بدتمیز

میری کچھ باتوں پر میرے دوست نے کہا کہ تم باہر کے ملکوں میں رہنے والے پاکستانیوں سے کچھ زیادہ نالاں ہو اور بلا وجہ بھی ہو ان کو اتنا کریڈٹ تو دو کہ وہ یہ سب کرتے شرماتے نہیں۔ اور جیسے ہیں ویسا ظاہر کرتے ہیں۔

باہر رہنے والے بہت اچھے ہیں۔ مجھے اعتراف ہے کہ اگر آپ مذہب کے ان معیارات کو جو کہ مجھ جیسے کم عقل مرتب کرتے ہیں کو ایک طرف رکھ دیں تو ان میں سے اکثر لوگ بہترین ہیں بلکہ اگر سچ کہوں تو یہاں مذہبی لبادے میں رہ کر چوری چکاری کرنے والے زیادہ ہیں۔ اور مذہب سے پرے پرے رہنے والے انسانیت کے حوالے سے بہترین اشخاص ہیں اور میرے نزدیک یہی لوگ اصل مسلمان ہیں۔

لیکن چونکہ مجھے بات سمجھانا نہیں آتی لہذا میری بات صیح طرح سمجھ نہیں آتی۔ میں عام زندگی میں بولنے سے زیادہ سننے میں یقین رکھتا ہوں۔ سنی ہوئی بات بھی کم از کم دس پندرہ دفعہ دوبارہ سننے کی ہمت مجھ میں موجود ہے۔ جھوٹے مذہبی لوگوں سے میں بیزار ہوں لیکن ان کی بھی قسمیں ہیں ایک جو سمپل مذہبی ہیں۔ دوسرے جو مذہب کے لبادے میں منافق ہیں۔ اب اگر کوئی کہے کہ مولوی منافق ہیں تو مجھے اس سے اختلاف ہے میرے نزدیک مولوی نہیں وہ بندہ منافق ہے جو کہ مولوی کے لبادے میں ہے۔ لیکن چونکہ مذہب سے بیزاری کئی وجوہات کی بنأ پر ہم میں آ جاتی ہے لہذا ہم مولوی کو منافق کہتے ہیں نہ کہ بندے کو، منافق بندہ ہوتا ہے عہدہ نہیں۔

اگر کسی کو لگتا ہو کہ میں حق اور باطل کے کردار تخلیق کر کے ان کی جنگ چھڑوا کر حق کی فتح دیکھاتا ہوں تو یہ سراسر غلط ہے۔ مجھے اسلام کی طرف داری کرنے کی کوئی ضرورت نہیں اگر یہ سچا ہے تو اس کو جھٹلانے والا ایک دن حقیقت جان لے گا اور اگر یہ جھوٹا ہے تو ہمیں اس کی ضرورت نہیں۔

اب میں ان پاکستانیوں سے کیوں نالاں ہوں؟ پہلی وجہ پاکستان پر شرمندگی یا اعتراضات۔ مانا یہاں سختی ہے تو آپ اپنا تعلق کھلے عام بیان کرنے سے گھبراتے ہیں بلکہ قتل ہونے تک کا خدشہ ہوتا ہے لیکن بات تب میرے گلے سے نہیں اترتی جب آپ پاکستان کی برائی کھلے عام کرتے ہیں۔ ایسے ہی صاحب کو میں نے Petersburg کی چند جگہوں کی سیر کروائی تھی اور پوچھا تھا کہ ہے ذرا سا بھی فرق اس میں اور اس گندگی میں جسکی آپ باتیں کرتے ہیں تو وہ آئیں بائیں شائیں کرنے لگ گئے تھے۔

یہ وہ مقام ہے جہاں میری برداشت ختم ہو جاتی ہے۔ میں نے لکھا کہ مذہبی معیارات ایک طرف رکھیں تو یہ لوگ انسانیت کے لحاظ سے بہترین ہیں۔ اخلاقی پہلو سے یہاں یہ ڈنڈی مار جاتے ہیں۔ میں کسی شخص میں پہلے اس چیز کی تلاش کرتا ہوں کہ اخلاقی پہلو سے یہ کس معیار کا ہے۔ مذہی حوالے سے تک بندی میں بعد میں کرتا ہوں۔ اگر آپ غیر مذہبی ہیں تو میرا آپکا گزارہ ہر حال میں ممکن ہے لیکن اخلاقی پہلو سے کسی کوتاہی کے باعث میرا آپکا نباہ مشکل ہے۔

مجھے لوگوں کے مذہبی ہونے یا نہ ہونے پر اعتراض نہیں بلکہ اعتراض ان کے دہرے معیارات پر ہے۔ پاکستان کی کسی چیز کو آپ معاف کرنے کے روادار نہیں تو پھر امریکہ کی بات پر بھی ویسے ہی تنقید کریں یا ویسے ہی ناپسندیدگی ظاہر کریں۔

اگر بالکل منصفانہ انداز میں دیکھا جائے تو ہم سب غیر مذہبی ہیں لیکن دو بڑے طبقات میں منقسم ہیں ایک وہ جو کھلم کھلا اپنے آپ کو غیر مذہبی کہتا ہے دوسرے مجھ جیسے منافق جو کھلے عام اعتراف کرنے سے گھبراتے ہیں۔ اسی لئے میں غیر مذہبی ہونے کے دعویٰ دار سے زیادہ توقع رکھتا ہو کہ اگر ان میں اتنی جراٰت ہے تو وہ باقی معاملات میں بھی دہرے معیارات سے پرہیز کرے گے لیکن افسوس ابھی تک سوائے ایک کے مجھے کوئی ایسا دوسرا نہیں ملا۔

Popularity: 12%