o_O بدتمیز

کمرے کئی اقسام کے ہوتے ہیں۔ ہوٹل موٹل کے کمرے بھی ہوتے ہیں اور گھر کے بھی۔ کچھ کمرے ایسے ہوتے ہیں جو اپنی مثال آپ ہوتے ہیں جیسے گودام۔ لیکن میں جس کمرے کے بات کر رہا ہوں یہ کچھ عرصہ قبل تک میری کمر تھی جو کہ اب پھیل کر کمرہ بن چکی ہے۔

میں نے پہلے تو اس پر توجہ نہیں دی لیکن اب یہ کچھ زیادہ ہی کمرہ پن پر اتر آئی ہے۔ اس حد تک کے مجھے شرمندگی ہونے لگی ہے۔ اب تو بچوں نے بھی کہنا شروع کر دیا ہے کہ دیکھو تمہاری توند نکل آئی ہے۔ ایسے میں اگر اجمل انکل بھی اپنی کمر کا حال بیان کر دیں تو شرم کے مارے ڈوب مرنے کا مقام ہے۔

اس کے بارے میں ایک مشورہ تو ملا کہ بیٹا صبح اٹھ کر دوڑ لگایا کرو۔ میں نے عرض کی کہ انکل اگر رات 12 بجے تک کام کروائیں گے تو صبح مت اٹھائیں پھر سوچ کر بولے تم دوپہر کو دوڑ لگا لیا کرو۔ میں نے عرض کی کہ دوپہر کو دوڑ لگائی تو لوگ پاگل ہی سمجھیں گے۔ ساتھ میں لیٹ ہو جاؤں گا۔ انہوں نے تجویز واپس لے لی۔

تھک ہار کر میں نے دن میں چار روٹیوں سے دو روٹیاں کر دی۔ اس پر بھی توند کمبخت وہیں کی وہیں۔ میں نے سوچا کہ چلو ایسے کرتے ہیں کہ کسی دوائی پر ہاتھ صاف کریں۔ ٹی وی پر hydroxycut کا اشتہار چل رہا تھا۔ اس پر دماغ نے کہا کہ اس چنگل میں مت آنا یہ لوگ اس دوا کو استعمال کر کے سلم نہیں ہوئے۔ پہلے سے ہی سلم ہیں۔ لیکن دل تھا کہ صدا دئیے جائے کہ ” پوچھا موج صبا نے تو میں نے کہا۔ دل نہیں مانتا”

اس میں صبا کی طرف قطعا توجہ مت کریں کسی انگریز کا نام صبا نہیں ہوتا

دماغ نے پہلے تو تھوڑا وقت میری پھٹی آواز کو برداشت کیا پھر جھٹ پٹ دو ہاتھ رسید کئے۔ صوفے سے اٹھا کر کمپیوٹر ٹیبل پر پٹخا اور بولا چلو اب جلدی سے اس کا ری ویو ڈھونڈو۔ ڈھونڈا تو بڑا ہی حوصلہ شکن ملا۔ پہلے کو ہی پڑھ کر طبعیت ایسی ہری ہوءی کہ مزید ریویو ڈھونڈنے سے پرہیز شروع کر دیا۔

مسئلہ اس لئے بھی گھمبیر ہے کہ میں باہر کا  کھانا نہیں کھا رہا۔ کیونکہ دور دور تک کوئی دیسی ریسٹورنٹ نہیں۔ لہذا اگر گھر کا کھا کھا کر یہ حال ہے تو نیویارک جا کر تو میں بھالو بن جاؤں گا۔ ویسے امریکہ کو کسنے کہا تھا کہ ہم دیسی لوگوں کے لئے بھی غذا خالص رکھیں؟ ڈائٹنگ کا مشورہ بالکل مت دیں۔ اس سے زیادہ ڈائٹنگ کس کو کہتے ہیں؟ ویسے میں ذرا کچن کا چکر لگا کر آیا تھوڑی بھوک لگ رہی ہے اور رات کے دو بجے ہیں۔

Popularity: 9% [?]