o_O بدتمیز

چھوٹے ہوتے جب اسمبلی میں مس کوئی حدیث یا اسلامی بات سناتی تھی تو ایک حکم پر بڑا غصہ آیا کرتا تھا کہ بدلہ لینا اچھی بات نہیں بدلے کے بجائے معاف کردو۔ لیں جی یہ کیا بات ہوئی اگلا ظلم کرے تو ہم بدلہ بھی نہیں لیں؟ اچھا چلو بدلہ لے لو لیکن جتنا تمکو نقصان ہوا اتنا اس سے زیادہ ظلم ہے۔ اور ہم لوگ ہر کام میں ظالم ہیں۔ جب تک ہمارا گوڈا اگلے کے گوڈے پر چڑھ نہ جائے ہماری بس نہیں ہوتی۔ ہمارے معاشرے میں سے سب کچھ چھوڑ کر صرف ظلم ختم کر دیا جائے تو باقی سب ٹھیک ہو جائے۔ جب انصاف ہو تو ظلم کوئی کر نہ سکے۔

پھر مجھے صدقہ دینے کی کبھی سمجھ نہ لگی۔ اچھا چلو ٹھیک ہے صدقہ سمجھ میں آتا ہے۔ کالے ماش، کالی مرغی۔ فلاں دن۔ یا اتنے روپے یا اتنی تعداد میں انڈے۔ میں اس کے جھانسے میں نہیں آیا میرا خیال تھا کہ قربانی سے drive کی ہوئی چیزیں ہیں۔ اللہ نے تو کہا ہو گا کہ صدق دو اب اس میں رنگ شامل کر کے بہت کچھ شامل کر لیا گیا۔ قربانی کا بھی میں کہتا تھا کہ آپ کی نمود و نمائش ہو گئی اور کوئی معصوم جان سے گیا۔ بدقسمتی سے مجھے ابھی تک علم نہیں کہ قربانی کے جانور کے خون کا بہانا اللہ کو کیوں محبوب ہے؟

انسان کا exposure محدود ہے۔ جوں جوں یہ پڑھتا جاتا ہے یہ محدود ترین ہوتا جاتا ہے۔ اس کی مثال کچھ یوں ہے  کہ بچے جب ٹرین میں بیٹھتے ہیں تو یہ اچک اچک کر کھڑکی سے باہر دیکھتے ہیں جب بڑے ہوتے جاتے ہیں تو اگر تو پڑھ لکھ جائیں تو اکڑی گردن سے دور سے دیکھ رہے ہوتے ہیں باہر کا نظارہ یعنی exposure محدود ہو گیا اور اگر پڑھے لکھے نہیں یا میری طرح کے پڑھے لکھے جاہل ہیں تو اسی طرح اچک اچک کر باہر دیکھتے ہیں نتیجتا ان کا exposure ذرا زیادہ ہوتا ہے۔

 اب میں نے قربانی کا قصہ اپنے خاندان میں نمود و نمائش دیکھا ہے۔ لہذا اس غریب کا خون اللہ کو کیسے محبوب ہو سکتا ہے؟ “نہیں میں نہیں مانتی انہوں نے چار لئے ہیں تو ہم نے بھی چار کرنے ہیں” اب چار کے چکر میں آپ کا میاں عید کی نماز بھی نہیں پڑھ کے آیا گھر بیٹھا قصاب کا انتظار کرتا رہا اور تنگ آ کر شام کو ایک بچے کو پکڑ کر خود ہی سب کر لئے۔ (شکر ہے میرے خاندان والوں کو میرے بلاگ کا نہیں پتا ) اس لئے مجھے اس سے کچھ خاص الفت نہیں اگر مجھے ایسا کرنا پڑا تو میں ساری رقم نقد کسی کو دے دونگا۔

جامعہ حفصہ نے جو کچھ کیا وہ کل تک جرم تھا۔ آج وہی سب کچھ بہادری کی داستانیں بن گئیں۔ کل تک وہ اسلام کی شدت پسند شاخ تھی آج اس کی تعریفیں ہو رہی ہیں۔ ہم وہ قوم ہیں جو زلزلے کو اللہ کا عذاب کہتے ہیں اور مرنے والوں کو شہید :p مجھے کوئی سمجھا دے عذاب میں مرنے والے شہید کب سے ہونے لگے؟ پھر میں قوم لوط، عاد و ثمود کو کیا کہوں؟

