بدتمیز

امریکہ میں ایک سوال بہت عام ہے۔ where are you from? یعنی تم کہاں کے ہو؟ 911 کے بعد جب امریکہ محفوظ نہیں رہا اور مسلمانوں پر حملے ہوئے حتی کہ سکھوں کو بھی شبے میں گولیاں مار کر ہلاک کیا گیا تو سکھوں نے باقاعدہ ہر شہر کے کمیونٹی سینٹرز میں دیکھایا کہ ہم داڑھی رکھتے ہیں لیکن وہ کیا چیزیں ہیں جن سے ہم مسلمان نہیں بلکہ ان جیسے لگتے ہیں۔ اس عرصے میں دیسی لوگوں نے قاعدہ بنا لیا کہ پاکستانی کہنے کے بجائے کہنے لگے کہ ہم انڈین ہیں۔

میری چونکہ الٹی کھوپڑی ہے لہذا میں پوچھنے پر فٹ سچ بول دیتا کہ میں پاکستانی ہوں۔ حتی کہ ورجینیا ٹیک پر حملے والے دن بھی میں بڑھی ہوئی شیو کے ساتھ پھرتا رہا۔ جبکہ کچھ لوگ شیو کر کے ہی گھر سے نکلے۔ پھر لندن پر حملے کے بعد بھی میں بالکل نہیں ہچکچایا کہ میں پاکستانی ہوں۔ لیکن آج مجھے سمجھ نہیں لگ رہی کہ پاکستانی کی رٹ چھوڑ دوں کہ نہیں۔

Tri-cities کے لئے پچھلے 150 سالوں سے ایک اخبار نکلتا ہے progress index آج اس کے دوسرے صفحے پر پاکستان میں ہونے والے خود کش حملوں پر آدھے صفحے کی خبر ہے۔ پرسوں اس پر حکومتی حملے کی آدھے صفحے کی خبر تھی۔ یاد رہے کہ چیف جسٹس کے ساتھ ہونے والے سلوک کے بعد ، کراچی میں دہشت گردی کے مثال قائم ہو جانے کے بعد بھی چیف جسٹس کے بارے میں صرف 12 سطروں کی ایک چھوٹی سی خبر تیسرے صفحے پر چھپی تھی۔

اب میں نہیں کہہ سکتا کہ میں پاکستانی ہوں لوگ فورا سوچیں گے کہ اچھا یہ اس انتہا پسند قوم میں سے ہے جس کے حکمران گالیاں کھا کر بھی کرسی کی جان نہیں چھوڑتے۔ یہ اس قوم میں سے ہے جو اپنی عبادت گاہوں پر حملے کرتے ہیں۔ یہ اس قوم میں سے ہے جس کا کالا وزیر کہتا ہے “بابا سڑک پر ہی مرے ہیں نہ گھر میں تو نہیں مرے۔ باہر نکلے گے تو مرے گے نا” یا یہ اس وزیر کی قوم میں سے ہے جو کہتا ہے اللہ کا شکر ہے عوام ان خود کش حملوں میں سے نہیں مرے سیکیورٹی اہلکار مرے۔ جیسے ان اہلکاروں کے گھر والے عوام میں شامل نہیں۔ یا یہ اس وزیر کی قوم کا ہے جو کہتا ہے حکومت کی بڑی کامیابی ہے کہ خاموشی مچانے کے لئے کم سے کم ہلاکتیں ہوئیں۔

میں ایک چھوٹے سے اسٹیشن پر نیویارک جانے کے لئے بیٹھا ہوا ہوں تو بریکنگ نیوز ہے ییاں کے نیوز چینل کی کہ پاکستانی فوج نے مسجد پر دھاوا بول دیا۔ لوگوں کا رد عمل؟ “man they are stupid” اس پر حکومت بغلیں نہ بجائے۔ لوگوں کو پتہ ہے کہ مسجد پر قبضہ کرنے والی قوم بےوقوف ہے لیکن ان کا خیال ہے کہ اس مسجد پر حملہ کرنے والی فوج بےوقوف ترین ہے۔ وجہ؟ ان کو سمجھ نہیں لگتی کہ اس قدر اسلحہ کیوں داغا گیا؟

 صدر پاکستان کے پاس شائد باعزت واپسی کا دروازہ بند ہو چکا ہے۔ وہ عبدالرشید غازی کی جگہ پر پہنچ چکے ہیں جہاں سے واپسی کا راستہ صرف موت ہوتا ہے ورنہ ذلت کی زندگی۔ انسان نہ چاہتے ہوئے بھی موت ہی چنتا ہے۔ مجھے نہیں علم کہ صدر مشرف کو کس نے بے خبر رکھ کر ان سے باخبر ہونے کا دعویٰ کرایا لیکن شائد صدر مشرف کے پاس اب بہت سے لوگوں کے گناہ سمیٹنے کے سوا کوئی چارہ نہیں۔