بدتمیز

پاکستان میں آج کل بڑی ہنگامہ آرائی ہو رہی ہے۔ صدر مشرف سب کو نگلتے نگلتے اب ایسی چیز حلق میں پھنسا بیٹھے ہیں جو نہ نگل سکتے ہیں نہ اگل سکتے ہیں۔ بدقسمتی سے مجھے یہ والا محاورہ ہمیشہ بھول جاتا ہے۔ اس ہاہا ہو کار میں بہت مزے مزے کے بیانات پڑھنے کو ملے۔ یہاں صرف جیو کا خبرنامہ ملتا ہے یا ایکسپریس اخبار لہذا ان سے ہی جو دو چار جملے مل جاتے ہیں وہ عقل حیران کرتے ہیں کہ یا اللہ یہ ہیں وہ لوگ جو حکمران ہیں؟

شروع تو مجھے صدر پاکستان سے کرنی چاہئے کہ بہر حال رتبہ ان کا بڑا ہے۔ صدر پاکستان پر کچھ لکھنا پوری ایک پوسٹ کا متقاضی ہے۔ واقفان حال جانتے ہونگے کہ صدر پاکستان پر پوسٹ کے بعد کہیں میں بھی غائب نہ ہو جاؤں لہذا میں اپنی عافیت اسی میں سمجھتا ہوں کہ ابھی ان کا صرف ایک بیان پیش کر کے ادھر ادھر ہو جاؤ۔

صدر پاکستان: یہ پانچ ہزار بندوں کا جلوس کیا چیز ہے؟ میں چاہوں تو پانچ لاکھ بندوں کا مجمع اکٹھا کر لوں۔

جناب صدر پہلے تو اسکرٹ اور منی اسکرٹ کے بین بین کوئی چیز پہنے ہوئی ٹانگوں کی نمائش نہ کرتے ہوئے کوئی خاتون نہ نظر آنے کا دھچکا اور اس کی جگہ ایک حبشی انسل کا بندہ دیکھنے کا دکھ اتنا شدید تھا کہ الامان الحفیظ۔ بس دل تھام لیا کہ سافٹ امیج اجاگر نہ ہو سکے گا اور تورا بورا شروع ہو جائے گا۔ جناب صدر آپ کا ایک ہی بیان پسند تھا کہ صدر ملک کا سربراہ ہے اور اس کی بات سننی چاہئے اس کی تقریر کے دوران ہنگامہ نہیں کرنا چاہئے۔ یہ آپ نے اس سوال کے جواب پر کہ آپ ابھی تک گریجویٹ اسمبلی سے کیوں خطاب نہ کر سکے دیا تھا۔ اس جواب سے میں جزوری طور پر متفق تھا۔ لیکن اب نہیں۔ کیا صدر کو زیب دیتا ہے کہ وہ الٹے سیدھے بیان داغتا پھرے؟ صرف اس بیان کی بات نہیں آپ کی تاریخ ایسے بیانات سے بھری پڑی ہے۔ جناب صدر آپ کو الٹے سوالات یا الٹی حرکتوں کی نشاندہی پر عہدے کا وقار دیکھانا چاہئے نہ کہ اسی طرز کا جواب۔ ویسے جناب صدر یہ پانچ لاکھ فوج سے جمع کرنے تھے یا سرکاری محکموں میں سے نکال کر پورے کرنے تھے؟

چوہدری پرویز الہی: بینظیر مخالفت کرتی رہی اب کس منہ سے حکومت میں شمولیت کی بات کرتی ہے؟

جناب چوہدری صاحب۔ میری امی میری حرکات سے تنگ آ کر کہتی ہیں “ہیں نہ چوہدری۔ دماغ تے کم کردا ہی نئیں” ویسے یہ سوال اگر صدر پاکستان سے کرتے تو بہتر تھا کہ آپ کو اب کھڈے لائن کیوں لگایا جا رہا ہے؟

چوہدری شجاعت حسین” فوج کے خلاف کچھ کہنے والوں کو گولی مار دینی چاہئے۔

چوہدی جی آپ بھی؟ جناب فوج کے خلاف آگے عوام بڑی بھری پڑی ہے۔ ملک میں خانہ جنگی کا ٹھیکہ تو نہیں پکڑ لیا؟ کچھ ہوش سے بیان دیں عوام نے آپ کو بھی سولی چڑھا دینا ہے جبکہ صدر صاحب تو آگے ہی آپ لوگوں کی قربانی کے درپے ہیں۔

بینیظر بھٹو: ایمل کانسی کو ہم نے پکڑ کر پیش کیا۔ ہمارے دور میں ورلڈ ٹریڈ سینٹر پر حملہ نہیں ہوا۔

