بدتمیز

میرے بچپن تک پاکستان میں فوج ایک اچھا ادارہ تھا۔ نوازشریف کے دوسرے دور سے صدر جنرل مشرف کی آمد سے پہلے تک باوجود یحیٰ خان جیسے جرنیلوں اور ضیا الحق کی مطلعق العنانی کے باوجود فوج کے ادارے کی عزت باقی تھی بلکہ اس دور کی سب سے اچھی بات کے صدر ضیا الحق کی مطلق العنانی کے باوجود میڈیا اور دانشوروں نے فوج کے ادارے پر کیچڑ اچھالنے سے گریز کیا۔ اب کے دو دو ٹکے کے دانشور ہمہ وقت عجیب عجیب بات کرتے رہتے ہیں۔

نوازشریف نے فوج کو ہر جگہ ٹھونسنا شروع کر دیا۔ وجہ یہ بیان کی گئی کہ عام عوام بڑی کرپٹ ہے لہذا ان اداروں کو چیک صرف فوج صیح طریقے سے کر سکتی ہے۔ اس وقت نہ جانے کس نے لکھا تھا کہ یہ قدم بہت غلط ہے اس سلسلے میں ایک کارٹون بھی تھا جس کا کیپشن تھا کہ “پاکستان کی موجاں ہی موجاں، جتھے دیکھو فوجاں ہی فوجاں”

اکثر لوگ جرنیلوں کی عیاشیاں فوج پر ڈال دیتے ہیں۔ نتیجتا فوج ساری کی ساری بدنام ہوتی ہے۔ حقیقت یہ ہے کہ انگلیوں پر گنے جانے والے یہ جرنیل ہیں جن کا خمیازہ معصوم فوجیوں کو دینا پڑتا ہے۔ پہلے پہل ایسی ہی باتیں کی جاتیں ہیں بعد میں حالات ایسے ہو جاتے ہیں کہ پنجاب کے لوگ بلوچستان میں قدم نہیں رکھ سکتے۔ ایسے ہی کل کو فوجی ہونا جرم بن جائے گا۔ بلکہ شائد بن ہی چکا ہے۔

امریکی فوجی اور پاکستانی فوجی میں زمین آسمان کا فرق ہے۔ یہ فرق صلاحیت سے زیادہ سہولیات سے تعلق رکھتا ہے۔ پاکستان میں فوج کا بجٹ اسلحہ اور جرنیلوں کی عیاشیوں پر خرچ ہوتا ہے۔ امریکہ میں فوج کا بجٹ اسلحہ اور فوج کی سہولیات پر خرچ ہوتا ہے۔

میں جب سے آیا ہوں امریکی فوج اور اس کے متعلق روئیے کو بہت قریب سے دیکھ رہا ہوں۔ 460 ایسٹ پر ہمارا گیس اسٹیشن تھا۔ اس پر فوجی اڈے fort lee کا بیک گیٹ لگتا ہے۔ لہذا فوجیوں سے بہت واسطہ پڑا۔ یہاں واضح کر دوں کہ ورجینیا فوج کے لئے ایک اہم اسٹیٹ ہے اور بحری بیڑے اکثر یہی سے روانہ کئے جاتے ہیں جبکہ fort lee ایک اہم اڈہ ہے جہاں پر ابھی بھی میگا پراجیکٹس پر کنسٹرکشن ہو رہی ہے جو کہ اس کی expansion سے متعلق ہے جس کے مکمل ہونے کا اندازہ شائد 2009 ہے۔ یا 2011

امریکی فوجی باہر جیسا مرضی ہو لیکن اپنے ملک میں انتہائی ڈیسنٹ ہوتا ہے۔ اس کو یہاں کسی قسم کی بدمعاشی کی اجازت نہیں اندرون ملک سویلین سے ایسی ویسی بات پر اس کو سخت سزا دی جاتی ہے تا کہ عوام میں فوج کا امیج برقرار رہے۔ اس کے برعکس پاکستان میں آپ کسی سے لڑائی کریں اس کی معصوم سی دھمکی سن کر بڑی ہنسی آتی ہے کہ میرے ماموں فوج میں ہیں۔ بلکہ اکثر لوگ تو خفیہ والوں کو استعمال ہی اپنے خاندانی جھگڑے نبٹانے کے لئے کرتے ہیں۔

مجھے پاکستان کے فوجی نظام کا ککھ علم نہیں اگر کسی صاحب کو متعلقہ معلومات ہو تو وہ کمنٹس میں لکھ دے۔ امریکہ میں 4 سال کے لئے سائن اپ ہونا پڑتا ہے یعنی اگر آپ فوج کے لئے جائیں تو 4 سال سروس دینی پڑتی ہے اس دوران آپ کو تمام سہولیات دی جاتی ہیں۔ اگر ذاتی کام سے جا رہے ہیں تو وہ آپکا ہے ورنہ آرڈر آیا اور اس کی تعمیل میں جتنے خرچے ہوئے سب کے سب پیڈ ہونگے۔ آپ پیدل جائیں یا ٹیکسی لے کر فوج سب پے کرے گی۔

4 سال کے بعد دوبارہ آپشن ہوتی ہے کہ رہنا ہے تو مزید 4 سال کے لئے سائن اپ ہو جائیں ورنہ باہر نکل جائیں۔ ان کو خوب دبا کر پیسے دئے جاتے ہیں ساتھ میں ہر قسم کا لون فوری مل جاتا ہے۔ ہر بڑی چین پر ان کے لئے خصوصی رعایت ہے۔ کرسمس پر 50 فیصد آف ہوتا ہے۔ یعنی سیل اب ساتھ ہی اگر ایکٹو سروس ڈیوٹی فوجی کے لئے مزید 50 فیصد رعایت یعنی 75 فیصد رعایت۔ آپ 100 ڈالر والی چیز 50 ڈالر کی لیں گے تو وہ وہی چیز 25 ڈالر کی لے گا۔

