بدتمیز

برٹش سیلرز کو کیا علم تھا کہ اس نئی سرزمین پر قدم رکھنے کے 399 سال بعد دور دراز سے ایک پینڈو آئے گا جو چار سو سالوں کا جائزہ لے گا۔ (اندر کی بات ہے یہ جائزہ ابھی تک شروع نہیں ہو سکا) جی ہاں آج 14 مئی 2007 کو برٹش سیلرز کی طرف سے قائم پہلی settlement جیمز ٹاؤن کو 400 سو سال مکمل ہو گئے۔ برٹش سیلرز 14 مئی 1607 کو جیمز ٹاؤن ورجینیا کے ساحل پر اترے تھے۔

ویسے تو علم تھا کہ امریکہ کولمبس نے دریافت کیا تھا۔ اب تاریخ پڑھی ہو تو علم ہو۔ اس کولمبس ڈے نے بھی بڑا ہاتھ کیا تھا اس دن میں dmv چلا گیا تو وہاں جا کر علم ہوا کہ آج آف ہے۔ ویسے کتنے لوگوں کے علم میں ہے کہ کولمبس اسپین کے بادشاہ سے مدد لے کر نکلا تھا؟ اور اسپینش لوگ ہی میکسیکن ہیں۔ اور اس زمانے کے بعد جب برٹش یا گوروں نے اسپینیش کو مار بھگانے کی کوشش کی تو ان کے علم میں کہاں تھا کہ 400 سال بعد اسپینیش جادو امریکہ پر سر چڑھ کر بولے گا۔

امریکی سر زمین پر پہلے کون آیا اس پر بڑی بحث جاری تھی۔ میں تو شکر کرتا ہوں میں آگیا اس کی کسے پرواہ ہے کہ کس نمبر پر آیا۔ ویلے امریکیوں کا سب سے پسندیدہ کام اس سال بحث تھی کہ St Augustine Florida, Plymouth Massachusetts,  اور James Town Virginia میں سے کس کو پہلی باقاعدہ کالونی مانا جائے۔

اس سال جنوری کو مذہب کا ماہ قرار دیا گیا تھا اور پوری ریاست کے تاریخی چرچ عوام کے لئے خصوصی پروگرام کے تہت کھولے گئے تھے جہاں ان کی معلومات کے لئے خاص طور پر لوگ متعین تھے۔ میں تو بہت جانا چاہتا تھا لیکن جیسا وقت آیا پڑا ہے اس کے پیش نظر اجازت نہ مل سکی کہ صدر بش کے جنون نے عوامی صورت اختیار کی ہوئی ہے۔ ہاں افریقن امریکن پر اس جنون کا نہ ہونے کے برابر اثر ہے۔ کیونکہ ان لوگوں کو کھانے اور تن ڈھانکنے کی فکر سے نجات ملے تو کچھ اور سوچیں۔

St Augustine کے بارے میں کہا گیا ہے کہ یہ James Town سے بھی 42 سال پہلے قائم ہو چکی تھی۔ اس کو باقاعدہ منصوبہ بندی سے تعمیر کیا گیا تھا اور اس میں پہلا چرچ بھی قائم کیا گیا (سارے میکسیکن یا اسپینش پکے عیسائی ہیں) لیکن James Town کو اس لحاظ سے فوقیت ہے کہ یہ تاج برطانیہ کی طرف سے قائم شدہ ہے اور racist گورے کیوں کر تاریخ مسخ نہ کریں۔ یہ فلوریڈا کے اٹلانٹک والے ساحل پر واقع ہے۔ اگر اسپینش تھوڑا سا اینگل اور غلط رکھ لیتے تو bay of mexico میں نکل جاتے اور کسی ہری کین کا شکار بھی ہو سکتے تھے۔ قسمت اچھی تھی جو فلوریڈا سے جا ملے۔

