o_O بدتمیز

بل پڑھ کر یہ مت سمجھیں کہ میں امیگریشن بل پر کوئی اپ ڈیٹ دینے لگا ہوں۔ حالانکہ اس کے پوائنٹ سسٹم پر بات کرنا رہ گئی ہے۔ نہ میں صدر کلنٹن کے بارے میں رتب اللسان ہونے لگا ہوں۔ یہ بل وہ ہیں جو پاکستان میں “تراہ” نکال دیتے ہیں۔ چاہے بجلی 24 میں سے 25 گھنٹے لوڈ شیڈنگ کے نام پر غائب ہو لیکن بل ایسے آتا ہے جیسے سارا دن اور ساری رات 1000 واٹ کے بلب جلائے گئے ہیں۔

پاکستان میں ہماری امی کا قاعدہ تھا کہ بل یا بچوں کی پراگریس رپورٹ (ہماری کارگزاریاں) ابو کو آتے ساتھ ہی نہیں دیتی تھیں۔ آنے کے دو تین گھنٹے کے بعد ابو کو یہ ساری چیزیں دیکھائی جاتی تھیں۔ یہاں الٹ حساب ہے اول تو امی ڈاک دیکھتی نہیں اس وقت تک جب تک علم نہ ہو کہ پاکستان سے خط آ رہا ہے اور اگر دیکھ بھی لیں تو ساری کی ساری میری ٹیبل پر رکھ دیتی ہیں۔ یعنی اب ہم صبح بستر سے 10 بجے نکلے تو جا کر میل چیک کریں جو آنکھیں بندے نے نہیں بھی کھولنی ہوتی وہ بھی بل دیکھ کر کھل جاتی ہیں لہذا جس ہفتے بل نہ آئے وہ ہفتہ بڑا بے چین رہتا ہے۔ مجھے سب سے برا بل بجلی کا لگتا ہے کیونکہ گھر والوں کے مطابق جتنی بجلی میں استعمال کرتا ہوں وہ یہ سب مل کر کرتے ہیں۔ جیسے کمپیوٹر چلاتے وقت فل روشنی اور ساتھ میں ٹی وی خوامخواہ چلتا ہے۔ یا سردیوں میں ہم لاؤنج میں ہیٹر چلتا چھوڑ کر خود بستر میں گھس جاتے تھے یا نہانے گھسے اور اس کے دو گھنٹے بعد کوئی گیا تو معلوم ہوا کہ وہاں بھی میں ہیٹر چلتا چھوڑ آیا ہوں۔ ابھی بھی میں کچن تک پانی پینے جاتا ہوں اور واپسی پر پنکھا بند ہوتا ہے۔ گھر والوں کے مطابق گرم وقت میں گھر میں نہیں گزارتا ورنہ اے سی بھی چلا چکا ہوتا۔

پاکستان میں بجلی سے زیادہ ٹیلیفون کے بل نے تنگ کیا ہوا تھا۔ نیٹ کی وجہ سے ابا جان کا خیال تھا کہ لائن رینٹ نکال کر 700 میں سے باقی جتنا بل آتا ہے وہ سارا نیٹ کا ہے کالز تو جیسے کوئی کرتا نہیں تھا۔ لہذا ہمارے ابا جان کو یا تو آخری تاریخ پر یاد آتا تھا کہ بل جمع کرانا ہے یا پھر اس کے بعد لہذا بل ہمارے سر کر دیا جاتا تھا کہ تم چلاتے تو  جمع بھی کراؤ۔ مئ جون میں نہر کے کنارے بیٹھے سب پڑھ رہے ہیں ڈیڑھ گھنٹے بعد لیکچر لینا ہے اور آپ کو اس ٹھنڈک بھرے ماحول کو چھوڑ کر بل جمع کرانے جانا پڑتا ہے۔ لاہور کے رہنے والے مئی جون میں جب بل جمع کرانے قطار میں لگتے ہیں ان کو تو بخوبی علم ہو گا کہ کیا حال ہوتا ہے۔ ہماری قوم کو شروع سے ایسا ہر جگہ ذلیل کیا گیا ہے کہ قوم کو علم ہی نہیں ہوتا کہ جیا کیسے جاتا ہے۔ (جیا علی کے بارے میں سوچنے سے پرہیز کریں )