انصاف کا تقاضہ ہے تو جامعہ حفصہ پر ایسے چڑھائی کو ہضم کر بھی لیں اگر ایسی ہی ایک چڑھائی کر کے 12 مئی کا گند بھی صاف کر دیا جاتا۔ میں نے 12 مئی کی ویڈیوز 12 جولائی کو دیکھیں ایسی خوفناک ویڈیوز۔ اس کے بعد میرا دل چاہتا ہے کہ الطاف حسین کے اسٹائل میں حکومت سے پوچھوں کہ “یہ کیا کر رہی ہے حکومت” سب سے مزے کی بات حکومت کو شہہ دینے والے جامعہ حفصہ سے حد درجہ الرجک کالم نگار بھی کراچی سے دھمکیوں پر ایک آدھ کالم حمائیت میں لکھ مارتے ہیں جس سے ان کا خوف صاف جھلکتا نظر آتا ہے۔ لیکن جامعہ حفصہ پر وہ کوئی مہذب انداز اختیار کرتے ہوئے گھبراتے تھے۔

جامعہ کے اندر موجود لوگوں کا جیسے صفایا کیا گیا اور جیسے ان کو دفنایا گیا اور جیسے صدر پاکستان نے ٹی وی پر کہا کہ باہر آ جائیں نہیں تو مارے جائیں گیں۔ اس سب کے بعد جامعہ تو ہیرو بن گیا۔ ولن بنے ہمارے صدر۔ غازی صاحب کی والدہ کی جلی ہوئی لاش ملی اس کو ہائی لائٹ کیا گیا۔ ہمارے معاشرے کا مہذب طبقہ عورتوں پر ہاتھ اٹھانے والے کو ظالم سمجھتا ہے۔ اب کل تک جو جامعہ کے اقدامات کو approve نہیں کرتے تھے ان خواتین کی لاشوں کو دیکھ کر حکومت کے خلاف ہیں۔ صدر مشرف انصاف کرنے سے حد درجہ قاصر رہے ہیں۔

ہم صدر مشرف صدر مشرف کا ورد کرتے رہتے ہیں۔ صدر مشرف کم از کم چالاکیاں نہیں لگاتے ورنہ سبھی لوگ دبے لفظوں میں کہتے ہیں کہ بے نظیر جو کہ واقعی بے نظیر ہی ہے اور فضل الرحمان بندے دے پتر ہوتے تو صدر مشرف کبھی بھی صدر مشرف نہ رہ سکتے۔

اس چار دیواری کے اندر موجود لوگ تو آگے ہی اپنے خاندانوں کے لئے ایک طرح سے مرے ہوئے تھے۔ نہ یہ کچھ کما کر بھیجتے تھے نہ ساتھ رہتے تھے۔ صرف اللہ اللہ کرتے تھے یا دو چار دھمکیاں لگاتے تھے۔ پستول پکڑ کر گھومتے تھے۔ ایک جگہ بند تھے۔ اب یہ سارے ملک میں پھیل جائیں گے۔ انصاف آگے ہی عنقا ہے۔ اب موقع پر انصاف کی روایت پڑ جائے گی۔ جہاں کچھ ہوا پستول نکالا دو فائر اور پرچہ داخل دفتر۔ نام ہو گا اسلامی انتہا پسند۔ جیو جیسے گھٹیا ادارے اس کو خوب اچھالیں گیں۔

ٹی وی پر مذاکرات ہو رہے ہیں غازی صاحب سے۔ پھر بغل بجائی جا رہی ہے کہ ایک کوشش کی امن کی۔ مذاکرات کبھی بھی ایسے نہیں ہوتے۔ بند کمرے میں انسان مان جاتا ہے جب دیکھتا ہے کہ اتنے لوگ دیکھ رہے ہیں تو اس کو جوش آ جاتا ہے کہ اب نہیں جھکنا ورنہ ساری زندگی سر اٹھا کر نہیں جی سکوں گا۔ لہذا میرے نزدیک ڈاکٹر شاہد مسعود کا لائیو بات چیت کی کوشش اگر ان کی اپنی کوشش تھی تو ان سے ایسی بےوقوفی کی توقع نہیں اور جیو کی پالیسی تھی تو گھٹیا ترین حرکت تھی۔

برقعہ، مساج، آنٹی شمیم سب ہوا ہوئے۔ پیچھے بچا ہے ایک کھنڈر جس کو گرا کر اتوار بازار کے لئے جگہ پیدا کرنی ہے لیکن کیا اس انسانی خون اور گوشت کے صدقہ کا رنگ آئے گا؟ اس ضیافت اڑانے کے بعد ملک سکھ چین سے سو سکے گا؟ نہیں میرے خیال سے اب یہ پھیل جائے گا۔ اب یہ جگہ جگہ پیدا ہونگے۔