بدتمیز

آج کرسمس تھی۔ پاکستان میں اس کو عیسائیوں کی عید کہا جاتا ہے۔ میں اس کا اپنی عید کے ساتھ موازنہ کر کے کڑھنا نہیں چاہتا۔ لہذا یہاں کی باتیں بیان کرتا جاؤں گا پاکستان اور اپنی عید کا موازنہ خودہی کرتے جائیں۔

کرسمس کی تیاریاں تھینکس گیونگ کے فوراُ بعد شروع ہو جاتی ہیں بلکہ تھینکس گیونگ تو ایک لحاظ سے بیچ میں خوامخواہ ہی آ جاتا ہے۔ تھینکس گیونگ کے اگلے ہی دن ایسی زبردست سیل لگتی ہے جس کو biggest shopping day of the year کہا جاتا ہے۔ اس دن سبھی لوگ تحفے خرید لیتے ہیں کہ ایسی زبردست بچت اور کب ہو سکتی ہے۔

سارا دسمبر کرسمس سپرٹ کرسمس سپرٹ سننے میں آتا رہتا ہے۔ لوگ تو یہاں کے آگے ہی بہت خوش اخلاق ہیں ان دنوں کچھ زیادہ ہی ہو جاتے ہیں۔ کسی صورت کسی کو جھڑکا نہیں جاتا نہ ہی کچھ کہا جاتا ہے۔ اتنی خوش اخلاقی عام ہو جاتی ہے کہ عموماُ دیسی لوگوں کو بد پرہیزی شروع ہو جاتی ہے۔

جگہ جگہ سانتا کلاز نظر آنے لگ جاتے ہیں۔ میں نے جب مال پر مٹر گشت کے دوران دیکھا تھا تو میں کافی دیر کھڑا اس کی حرکات دیکھتا رہا تھا۔ کرسمس ڈے پر تو 90 فیصد خواتین سانتا کلاز کی لال اور سفید ٹوپی پہنے پھرتی ہیں۔ اور ہر چھوٹے بڑے اسٹور کے ورکرز کو دو ہفتے قبل ہی سے لال رنگ کی سانتا کلاز سے ملتی جلتی شرٹ اور ان کے جسی ٹوپی پہننی پڑتی ہے۔

خوش اخلاقی ایک طرف اسٹورز پر ہر وقت کہیں نہ کہیں سیل لگی رہتی ہے اور ہوتی بھی اصلی والی سیل ہے دوسری والی نہیں۔ لیکن جو گھر کے بھیدی ہیں ان کا کہنا ہے کہ جہاں بھی کسی چیز پر کرسمس کے حوالے سے کوئی ٹیگ یا پیکنگ ہے اس کو مت خریدئیے کرسمس گزرتے ہی نئے سال کی آمد کی خوشی کے نام پر یہ اس قیمت سے بھی آدھی پر فروخت کر دی جائے گی کہ اسٹور والے اس کو ایک سال تک سنبھالنا پسند نہیں کرتے۔

میرا کرسمس دیکھنے کا شوق آدھا تو پورا ہو گیا۔ باقی نیویارک جا کر اس کو دیکھنے کا ہے۔ میرا پروگرام تھا تو اس دفعہ کرسمس اور نیو ائیر نیویارک جا کر enjoy کرنے کا تھا لیکن برا ہو اس نام نہاد ٹھنڈ کا جس سے میرا ابا جان گھبرا گئے ہیں۔

 تھینکس گیونگ پر ہر طرف گاڑیاں ہی گاڑیاں تھیں۔ آج I-95 کا وہی حال تھا جو کہ عید والے دن لاہور کی سڑکوں کا ہوتا ہے۔ ابھی بھی چھٹیاں چل رہی ہیں کیونکہ کل یہودیوں کی عید ہے جسکا نام ہے ہانیکا۔ جی ہاں پاکستان میں تو کسی کو یہودیوں کی عید کا پتہ ہی نہیں اور ان کا نام سننے پر ہی کیا سے کیا نہیں ہو جاتا لہذا کیا معلوم ان کے بارے میں ہمکو؟

چلیں یہودیوں کو بھی ان کی عید مبارک ان کی عید کی ابھی تک مجھے تاریخی حیثیت اور معلومات نہیں حاصل ہوئیں جیسے ہی ہونگی بیان کرونگا۔

Popularity: 31%