o_O بدتمیز

لوگوں کو میری عادتیں بڑی سخت ناپسند ہیں۔ اوپر سے میری فرمائشیں۔ لوگ تنگ آ جاتے ہیں۔ اکثر کو تو عاجز کر کر مار ڈالا اور وہ گاتے پائے گئے مار ڈالا مار ڈالا۔ لوگ ختم ہو سکتے ہیں میری الٹی سیدھی فرمائشیں شائد ہی ختم ہوں۔

میری حرکات سے نالاں لوگ میرا نام سنتے ہی لاحول پڑھتے ہیں۔ اکثر بزرگ میرا نام سنتے ہی اپنے بچوں کو اپنے پروں میں “داب” کر کسی محفوظ مقام کی جانب کوچ کر جاتے ہیں۔ ایسے بزرگوں کو فرشتے عرصے سے ایک دو منزلیں اوپر کی منزلیں دکھا رہے ہیں لیکن یہ ہیں کہ وہ کوچ کرتے نہیں۔

قدیر احمد رانا کا میرے بارے میں خیال ہے کہ اس سے بات کرنا دیوار سے سر ٹکرانے کا متبادل ہے۔ میرے نزدیک قدیر سے بات کرنا کسی بھی چیز کے مترادف نہیں کیونکہ یہ اپنی RAM کے ہاتھوں کم کم ہی لفٹ کرواتے ہیں۔ قدیر کے سیدھے سادھے سوالوں کا الٹا جواب دینا میرا فرض عین بن چکا ہے جس کے نتیجے میں رانا صاحب اکثر “عزت افزائی” کرتے رہتے ہیں۔ چونکہ قدیر کو میری باتیں بالکل سمجھ نہیں آتی لہذا ہم نے سوچا ایک پوسٹ “قدیر کی یاد میں”۔ اس پر قدیر غصہ ہو سکتے ہیں لیکن اگر RAM نے اجازت دی تو۔

میرے خاندان کے بزرگوں کا خیال ہے کہ جوانی اور طاقت کی وجہ سے ہم الٹی سیدھی حرکات کرتے ہیں۔ ہمارا ان کی سوچ کے بارے میں کچھ ایسا ہی مشکوک قسم کا خیال ہے۔ بزرگوں کی جانب سے لعن طعن کا ہم قطعاُ برا نہیں مناتے کیونکہ ہم رک کر کھری کھری سننے کے قائل نہیں۔ لہذا بزرگ نشر ہوتے رہتے ہیں اور ہم ادھر ادھر۔

ہماری قابلیت کے سارے عالم میں چرچے ہیں۔ لیکن چراغ “تھلے” اندھیرا ہوتا ہے لہذا ہماری قابلیت ہمارے خاندان والوں کی نظروں سے اوجھل ہے جسکو ہم عام طور پر ان کی جلن سے تعبیر کرتے ہیں۔ ویسے آپس کی بات ہیں ہمیں خود اپنی قابلیت کا اندازہ نہیں تھا وہ تو یار لوگوں نے ایسے ایسے گن گنوائے جو کہ ہماری سات نسلوں میں مل کر شائد نہ نکلیں۔

ویسے میرے انتہائی قریبی دوستوں کے نزدیک ہم سے بڑا احمق اور گدھا کوئی نہیں۔ اس کو ہم ان کی بے تکلفی گردانتے ہیں اور مجال ہے ذرا بھی خفا ہوں آخر کو “گدھے کو گدھے سے راہ ہوتی ہے”

ہماری بدتمیزی کو تمیزی میں بدلنے کی ساری تدابیر رائگاں گئیں اس میں میرا کوئی قصور نہیں لوگوں کو گرائمر نہیں آتی تھی بدتمیزی کو تمیز میں بدلنا چاہئے تھا اب الٹی کوشیشیں کرتے رہے تو اس میں میرا کیا قصور۔

اتنے دیر سے بھی آپ بے پر کی پڑھ رہے ہیں حیرت ہے آپ کے سٹیمنا پر۔ میری حرکتیں اور باتیں تو کوئی دو منٹ نہیں سہہ سکتا۔ chat پر جب میرا دماغ خراب ہو تو جواب 2 گھنٹے بعد نازل ہوتا ہے۔میرے خیال سے چونکہ آج ٹھنڈ زیادہ ہے اس لئے میرے دماغ پر اثر ہوا ہوا ہے اور میں ادھر ادھر کی بکواس کر رہا ہوں چونکہ یہ کسی کام کی نہیں تو آپ بھی پریشان مت ہوں کل دوپہر سر کو دھوپ لگے گی تو ٹھیک ہو جاؤ گا۔ تب تک کے لئے اپنے حق میں دعا کیجئے۔

Popularity: 13% [?]