قابل احترام بی بی آپ کو بی بی کہوں یا بے بی؟ ویسے فٹ تو بے بے پیٹھتا ہے۔ ورلڈ ٹریڈ پر جو ہونا تھا وقت پر ہونا تھا آپ کی حکومت نہیں رہی ویسے پہلے کہتی ہیں کہ ایمل کانسی کو پکڑا تو یہ بھول گیا کہ اس نے کیا کیا تھا؟ میرا نہیں خیال آپ کے سوا کوئی اور اتنا بے وقوف ہو سکتا تھا کہ اپنے ملک کو دہشت گردوں کا ملک قرار دے۔

ارباب رحیم خان: میرے ساتھ اللہ امریکہ اور آرمی ہے۔

سندھ کو کیا ہو گیا ہے؟ پہلے الطاف بھائی اور بے نظیر کم تھیں کہ اب ارباب صاحب بھی عجیب بیان دے رہے ہیں۔ جناب کچھ ہوش کریں اپنے ساتھ یا اللہ کو ملائیں یا امریکہ کو۔

نواز شریف: دیکھیں جی جو ہم نے کیا وہ جمہوری دور تھا اور جو مشرف صاحب کر رہے ہیں وہ آمریت

سر میں آپ کی حکومت کا حامی آپ کی وجہ سے نہیں شہباز شریف کی وجہ سے تھا۔ لیکن آپ کی بھاری اکثریت آپ کو بڑی بھاری پڑ گئی۔ غلط کام غلط کام ہوتا ہے چاہے سب کو ساتھ ملا کر کیا جائے یا کوئی اکیلا ڈنڈے کے زور پر کرے۔

جنرل ر حمید گل: فوج کا سربراہ (کمانڈ انچیف) امریکہ کی مرضی کا ہوتا ہے۔

بہت شکریہ سر یہ پہلی آفیشل اسٹیٹمنٹ ہے جس کی ابھی تک کہیں سے تردید نہیں ہوئی کہ کمانڈر انچیف امریکہ کی مرضی سے نہیں بلکہ پاکستان میں منتخب ہوتا ہے۔ ویسے ایک سوال، سر کیا آپ بھی امریکہ کی مرضی سے بنے تھے؟ اور وہ کیا وجہ تھی جس سے آپ امریکہ مخالف ہو گئے؟

صدر مشرف کے جانے کے بعد کوئی اس پر بھی روشنی ڈالے کہ سنیارٹی نظر انداز کر کے صدر مشرف کی ترقی بھی امریکہ کا حکم نامہ تھا؟ اگر ہاں تو پھر تو کارگل کی سمجھ لگ جانی چاہئے۔ اور صدر مشرف کی بھی۔

ایک خبر: ملک میں بجلی کی کمی کے باعث ہفتہ وار دو تعطیل کرنے اور بازار شام 8 بجے بند کرنے کا فیصلہ:

اچھا نہیں تھا کہ امریکہ کا ساتھ نہ دیتے اور ملک کو پتھر کے دور میں بھیج دیتے؟ جنت بھی مل جاتی اور ڈھیروں ڈھیر حوریں بھی۔ اب نہ بجلی ہے اور نہ ہی حوریں۔ ساتھ نہ دیتے تو بجلی کی قلت بھی نہ ہوتی کیونکہ بجلی ہوتی تو قلت ہوتی۔ ویسے ابھی کونسا ہمارے پاس بجلی ہے۔ امریکہ نے دوسرے طریقے سے پتھر کے دور میں پہنچا دیا ہے۔ بھائیوں اس کا الزام بھی امریکہ پر لگانا ہے دیکھو بچ کر جانے نہ پائے اور یہ جن کمبختوں نے ڈیموں کی مخالفت کی اور جن منحوسوں نے پچھلے سال واپڈا کے بار بار کہنے پر بھی کان نہ دھرے ان وزیر کا نام بھول گیا ہے۔ یہ میرے خیال سے سندھ سے ہیں۔

ان تمام لوگوں کے لئے ایک طمانچہ۔ امریکہ میں اگر آپ ایک معمولی دکاندار کو بھی کسی چیز کے طلب کرنے کے ساتھ پلیز نہ لگائیں تو اس سے مراد لی جاتی ہے کہ آپ حکم دے رہے ہیں اور یہ کافی بری بات ہے اس سے سبھی اس شخص کو گھورنے لگ جاتے ہیں۔ یہاں ایک ٹرانزیکشن پر تین تین چار چار دفعہ پلیز اور شکریہ کہنے کا عام رواج ہے۔

Popularity: 26%