برٹش فورسز سے لڑائی کی اور آزادی بھی لی گئی لیکن 400 سالہ تقریبات کے لئے ملکہ برطانیہ کو خصوصی دعوت دی گئی۔ اس سے قبل ملکہ برطانیہ 1967 میں James Town تشریف لائیں تھیں۔ اس وقت James Town کی 350 ویں سالگرہ منائی گئی تھی۔ اگر امریکہ گوروں کے بجائے مسلمانوں کے قبضے میں ہوتا تو اس ملک کے 52 ملک بنا چکے ہوتے۔ اور اگر یہ پاکستانیوں کے قبضے میں ہوتا تو ملا عمر یا اسامہ بن لادن یا سعودی عرب کے حکمران کے بجائے ملکہ برطانیہ کو بلانے پر ایک ہنگامہ کھڑا ہو جاتا۔ مجھے یہ بات بہت پسند آئی کہ اگرچہ آزاد ملک ہے اور نسلیں بھی کتنی گزر گئیں لیکن چونکہ یہاں سب کے سب برٹش settlement سے وجود میں آیا لہذا ملکہ برطانیہ کو بلایا گیا۔

ملکہ رچمنڈ تھیں۔ جا کیوں نہیں سکتے تھے؟ بات وہی۔ اب تو یہاں مجرموں کی طرح زندگی گزارنی پڑتی ہے۔ خیر سانوں کی۔ (رچمنڈ ورجینیا اسٹیٹ کے صدر مقام کا نام ہے جو کہ میرے گھر سے 20 میل کی دوری پر واقع ہے)

ملکہ کو جب James Town لے جایا گیا تو اس دوران ایک ٹیم نے 400 سال پرانے قلعے کی بنیادیں ڈھونڈ نکالیں۔ یہ قلعہ ریڈ انڈین سے حفاظت کے لئے بنایا گیا تھا۔ اس زمانے میں برطانیہ میں قانون تھا کہ باپ کی ساری جاگیر کا وارث سب سے بڑا بیٹا ہوتا ہے۔ لہذا باقی اولاد یا تو سب سے بڑے کے رحم و کرم پر ہوتے تھے یا پھر خود کچھ ہاتھ پاؤں مارتے تھے۔ لہذا ان میں سے بہت سے نازو نعم میں پلے وسیع زمین پر قبضے کے شوق میں امریکہ بھاگے آئے۔ اب یہاں نہ تو وہ خادم نہ کچھ کام کرنے کا خود کو پتہ لہذا شروع کے حالات انتہائی دردناک تھے۔ اوپر سے ہر وقت ریڈ انڈین کا ڈر۔ اگر powhatan کی pocahontas سمتھ صاحب کو نہ بچا لیتیں اور یہ سارا قبیلہ انگلش مین کو پناہ نہ دیتا تو نہ تو امریکہ ہوتا نہ تھینکس گیونگ ابتدائی دور میں ان نواب زادوں نے نہ صرف گھوڑے اور دوسرے جانور مار کر کھائے بلکہ کئی دوسری تکلیفوں کا سامنا کیا کاہل اس قدر تھے کہ جو چند ایک کاریگر بیماریوں سے مر کھپ گئے ان کے بنائے گئے مکانات کو بھی سردیوں میں کاٹ کر آگ جلانے کے لئے استعمال کر گئے بجائے یہ کہ خود سے مزید لکڑیاں اکٹھی کرتے۔ نتیجتا ایک گھر میں ایک بستر پر دو مختلف جوڑے یا پورا خاندان سویا ہوتا تھا۔ ایک صاحب نے بھوک کے ہاتھوں مجبور ہو کر اپنی حاملہ بیوی کو قتل کر کے اس کے گوشت سے پیٹ بھرا۔

شان و شوکت سے مناتے ان 400 سالوں بعد اس سب کو دیکھیں تو عجیب سے محسوس ہوتا ہے۔ 400 سالوں کا یہ سفر جس میں جنگ بھی اور سول وار بھی اور پھر ترقی کی طرف کا سفر۔ کیا ہم لوگ 60 سالوں میں امریکہ کے ابتدائی 60 سالوں جتنا سفر بھی کر سکے ہیں؟ میرے خیال سے تو نہیں پرسوں ہم نے اپنے بندے مار کر ان کے گوشت سے ضیافت اڑائی ہے۔ جو مر گئے وہ معصوم نوکری کے لئے آئے تھے آج ان کو مار کر کہا جا رہا ہے ہماری پارٹی کے تھے۔ چلو امریکہ تم کو 400 سال مبارک ہوں۔ اس ساحل سے یہ ساحل اچھا جہاں مارنے سے پہلے وجہ پیدا کی جاتی ہے۔

Popularity: 29%