امریکہ میں کسی جگہ کوئی لمبی لمبی لائن نہیں لگتی۔ نہ جا کر جمع کرانا پڑتا ہے۔ ڈاک کے ذریعے بل گھر آ جاتا ہے۔ اسی میں ایک لفافہ ہوتا ہے آپ بل میں سے مطلوبہ حصہ الگ کریں اتنے ڈالر کا چیک لکھیں اور اس لفافے میں ڈال کر بھیج دیں بس آپ کا بل پے ہو گیا۔ جیسے شروع شروع میں میں نے ایسے ہی میل کرنا شروع کر دیا۔ لیکن اب کریڈٹ کارڈ پر سارے بل پے کر دیتا ہوں اور اس کے بعد آنلائن ہی بیٹھ کر کریڈٹ کارڈ بل بھی بینک سے پے کر دیتا ہوں۔ اللہ کا لاکھ لاکھ شکر ہے اس لائن سے نجات ملی۔ ویسے میرا خیال ہے کہ ابا جان کے ذمہ یہ ہو تو وہ یہاں بھی بل آخری تاریخ گزرنے کے بعد جمع کرانے کی سوچیں جبکہ میں نے کام یہ پکڑا ہوا کہ جس دن بل آتا ہے اس کے ایک گھنٹے کے اندر پے کر دیا جاتا ہے (ایک گھنٹے میں بندہ آنکھیں کھول کر منہ ہاتھ دھو لیتا ہے ) ویسے یہاں چونکہ ڈاک کے ذریعے پے کرنا ہوتا ہے لہذا کوشش کریں کہ due date سے 3 دن پہلے ہر حال میں اس کو پوسٹ کر دیں۔

امریکہ آنے سے پہلے میرے ذہن میں دو بڑی غلط فہمیاں تھیں کہ بجلی کے کھبمے کہیں نظر نہیں آئیں گے اور جس طرح پاکستان میں بل ریڈر ہوتے ہیں وہ یہاں پر نہیں ہونگے۔ جس طرح ٹیلیفون کا میٹر محکمہ کے پاس ہوتا ہے ویسے ہی ہو گا لیکن یہ بات غلط ہو گئی۔ بجلی کے کھمبے بھی تھے اور میٹر بھی۔ اور بہت وافر مقدار میں تھے۔ اب ہم انتظار میں بیٹھے کہ میٹر ریڈر دیکھیں کیا کرتا ہے اور کیسے۔

میٹر ریڈر صاحب ہر ماہ نہیں آتے نہ یہ آپ کے بیک یارڈ میں مٹر گشت کرتے ہیں۔ یہ گاڑی میں بیٹھے ہوتے ہیں اور گزرتے جاتے ہیں ان کی گاڑی میں لگے آلات خود ہی سب میٹروں سے گفت و شنید کر کے ریڈنگ نوٹ کرتے جاتے ہیں۔ نیچے کی دو تصاویر میں فاصلہ دیکھیں کہ سڑک سے میٹر تک کا کتنا فاصلہ ہے۔

اس کے بعد اگر یہ صاحب اپریل میں چکر لگا گئے ہیں تو بچت کی خاطر محکمہ ان کو مئی میں نہیں بھیجے گا بلکہ مئی کا بل ایوریج جو آپ استعمال کرتے ہیں وہ کیلکولیٹ کر کے بھیج دیا جاتا ہے۔ اب یہ دوبار جون کے لئے تشریف لائیں گے اور مئی کے بل میں جو جمع تفریق کرنی ہو گی وہ جون کے بل میں کر کے بھیج دیا جائے گا۔

جیسے آپ کا بل اپریل میں تو صیح تھا لیکن مئی میں ایوریج استعمال سے آپ نے 10 ڈالر زیادہ کی بجلی استعمال کی لیکن بل 10 ڈالر کم پے کیا لہذا اپریل اور جون کے درمیان میٹر کی ریڈنگ سے بل نکال کر مئی والی رقم نکال کر باقی بل جون کا بن جائے گا۔ (جیسے اس دفعہ میرا بجلی کا بل 77 ڈالر ہے جبکہ اس سے پچھلے دو ماہ میں نے 130 اور 110 دیا ہے۔ لہذا اگر یہ ایوریج بل ہے تو اگلے ماہ زیادہ آئے گا اور ہم یہ کہیں گیں کہ نہیں اے سی چلایا ہے اس لئے زیادہ آیا ہے)

بل نامہ سن لیا۔ میرے کمپیوٹر کی تصویروں میں جو cpu پر ایک pile سا نظر آ رہا ہے ہو پتہ ہے کیا ہے؟ ادا شدہ بل اور کیا؟

Popularity: 7% [?]