o_O بدتمیز

12 مئی کو جو ہوا اس پر بہت کچھ لکھا گیا ہے اور بہت کچھ لکھا جائے گا۔ کچھ نے بات مشرف پر ڈالی اور کچھ نے پولیس اور رینجرز پر۔ سب سے مزے کی بات کچھ لوگ اس پر ایم کیو ایم کو معصوم سمجھتے رہے۔ اگر میں کہہ دوں کہ سارا قصور ایم کیو ایم کا ہے تو بس وہی بات کہی جو سب نے کہی۔ لہذا یہاں تک پڑھ کر چلے جائیں تو کوئی مضائقہ نہیں۔

چرنوبل کا حادثہ شائد اپریل میں ہوا تھا۔ اس کی ویڈیو دیکھیں تو آپ کو کچھ جگہوں پر نظر آتا ہے کہ اس گند کو سمیٹنے کے لئے فوج کو کام کرنے کا حکم دیا گیا تھا۔ ابھی بھی کہیں کچھ ہو تو فوری طور پر بات فوج اور پولیس پر لگا دی جاتی ہے کہ پولیس کہاں تھی؟

پہلی بات تو یہ سمجھنے والی ہے کہ کیا فوج اور پولیس انسانوں میں سے نہیں یا ان پر گولیاں اثر نہیں کرتیں؟ یا ان کے خاندان نہیں ہیں؟ اگر یہ لوگ مر جائیں تو ان کے خاندانوں کا کیا حال ہو گا؟ کیا آپ کا خیال ہے کہ ان کے مرنے کے بعد ان کے گھرانے شریفانہ طور پر گزر بسر کر سکیں گیں۔

بی بی سی پر دیکھایا جا چکا ہے وہ آفیشل لیٹر جس میں ہدایت کی گئی تھی کہ پولیس کو لاٹھیوں کے سوا کوئی اسلحہ فراہم نہ کیا جائے۔ کیا لاٹھیوں سے جلوس قابو کئے جا سکتے ہیں؟ یا گولیاں روکی جا سکتی ہیں؟ ویسے اس لیٹر کے بعد نہ جانے کیوں برٹش حکومت کے جانے کا منظر یاد آ گیا جب ان کا چل چلاؤں تھا تو انہوں نے بھی ایسی حرکتیں کیں۔

صدر بلاشبہ بدترین حالات کا شکار ہیں۔ ان کی گرفت انتہائی کمزور ہو گئی ہے۔ تاریخ سے ناواقف صاحبان ایک ہاتھ سے ڈائپر سنبھالے دوسرے سے ہوا میں مکے لہرا لہرا کر کہہ رہے ہیں بس جنرل صاحب بس اب مزید مشرف گردی نہیں چلے گی۔ جو حال صدر ایوب کا خوش آمدی ٹولے نے کیا تھا وہی صدر مشرف کا ہوا ہے۔ ان کے خلاف جذباتی تقریریں کرنے والے صدر ضیا کے دور میں ڈائپر میں تھے لہذا ابھی تک وہیں ہیں۔ کیا صدر ضیا کے دور میں کوئی سڑک پر نکل کر ان کو گالیاں نکال سکتا تھا؟ کیا ان کے دور میں میڈیا کو چوں کرنے کی اجازت تھی؟ کیا ان کے زمانے میں ٹیلیویژن پر ان کے مخالف کچھ کہہ سکتے تھے؟

ذاتی طور پر میں صدر مشرف کو بنیادی طور پر ایک شریف شخص سمجھتا ہوں جس کے کندھے کو سبھی نے استعمال کیا ہے۔ یاد رہے کہ میں نے ان کے مختاراں مائی سے لے کر “banana state” اور پھر ایم کیو ایم کے بارے میں حالیہ بیان کہ یہ 13 ہزار لوگ اگر کراچی میں داخل ہو جاتے تو تاثر یہ جاتا کہ کراچی ایم کیو ایم کے ہاتھ سے نکل گیا ہے جیسے سبھی بیانات پڑھے اور سنے ہیں لیکن اس سب کے باوجود میرے خیال سے صدر مشرف کو ائیر کنڈیشنڈ کمروں میں بریفنگ دی جاتی ہے اور وہ اسی کو غنیمت سمجھتے ہیں یا سچ سمجھتے ہیں لہذا آج حالات ان کے قابو سے باہر ہیں۔ ویسے صدر صاحب اس ہفتے کے کیپیٹل ٹاک پروگرام میں دیکھیں کہ ایم کیو ایم کے رہنما نے جلوس کے لوگوں کی تعداد کتنے لاکھ بتائی ہے۔

