o_O بدتمیز

میں معتصب نہیں ہوں۔ کچھ قوموں کے بارے میں میرے خیالات ان کے عمومی برتاؤ کو دیکھ کر بن جاتا ہے۔ جیسے عربوں کے بارے میں میرا خیال یہ کہ خدا کے بعد یہ لوگ امریکہ کو سجدہ کرتے ہیں۔ عربی بولنے والے سبھی لوگ شاید ایسے نہ ہوں لیکن بہت بڑی تعداد ایسی ہی ہے۔ مجھ کچھ بہت اچھے لوگ بھی ملے ہیں لیکن کچھ منہ پھولائے ہوئے بھی ہیں۔ ان کی بہت بڑی تعداد امریکہ میں دوسرے طریقوں سے نازل ہوتی ہے اور یہاں افریقن امریکن عورتوں سے شادی کر کے رہتی ہے۔ ایسے میں اگر ان کو پتہ چل جائے کہ آپکے پاس گرین کارڈ ہے یا نیلا پاسپورٹ تو ان کا برتاؤ تبدیل ہو جاتا ہے۔ کم از کم مجھے تو یہ اسلام اور مسلمان ہونے کی برکت سے زیادہ امریکہ کی برکت لگی کہ پہلے جو بندہ مسلمان ہو کر آپ کو خوش آمدید نہیں کہہ رہا وہ آپکے بارے میں جان کر فوراُ تبدیل ہو گیا ہے۔

پہلے مجھے اس کی سمجھ نہ لگ سکی۔ کل کسی عزیز کے ساتھ تھا۔ یہ صاحب ہمارے جاننے والے ہیں۔ ان کے آگے سے ایک عرب صاحب مہمان تھے۔ انہوں نے میرے سامنے اپنی گفتگو کرنے سے گریز کیا اور بات کو عربی میں لے گئے۔ میں ایسی باتوں کا برا نہیں مناتا اور عموما میزبان کے کمپیوٹر کو چپک جاتا ہوں۔ یہی کیا۔ اب کچھ دیر بعد وہ عرب صاحب بڑی گرمجوشی سے بات چیت کرنے کے موڈ میں آ گئے۔ پتہ چلا کہ ان کو معلوم پڑا تھا کہ میرا سٹیٹس کیا ہے۔ میری چڑ بڑھ گئی۔ میں نے ان پر ظاہر تو نہیں کیا لیکن زیادہ معلومات دینے سے گریز کیا۔

بات کرتے کرتے انہوں نے اسلام پر بات کرنا شروع کر دی جو کہ مسلمانوں کا حکومت کے بعد سب سے پسندیدہ ٹاپک ہے۔ ارشاد ہوا کہ تم لوگوں نے قران کو اردو میں ٹرانسلیٹ کر لیا ہے۔ میں نے عرض کی کہ نہیں جناب صرف سمجھانے کے لیے کیا ہے ورنہ پڑھتے سبھی عربی میں ہیں۔ ارشاد ہوا کہ تم لوگ اپنے نبی صلی اللہ علیہ وآلہ وسلم کی زبان کیوں نہیں سیکھتے؟ کتنی بڑی بات ہے یہ؟ تم جس قرآن کو پڑھتے ہو جانتے ہی نہیں ہو کہ اس کا مطلب کیا ہے۔ یہ تمہاری غلطی نہیں حکومت کی ہے۔ اس کو چاہیئے 3٫4 جماعت میں اس کو لازمی کر دے۔

میں نے ان سے پوچھا کہ میرے ملک میں تو 50 فیصد بچے اسکول نہیں جاتے تو وہ عربی کیسے سیکھیں گے؟ چلیں مان لیا کہ عربی آنی چاہئے لیکن میرے خیال سے احکامات پر عمل لازمی ہے نہ کہ عربی سیکھنا۔ زبان کو مذہب کا جزو بنانا صیح نہیں اور اگر امریکہ سے کوئی اسلام قبول کرتا ہے تو احکامات کے ساتھ ساتھ آپ اس کو عربی بھی سیکھائیں گے؟ ان کا کہنا تھا کہ انہوں نے بہت سے امریکیوں کو عربی بولتے دیکھا ہے۔ اب ان کے ملک کے حوالے سے میں نے کہا کہ اسکول (مدرسہ) جا کر تو آپ لوگ سوائے قرآن اور شریعہ کے کچھ سیکھتے نہیں۔ دنیا کہاں سے کہاں پہنچ گئی آپ کے پورے ملک میں سے کوئی نہیں بتا سکتا کہ دن رات اور موسم کیسے بنتے ہیں۔ (ان کے ہاں ایک مدرسہ ہے اور دوسرا اسکول) آپ کو یہ تک تو پتہ نہیں کہ اردو میں عربی کے ہزاروں الفاظ ہیں۔ اس پر وہ مختلف عربی کے لفظ بولیں کہ یہ ہے اردو میں کہ نہیں۔

وہ اب کم آن مین (come on man) کی گردان کرنے لگے۔ میں نے آخر میں ان سے کہا کہ آپ مدرسہ گئے تھے؟ انہوں نے کہا ہاں۔ میں نے پوچھا آپ نے ساری شریعہ اور فقہ کا مطالعہ کیا۔ ارشاد ہوا ہاں۔ میں نے کہا کہ آپ نے عربی میں پڑھا کہ جوا حرام ہے لیکن آپ لاٹری کھیلتے ہیں۔ (ان کی جیب کی طرف اشارہ کیا جہاں ٹکٹیں پڑی تھیں۔ کچھ دیر پہلے وہ بڑی عقیدت سے ان ٹکٹوں پر عربی میں سیر حاصل بحث کر چکے تھے)۔ میں نے اردو میں پڑھا کہ جوا حرام ہے میں لاٹری نہیں کھیلتا۔ آپ پر وہ عربی اثر نہ کر سکی جو کہ نبی صلی اللہ علیہ وآلہ وسلم کی زبان ہے۔ مجھ پر اس کی اردو ٹرانسلیشن نے اثر کر دیا تو خدارا زبان کو مذہب سے مت جوڑیں۔ اور کسی عربی کو کسی عجمی پر کوئی فضیلت نہیں حاصل سوائے تقویٰ کے۔

اب اس پر وہی بات جو کہ مسلمانوں کا خاصہ ہے ان کا کہنا تھا کہ وہ بہت فضول بندے ہیں لہذا اسلام کی کسی بات پر ان کو مثال نہ بنایا جائے۔ مسلمانوں کی صرف ہمارے ہندو پاک کی نہیں عادت کہ ایسی باتوں پر بجائے کہنے کے کہ ہاں ہم غلط ہیں کہتے ہیں ہم بہت گناہ گار بندے ہیں ہمیں مثال نہ بنائی جائے۔ اس کے برعکس گوری چمڑی والے جہاں غلط ہوں فورا اقرار کرتے ہیں اور اس کی درستگی کرتے ہیں۔ لہذا عرب حضرات آپ کو اس لئے بھی نا پسند کر سکتے ہیں کہ آپ عربی نہیں جانتے اور اسلام کو ویسے نہیں سمجھتے جیسے وہ سمجھ سکتے ہیں

Popularity: 5% [?]