بدتمیز

Phd ایک ایسی بلا جسکو چمڑتی ہے اس کے عزیزوں اقارب کو بھگتنی پڑتی ہے۔ میرا خاندان اس معاملے میں خود کفیل ہے اور اس قدر ہے کہ میں سوچ رہا ہوں ان کی ایکسپورٹ شروع کر دوں۔ ننھیال میں تو میں وہ واحد معصوم ہوں جو بیچلرز ہے۔۔ مجھے تو شبہ ہے کہ ان لوگوں کے نوکر  بھی پوسٹ گریجویٹ ہیں۔ ابھی بھی پچھلے ہفتے میرے ایک بھائی لندن تشریفے لے گئے ہیں پی ایچ ڈی کرنے۔  ماسٹرز تو اس قدر لوگوں نے کیا ہوا کہ صوفہ بھی اٹھائیں تو نیچے سے کوئی نہ کوئی ڈگری برآمد ہو جاتی ہے۔ میرے بارے میں شبہ ہے کہ میری ڈگری امریکی پولیس جاری کرے گی کہ بھیا کیمرے سے تصویریں کیوں لیتے ہو؟ اور میں جواب میں پوچھونگا کہ اس کو دوربین کے طور پر استعمال کروں؟

میرے دودھیال میں اصلی تے وڈے والی قسم کے پی ایچ ڈی ہیں یعنی وہ لوگ جنہوں نے دھوپ میں بال سفید نہیں کئے۔ یہ خضاب کیوں استعمال کرتے ہیں وہ الگ کہانی ہے۔ کم تعلیم (بیچلرز) کے ساتھ جو رتبہ انہوں نے حاصل کر لیا وہ کم لوگوں کو نصیب ہوتا ہے۔ ایسے لوگوں کے درمیان گھر کر آپ کیا محسوس کرتے ہیں؟ بڑی دل جلانے والی کہانی ہے۔ ایسے لوگوں کے نزدیک آپ بےوقوف جہاں کے ہوتے ہیں (وہ تو باقیوں کے نزدیک بھی ہوتے ہیں لیکن ان کے نزدیک خاص طور پر ہوتے ہیں) لہذا یہ آپ کو کافی کچھ سمجھانے کے موڈ میں رہتے ہیں اور آپ کے تیور کو اکثر الزام دیتے ہیں کہ تمکو بتانا تھا لیکن بتا نہ سکے۔

بچپن میں جب ابھی اتنے پی ایچ ڈی، ڈاکٹر اور انجئنیر نمودار نہیں تھے اور لے دے کر صرف ایک ڈاکٹر ایک پی ایچ ڈی اور دو انجئنئیر تھے تب میری شامت آنے پر ان کے قصے اور مجھ سے بندھی امیدوں پر بھی لیکچر ملا کرتا تھا۔ میری ذہانت کے جو الٹے جھنڈے گڑے ہوئے تھے اس کے باعث خصوصی شفقت کا سلسلہ چاروں طرف سے جاری رہتا تھا۔ جس کسی کا فون آتا وہ مجھ سے زیادہ میری پڑھائی کے بارے میں جاننے کا متمنی رہتا۔ لہذا امی نے شروع میں بڑی محنت کرائی۔ بہاولپور میں تو خالہ جمعہ والے دن بھی چھٹی نہیں ہونتے دیتی تھیں۔ اس دن بھی پڑھائی۔ اور تو اور گرمیوں کی چھٹیاں سب نہا دھو ادھر ادھر پھر رہے ہیں اور مجھ معصوم کو پہاڑے یاد کرانے پر لگایا ہوا ہوتا تھا۔ معصومیت کی حد کہ اگر خالہ نے ایک جگہ بیٹھایا ہے اور میں تھک گیا ہوں تو ڈر کے مارے اتنی ہمت نہیں ہوتی تھی کہ اٹھ کر کسی دوسری جگہ بیٹھ جاؤ۔ (پہاڑے آج تک یاد نہیں ہوئے )