صدر کی نیب کو استعمال کرنے سے لے کر بلوچستان اور پھر جسٹس سے لے کر اسلام سب سے مذاق ایک طرف میرے خیال سے ان کی سب سے مہنگی غلطی میڈیا کو آزادی دینی تھی۔ میڈیا کو آزادی کا ایسا نشہ چڑھا کہ اس کو بھول گیا کہ ملکی راز فاش کرنا میڈیا کی آزادی نہیں۔ کسی بھی تجزئیے والے پروگرام کو دیکھیں مثال کے طور پر ڈاکٹر شاہد مسعود کے میرے مطابق نام کے پروگرام کو تو اس میں اکثر کم ظرف لوگ دوسرے کو نیچا دیکھانے کے لئے انتہائی اہم باتیں کر جاتے ہیں۔ ویسے صدر نے کتاب میں کچھ لکھ دیا تو میڈیا بھی شیر ہو گیا کہ صدر ہیں تو ہم کیوں پیچھے رہیں۔

میرے خیال سے کراچی میں طاقت کے استعمال کی بات صدر کو نہیں علم تھی۔ یا ان کے علم میں نہیں تھا کہ کیا ہونا ہے۔ ابھی بھی صدر کو گھر سے بنا کر کر ویڈیوز فراہم کی گئی ہونگیں۔ یا کم از کم ایم کیو ایم سے ڈرایا گیا ہو گا۔ حسن بن صباح کا علاقہ کونسا تھا؟ میں آج کل نقشے پر تاریخی طور پر بھی غور کر رہا ہوں۔ جہاں تک مجھے علم ہے صدر عوام میں مقبولیت کا کچھ حصہ بحال کر لیتے اگر سنتے ساتھ ہی وہ فوری طور پر اسلام آباد کا جلسہ منسوخ کر دیتے اور خود کراچی چلے جاتے۔ اس سے لوگوں میں شہباز شریف کے زمانہ کی یاد تازہ ہو جاتی۔ صدر کو اسی دن نہیں تو کم از کم اگلے دن ضرور جانا چاہئے تھا۔ پہلے پہل صدر ق لیگ کی طاقت سمجھے جاتے تھے اب ایسا محسوس ہوا جیسے ق لیگ صدر کی طاقت بننے کی کوشش میں ہو۔

جامعہ حفصہ جو کر رہی ہے وہ کسی بھی صورت اسلام نہیں یا اس کی خدمت نہیں۔ جامعہ اگر مناسب سمجھے تو alternative بزنس دے کر ایسی چیزوں کو خود ختم کرنے کی دعوت دے جس کی نگرانی کر لے لیکن ملوث نہ ہو۔ عام لوگ اسلام کا نام استعمال ہوتے دیکھ کر اس کو اسلامی سمجھتے ہیں اور جذباتی لوگ اس کے خلاف بات کو خلاف اسلام سجھتے ہیں۔ جامعہ حفصہ اسی روش پر قائم رہے اور جیسے کہ صدر کے مشیران طاقت کے استعمال کے حامی ہیں تو مناسب ہو گا کہ میڈیا کو متعلقہ علاقے سے باہر کر دے اور اس جگہ پر کرفیو لگا دے۔ جانی نقصان تو بہت ہو گا لیکن اسلام کے نام پر فتنہ پھیلانا کافی بڑا جرم ہے۔ مذاکرات کسی بھی معاملے کو سلجھانے کے لئے بہترین حل ہے۔ مجھے حیرانی ہے کہ جامعہ کی طرف سے جدید اسلحے کی نمائش جاری ہے لیکن ان کی طرف سے انٹرنیٹ پر کسی جگہ کوئی مسئلے پر روشنی نہیں ڈالی گئی۔

میں ذاتی طور پر باعزت راستہ دینے پر نکل جانے کو ترجیح دیتا ہوں۔ یعنی اگر کسی جگہ محسوس ہو تو ایسی جگہ سے باعزت طور پر نکلنا بہتر ہے کہ بندہ عزت افزائی کروا کے نکلے۔ جناب صدر بہترین حل اس وقت یہی ہے کہ آپ کے پاس بہترین موقع ہے کسی قسم کے الیکشن میں نہ پڑھیں۔ چیف جسٹس کو بحال کر کے خود نگرانی میں الیکشن کروانے کا کہیں اور خود اب کرسی خالی کر دیں۔ ورنہ ملک انتہائی خطرناک دوراہے پر کھڑا ہے۔ اس میں سبھی کو خطرہ ہے کسی ایک کو نہیں۔

Popularity: 6% [?]