o_O بدتمیز

میں اکثر سوچتا ہوں کہ وہ کیا بات تھی جس سے مسلمانوں نے سائنس اور علم کو دھکے دے کر نکالا اور نشے کرنے شروع کر دئے۔ لے دے کر میری تاریخ سے معلومات نہ ہونے کے برابر ہے۔ اس پر ابھی تک اتنی فرصت نہیں ملی کہ کوئی کتاب لے کر پڑھ مارو۔ مسلمان اکثر اپنے دین کو زندگی گزارنے کا سب سے معتدل طریقہ بیان کرتے ہیں لیکن اسی دین کے بارے میں انتہا پسندی کا مظاہرہ کرنا شروع کر دیتے ہیں۔ دوسرے نہ جانے دین کی تشریح کن کن طریقوں سے کرتے ہیں۔

تعلیم، اخلاقیات اور سائنس سے نفرت کرنے والے مسلمان پیسے لے کر بیٹھے ہیں کہ دوسرے چیزیں بنائیں اور پھر ہم ان سے یہ خرید ماریں گے۔ صرف مسلمان ہی کیا سبھی مذہبی لوگوں کا یہی حال ہے۔ ہندو عیسائی سب قوموں کے حد سے زیادہ مذہبی لوگ سائنس سے نفرت کرتے ہیں۔ لیکن انداز جدا ہے۔ مثال کے طور پر ڈارون والی تھیوری ایک اچھی تھیوری ہے۔ میں اس پر یقین نہیں کرتا تھا اب اس پر کچھ کچھ یقین ہو چلا ہے۔  وجہ ہے “سی گل” اس پر روشنی پھر کبھی۔

ڈارون کی تھیوری چونکہ متنازعہ ہے لہذا چرچ اور عیسائی عوام کے پرزور اصرار پر اسکولوں میں اس کو پڑھانے کے ساتھ ساتھ بالکل اسی پیریڈ میں یہ بتانا بھی لازمی ہے کہ مذہب کے حوالے سے یہ صیح نہیں ہے۔ اس کے علاوہ الگ سے بھی بتانا ضروری ہے۔ یہاں نہ آپ ڈارون کی سائیڈ لے سکتے ہیں نہ مذہب کی۔ جو کچھ پتہ ہے اس کو اسی انداز سے بیان کرنا ہے۔ مسلمانوں نے مذہب کی سائیڈ لینی ہے جو کہ اخلاقیات کی پامالی کی بدترین مثال ہے۔ ڈارون کی تھیوری بڑھاتے ساتھ ساتھ ڈارون کے لتے بھی لئے جاتے ہیں اور اس کو جھٹلانے کے لئے کسی سولڈ گراؤنڈ پر بات بھی نہیں کی جاتی۔ کم از کم سائنس کی بات کو سائنس کے ذریعے ہی غلط کر دیں۔

 ہمارا تعلیمی نظام بچوں کے ذہنوں میں علم کو آلودہ کر دیتا ہے۔ بچے سائنس اور مذہب کو دو الگ الگ چیزیں سمجھتے ہیں نتیجے میں ان کے لاشعور میں سائنس کا تصور “اینٹی مذہب” بن جاتا ہے۔ اب سب نے چونکہ جنت میں جا کر حوریں حاصل کرنی ہیں لہذا یہاں دنیا میں زبانی کلامی دشمنوں پر لعنت ملامت کر کے اور عورتوں کی طرح جھولیاں پھیلا پھیلا کر کوسنے دے کر جان چھڑا لی جاتی ہے۔ اس کے باوجود بھی اگر حوریں نہ ملیں مسلمانوں کو تو پھر کیا ہو گا؟

سائنس میوزیم ایک ایسی جگہ جہاں مذہب جانے سے پرہیز کرتا ہے۔ لیکن لوگ جاتے ہیں۔ عیسائی صبح چرچ جاتے ہیں اور دوپہر کو میوزیم۔ مسلمان میوزیم جانے کے بجائے تھیڑ جانا پسند کرتے ہیں۔ سائنس میوزیم لاہور میں بھی ہے اور یہاں رچمنڈ میں بھی۔ عمارت، عظمت ٹیکنالوجی اور معلومات کے حوالے سے کسی شک و شبہ کے بغیر یہاں کا لاہور والے میوزیم پر فوقیت رکھتا ہے۔ لیکن جس بات سے میرے دل میں لاہور والے کی عظمت برقرار ہے کہ وہاں کا سب کچھ سکولوں کالجوں کے بچوں کے ماڈلز پر مشتمل تھا۔ ان کی محنت اور لگن تھی جو کہ باقی لوگوں کو بھی فورس کرے کہ وہ بھی کچھ ایسا کر کے دیکھائیں۔