ٹین ایج میں جب اعلی تعلیم یافتہ پوری کھیپ وجود میں آ گئی جس میں کم سے کم بھی فرسٹ ڈویژن ایم ایس سی ماسٹرز ان فزکس یا کیمسٹری والے تھے تب بھی میری حرکات نہ سدھر سکیں۔ میں نے تب مشغلہ بنا لیا کہ جہاں میری بات کی نفی کی گئی فوری طور پر کسی پی ایچ ڈی سے باندھ دی اور لوگوں کی مخالفت میں کمی یا ہچکچاہٹ سے لطف اندوز ہوا۔

جی ہاں پی ایچ ڈی آپ کی ہر بات کو سند کا درجہ عطا کرتی ہے۔ یہ ہمارے معاشرے کا (میرے خیال سے میرے خاندان کا) المیہ و لمحہ فکریہ ہے۔ پی ایچ ڈی کو عام طور پر ہر معاملے میں پرفیکٹ سمجھ لیا جاتا ہے جبکہ یہ صرف مخصوص موضوع پر پرفیکٹ ہو سکتے ہیں ضروری نہیں کہ باقی پر بھی ان کی رائے اہم یا صیح ہو۔ جیسے ایک جاہل شخص بھی کسی معاملے پر اعلی تعلیم یافتہ سے بہتر رائے اور اپروچ رکھ سکتا ہے۔

جیسے پاکستان میں گردے نکالنے کا جرم اس قدر عام ہے کہ ہم لوگوں میں سے احساس ہی ختم ہو گیا ہے اور ایسی خبر پر ہم کچھ نہیں کرتے۔ یا سوچتے۔ جون 2006 میں میں نے اپنے ماموں (پی ایچ ڈی ان کیمسٹری) کو کہا کہ پاکستان میں یہ ہوتا ہے انہوں نے میری بات کا یقین نہیں کیا۔ جیو پر اسی ہفتے ایک گروہ کے پکڑے جانے پر مجھے کہتے اچھا تم صیح کہہ رہے تھے۔ قصور ان کا بھی نہیں اس قدر رحمدل شخص جو کسی کو تکلیف نہ دے اور نہ کبھی کسی سے انشورنس کلیم کرے راتوں کو سنسان سڑک پر گاڑی روک کر کچھوے کو اٹھا کر سائیڈ پر کرے وہ کیسے سوچ سکتا ہے کہ ہم گندگی کے کس ڈھیر میں زندہ ہیں۔

ایسے ہی ایک صاحب (ایک ڈاکٹر) کو میں نے کہا کہ ورجینیا میں پیرنٹس گھر پر اپنے 21 سال سے کم عمر بچوں کو الکوحل دے سکتے ہیں۔ پابندی ان کے خریدنے پر ہے۔ وہ نہ مانے۔ (میں ان سے سائنسی وجہ پوچھ رہا تھا کہ کیا وجہ ہے کہ چھوٹی عمر کے لوگوں کے لئے یہ زیادہ نقصان دہ ہے؟)

پی ایچ ڈی کی تین بڑی نشانیاں ہیں۔ ایک ان کی شرافت (جس کو عقلمند ان کی معاملہ فہمی اور مجھ جیسے جاہل بزدلی سمجھتے ہیں) ان کا کسی بھی معاملے پر میں نہ مانو والا روئیہ (جو کہ عام طور پر چھوٹوں یا کم علم لوگوں کی طرف) اور ان کا کسی بھی چیز کے لئے arial view جیسے پاکستان میں عام طور پر قاعدہ ہے کہ تھوڑا اس پلڑے میں تو تھوڑا اس پلڑے میں۔ یعنی کوئی نہ کوئی سائیڈ ضرور لینی ہے۔ یہ فضائی جائزے پیش کرنے کے شوقین ہوتے ہیں اور کسی طرف مکمل سائیڈ نہیں لیتے۔ نیوٹرل قسم کے بندے ہوتے ہیں۔

چلیں میرے حق میں دعا کریں کہ میری باقی ماندہ زندگی ان اعلی تعلیم یافتہ خواتین و حضرات میں بخیر و عافیت گزر جائے اور میرے بیچلرز کی طرف ان کا دھیان نہ جائے۔ میں جب تک ان کو سمجھاؤں کہ ضروری نہیں تم پی ایچ ڈی ہو تو تمہاری سوچ بھی پرفیکٹ ہے۔

Popularity: 19%