o_O بدتمیز

میں جس علاقے میں رہتا ہوں اس کو tri-cities کہتے ہیں۔ وجہ ہے کہ تین شہر بہت قریب قریب اور بالکل جڑے ہوئے ہیں۔ ان میں میرے شہر کا تو آپ کو علم ہے۔ اس کے پڑوس میں ہیں hopewell اور petersurg۔

اس علاقے میں کچھ عرصے سے بہت ترقیاتی کام ہو رہا ہے۔ اس کی وجہ یہ ہے کہ یہاں فورٹ لی واقع ہے۔ فورٹ لی میں اس وقت اس کی expansion کے لئے بڑے پیمانے پر کنسٹرکشن کا کام ہو رہا ہے۔ جو کہ 2009 تک مکمل ہو گا۔ کسی اور جگہ سے فوجی بیس بند کر کے اس کو یہاں شفٹ کیا جا رہا ہے۔ اس لئے یہاں کی آبادی وغیرہ میں بہت اضافہ متوقع ہے۔

اس وجہ سے کمپنیاں بھی ادھر کا رخ کر رہی ہیں اور تینوں شہری حکومتیں بھی پورا زور لگا رہی ہیں کہ نئے لوگوں کا سب سے زیادہ فائدہ ان کو ہو۔ اس لئے petersburg کی افریقن امریکن آبادی نے شکائیت کی کہ ان کے کاروبار کو خاص طور پر نشانہ بنایا جا رہا ہے تا کہ یہ ان سے چھن جائے اور وہ یہاں سے نکل جائیں۔ اس پر احتجاج کی کال آرگنائزیشن کی صدر نے دی۔ سٹی ہال یا عدالت کے باہر وہ اپنے احتجاج ریکارڈ کروا رہی تھیں۔ ان کے ساتھ ان کے بچے بھی شامل تھے۔ جی ہاں بچے۔ ان کے ہاتھوں میں بھی مختلف پلے کارڈز تھے۔ یہ سب جاری تھا کہ ایک شخص آیا اور اس نے ان کے ایک بیٹے پر حملہ کر دیا۔ اس کو مار پیٹ کر فرار ہو گیا۔ کچھ ہی گھنٹوں میں پکڑا گیا۔

اب ادھر hopewell میں کچھ عرصے سے ایک کمپنی ایتھانول کا پلانٹ لگانا چاہتی ہے۔ ایتھانول ایک نئی شے ہے جو کہ کارن سے بنائی جا رہی ہے۔ اس کا فائدہ کسان کو ہوتا ہے یا پھر ماحول کو کہ گلوبل وارمنگ سر پر ہے اور اس کا نقصان ہوتا ہے گاڑی مالکان کو کہ اس کے ساتھ ملا تیل جلدی جلدی جلتا ہے۔ یعنی کم milage۔ اب اس پلانٹ کے لگنے پر چند لوگوں کے کچھ سیفٹی ایشو تھے۔ اس پر کچھ عرصے سے احتجاج جاری تھا لیکن بالآخر یہ منظور کر لیا گیا ہے۔ اس کا پبلک اعلان سٹی ہال کے سامنے ہوا۔ اس کی سب سے پرزور تائید کرنے والی کونسل ویمن بھی وہیں تھیں اور ان کے ساتھ ان کے بچے بھی تھے جو کہ اس پلانٹ کو ویلکم کرنے کے لئے موجود تھے۔ جی ہاں ان کے بچے۔

ہمارے کسی بھی سیاستدان کو دیکھ لیں اس کے بچے باہر ہونگے۔ معمولی ایم این اے ایم پی اے سے لے کر صدر پاکستان کے بچے بیرون ملک ہونگے۔ ہمارے یہ قومی رہنما شیو بڑھا کر قوم کے بچے امریکہ کے جہاد کے لئے استعمال کرتے ہیں اور کچھ دوپٹے لے کر اپنے آگے مروا کر خود دوسری گاڑی میں بیٹھ کر “فرار” ہو جاتی ہے۔

ان لوگوں کے بچے سب محفوظ جگہوں پر ہوتے ہیں۔ جہاں ان لوگوں کو خطرہ ہوتا ہے یہ وہاں جاتے نہیں اور جہاں خطرہ نہیں ہوتا یہ وہاں بلٹ پروف گلاس میں گھستے نہیں۔