والدین چھوٹے چھوٹے بچوں کو پکڑ پکڑ کر ان کو سب کچھ بتا اور سکھا رہے تھے۔ اس کے برعکس ہم لوگ اول تو جاتے ہی نہیں جائیں تو بھی کچھ سیکھنے کو چھوڑ کر ادھر ادھر گھوم پھر کر واپس آ جاتے ہیں۔ روشنیاں، رنگ، ستارے، سورج زمین اور دن رات کا بننا اور موسموں کی تبدیلی۔ چاند پر جا کر انسان کیسا محسوس کرتا ہے۔ سب کچھ عملی طور پر موجود تھا اور لوگ لائن میں لگ کر بچوں کو اس میں حصہ دلوا رہے تھے۔

جگہ جگہ سکرینز کے ذریعے چیزوں کی وضاحت کی جا رہی تھی۔ بچوں کے لئے ایک کھیل تھا جس میں ایک کارڈ لیں اس پر موجود نشانات کے ذریعے میوزیم کے مختلف حصوں میں جائیں (ایک ہی فلور پر) وہاں جا کر مزید انفارمیشن پڑھیں جیسے اگر کارڈ پر سوال دل پر ہیں خلئیوں پر یا مچھلیوں پر تو اس کے متعلقہ مختلف جگہوں پر اور چیزیں بھی پڑیں ہیں ان تک جائیں معلومات حاصل کریں اور کارڈ پر وہاں موجود پلیٹ سے نشان ڈالیں۔ کھیل کھیل  میں معلومات حاصل کرنے کا بہترین طریقہ تھا۔

Volunteers لڑکے اور لڑکیاں جگہ جگہ لوگوں کو معلومات فراہم کر رہی تھیں اور جہاں کوئی مشین عوام کے استعمال کے لئے رکھی گئی تھی وہاں وہ لوگوں کو اس پر مدد فراہم کر رہی تھیں۔

مسلمان بچوں کو الزام نہیں دیا جا سکتا۔ ان پر جو لادیں گے وہی وہ بنیں گے۔ مانا آپ بھی کبھی بچے تھے اور آپ کو ایسا آپ کے والدین نے بنایا لیکن خدا نے دماغ بھی دیا ہے اس کو استعمال کریں۔ مذہب میں احکامات اور بھی بڑی قسم کے ہیں مسلمان کچھ خاص قسم کے احکامت لے کر بھاگے دوڑے پھرتے ہیں۔ ان کے علاوہ دوسرے احکامات پر بھی غور کریں۔

مسلمانوں کی بےوقوفی کا اندازہ لگانا ہو تو محرم کو دیکھ لیں۔ ایک واقعہ جس کو ہم لے کر آج تک پیٹ رہے ہیں۔ جیو سے میری نفرت تو دن بدن بڑھتی جا رہی ہے۔ ساری دنیا کا نیا سال ہنسی خوشی شروع ہوتا ہے اور ہمارا رونے دھونے سے۔ پورا ایک ماہ ضائع کیا جات ہے۔ جن بچوں کو سائنس پڑھانی چاہئے ان کو مرثیے اور نہ جانے کیا کیا پڑھایا جاتا ہے۔ چھوٹے چھوٹے معصوم بچے اور مرثیے پڑھتے پڑھتے پیٹ رہے ہوتے ہیں۔ میں نہ شیعہ ہوں نہ سنی میں صرف مسلمان ہوں (چاہے نام کا سہی) لیکن  میرا مقصد کوئی شرارت کرنے کا نہیں ہے کہ سنی شیعہ ڈیبیٹ شروع ہو۔

سائنس کو اینٹی مذہب سمجھنے کے بجائے مذہب کی تائید کرنے والا کیوں نہیں سمجھا جا سکتا؟ سائنس اور مذہب میں ایک فرق ہے مذہب (ہر مزہب کے علما کی تشریحیں نکال کر) کی بات حرف آخر ہے ایک نہ ایک دن اس کی سچائی مل جانی ہے۔ سائنس میں کوئی بات حرف آخر نہیں اس میں ہر وقت کچھ نہ کچھ نیا دریافت ہوتا رہے گا۔ لہذا اگر سائنس مذہب کو جھٹلاتی ہے تو کوئی بات نہیں کچھ عرصہ صبر کریں سائنس مزید ترقی کرے گی تو مذہب کی بات کی تائید کر دے گی۔ جہاں سائنس مذہب کی تائید کرے تو واہ جی واہ مذہب ہمارا سچا اور جہاں سائنس نے جھٹلایا تو وہی عجیب روئیوں کی ابتدا۔

Popularity: 13% [?]