گیس اسٹیشن پر آپ ساری قوم کو pre-pay کروا رہے ہیں اس کو وردی میں دیکھ کر فوری طور پر approve کر دیتے ہیں کہ فوجی ہے کہاں بھاگے گا وہ ٹینکی فل کر کے اندر آ کر پیسے دے جاتا ہے۔

انشورنس کا قائدہ ہے کہ جتنی مرضی high premium کی ہو آپ کو کچھ نہ کچھ پھر بھی پے کرنا ہوتا ہے۔ جیسے عام طور پر 20 فیصد تو ضرور آپ کے کھاتے آ جاتا ہے کہ یہ آپ نے پے کرنا ہے۔ ان کے لئے 100 فیصد انشورنس کمپنی پے کرتی ہے۔ یہ ایک پائی ادا نہیں کرتے۔ اور صرف اپنی نہیں یہ سب سہولیات ان کی پوری فیملی کو حاصل ہوتی ہے۔ یاد رہے کہ پاکستان میں فیملی کا مطلب ہوتا ہے کہ آپ، آپ کے بہن بھائی، آپ کے دونوں طرف کے کزن اور آگے سارے رشتہ دار۔ امریکہ میں فیملی کا مطلب ہے آپ، آپ کی بیوی اور آپ کے بچے۔ بس یہ ہے فیملی۔ unmarried ہے تو اس کی فیملی اس کے بہن بھائی سہولیات کے لئے count نہیں ہو سکتے۔

20 سال کی سروس کے بعد یہ ساری سہولیات تو ہیں ہی اس کے بعد jobs کے لئے بھی ان کو preference دی جاتی ہے۔ یعنی آپ کی اور اس کی کوالیفیکیشن برابر ہیں یا آپ کی تھوڑی سی زیادہ ہے تب بھی اس کو نوکری دی جائے گی۔ یعنی آپ 16 یا 18 سال کی عمر میں گئے اور 36 یا 38 سال کی عمر میں باہر نکلے بچوں کے لئے مستقبل بنا کر اور ابھی بھی چاہیں تو جاب کریں اگر کفایت شعار تھے تو بزنس شروع کر لیں۔

کیا یہ سب گارنٹی آپ ہماری فوج کو دے سکتے ہیں؟ نہیں کیونکہ یہ سب ہائی کمان کی عیاشیوں میں خرچ ہو جاتا ہے۔ ہمارا فوجی پہلے جان ہتھیلی پر رکھ کر سروس دے اور جب اس کی بیٹی جوان ہوتی ہے تو وہ اس کی شادی کے صرف ایک دن کے صرف وقت کی روٹی کا بندوبست نہیں کر سکتا۔

امریکہ میں ورجینیا جیسے علاقوں میں دیسی لوگوں کو locate کرنے کے لئے ایک نئے بندے کے لئے walmart یا sams club سے زیادہ اچھی جگہ کوئی نہیں۔ کیونکہ ہم لوگ بچت کے پیدائشی عادی ہوتے ہیں لہذا انہی دو جگہوں پر زیادہ پائے جاتے ہیں۔ یہاں ورجینیا ٹیک میں فائرنگ کے اگلے روز ایک ہندو خاتون ایک افریقن امریکن عورت سے باتیں کر رہی تھیں اس کو کہتی کہ میں تو اتنا ڈر گئی ہوں اپنے بچے کو میں تو کبھی ایسی کسی جگہ نہ بھیجوں تو افریقن امریکن عورت نے اپنی بیٹی کی طرف اشارہ کرتے ہوئے کہا کہ میں اس کو فوج میں بھیج رہی ہوں۔ اس پر ہندو عورت ایسے حیران ہوئی اور کہتی کہ میں تو اپنے بیٹے کو کبھی فوج میں نہ بھیجوں چاہے امریکہ کی ہو یا انڈیا کی۔ افریقن امریکن عورت نے پوچھا کیوں؟ کہتی کہ خطرہ بڑا ہے تو افریقن امریکن عورت نے بہت اچھا جواب دیا کہ خطرہ تو سنڈے نائٹ پارٹی میں بھی ہوتا ہے اور ہائی وے پر بھی۔ ٹریننگ کے لئے جانا بہت ضروری ہے۔ یہ فرق ہے ہماری سوچ اور امریکی قوم کی سوچ میں۔ ہم برصغیر کے لوگ سب کے سب ایسے ہی ہیں اس میں مذہب کی کوئی قید نہیں۔

آپ پاکستان میں دیکھ لیں کوئی بچہ کہہ دے کہ میں نے فوج میں جانا ہے سب خاندان افسوس کرنے جمع ہو جاتا ہے۔ بچے کو کسی نہ کسی طریقے سے ایسے کام سے باز کر دیا جاتا ہے۔ میں ایسے کتنے ہی لوگوں کو جانتا ہوں جو فوج میں گھر والوں کی مخالفت کی وجہ سے نہیں جا سکے۔ ہم حکمرانوں کا رونا روتے ہیں یہ سب لوگ ہم میں سے ہی آئے ہیں۔ ہم ساری کی ساری قوم ایک جیسی ہے۔