نواز شریف کا میں کبھی بھی فین نہیں رہا۔ اس کی حکومت مجھے صرف شہباز شریف کی وجہ سے پسند تھی۔ شہباز شریف کے دور حکومت میں میرے سبھی جاننے والے پولیس انسپکٹر کام پر لگے ہوئے تھے۔ سبھی جاننے والے سرکاری اہلکار جو صبح دس بجے حاضری لگا کر واپس گھر پہنچ جاتے تھے شام ڈھلے تک دفتر بیٹھنے لگے تھے اس کے دور میں “دیسی صاحب” کی ساری اکڑ نکل چکی تھی۔ لاہورئیوں نے رات کے 2 بجے اس کو طوفان میں اپنی نگرانی میں کام کرواتے دیکھا تھا۔

بینظیر اگر دھماکوں کے بعد وہی رہتی تو شائد کچھ ہیرو بنتی لیکن اس طرح دم دبا کر فرار ہونے پر کیا کہا جا سکتا ہے؟ اس طرح بعد میں تو صدر پاکستان بھی زخمیوں کی عیادت فرماتے رہتے ہیں۔

اخبار کے مطابق بی بی نے بلٹ پروف گلاس کے پیچھے جانے سے انکار کر دیا۔ تو پھر اس خبر کو کیا کہوں کے کچھ دیر پہلے وہ نیچے چلی گئی تھی؟ اتفاق؟ پہلے ہیرو بنی رہی اور جب وقت آیا تو نیچے۔

اور یہ کتنی ہنسی والی بات ہے کہ اگر آرمرڈ ٹرک بنوانا پڑا اور بلٹ پروف گلاس بھی لانا پڑا تو کیا حالات کو نارمل کہا جا سکتا ہے؟ اگر حالات نارمل نہیں تو پھر آپ کس کی جان سے کھیلنے کی کوشش کر رہے ہیں؟ لوگوں کی ہی نہ۔

جلسے ریلیاں لیڈران کے خطابات جمہوری معاشروں کے لئے بہت ضروری ہیں۔ لیکن اس کے طریقہ کار سے دنیا کے آدھے سے زیادہ ممالک متفق نہ ہونگے۔ کسی ملک کا صدر یا حزب اختلاف کا صدر ایسی ریلیوں کی لیڈ نہیں کرتا۔ نہ یہ لوگ اپنے لئے لاکھوں کا مجمع کہہ  کر آرمرڈ ٹرک بنواتے ہیں نہ یہ سیکیورٹی رسک کہہ کر بلٹ پروف گلاس کے کیبن سجاتے ہیں نہ یہ سب خطاب کے لئے کھلے جلسے جن کا مقصدر رائے عامہ بنانے کے بجائے صرف طاقت کا اظہار ہوتا ہے منعقد کرتے ہیں۔ شہر شہر گھوما صرف ایڈوانی تھا اور اس کا انجام جو تباہی اور بربادی ہوا اس کو سبھی جانتے ہیں۔

امریکہ کہتا ہے کہ بینظیر جن خطوط پر کہتی ہے ان پر تفتیش کی جائے۔ یہ کچھ حیران کن بات نہیں؟

پاکستان میں جس پر شک کیا جائے اس کو پولیس مار مار کر ملزم سے مجرم بنا دیتی ہے۔ مہذب ملکوں میں جس کو کسی واقعے سے فائدہ ہو اس کی سب سے زیادہ تفتیش ہوتی ہے اور زیادہ تر کیسوں میں وہی مجرم نکلتا ہے۔

اگر بینظیر ایک عام گاڑی میں اس جلسہ کی لیڈ کر رہی ہوتی تو کیا یہ دھماکہ ہوتا؟ اس پر ایک سوالیہ نشان لگا کر چھوڑ دیتے ہیں۔ اس سوال کو گھما پھرا کر پوچھتے ہیں۔ اگر بےنظیر ایک عام گاڑی پر ہوتی تو کیا وہ یہ ریلی لیڈ کرتی؟ اگر ان کے بچے بھی اس قافلے میں شامل ہوتے تب؟

میں بینظیر کے قتل کے حق میں بالکل نہیں۔ ان کے اقدامات اور بیانات قابل نفرت ہیں لیکن بہر حال جمہوری عمل کے لئے پاکستان کے شخصیت پرستی والے معاشرے میں وہ ناگزیر ہیں یہ اور بات ہے کہ ان کے کرتوت جان کے نذرانے پیش کرنے والوں کو پتہ نہیں اور جن کو پتہ ہے وہ شخصیت پرستی میں گوڈے گوڈے دھنسے ہیں۔ ان کا قتل پاکستان کو ون مین شو میں دھکیل دے گا لیکن جیسے بینظیر ایک ڈیل کر کے تشریف لائیں ہیں اگر وہ جمہوریت سے زیادہ اس ڈیل کا احترام کرتی رہیں تو پھر جمہوریت تو نہیں چوں چوں کر مربہ ضرور پروان چڑھے گا۔