o_O بدتمیز

میرا گھر ایک سیدھا سادھا مذہبی گھرانہ تھا جہاں ہر شخص کو اخلاق اور آداب کے ساتھ رہتے ہوئے ہر جائز کام کرنے کی اجازت تھی۔ میرے ابو اچھے عہدوں پر فائز رہے تھے لہذا روپے پیسے کی کمی نہ تھی۔ ایسے میں مزید پڑھنے کی دھن سر پر سوار ہوئی تو امریکہ آن وارد ہوا۔ میرا مقصد سوائے پڑھائی کے کچھ نہیں تھا۔ اسلام اور مسلمانوں سے کچھ خاص قسم کے گورے بہت نفرت کرتے ہیں تو شروع میں تو اچھا نہ لگا مگر بعد میں عادت ہو گئی کہ میں اسلام کے فرائض سے دور ہو گیا۔ جیسے نماز اور روزہ اور دل کو یہ کہہ کر تسلی دی کہ اللہ نے حقوق اللہ معاف کر دینے ہیں مگر حقوق العباد نہیں۔

پڑھائی میں اچھا تھا جلد ہی PhD کر کے ایک کمپنی میں اعلیٰ عہدے پر میرا تقرر ہو گیا۔ یہاں ریسرچ کے بہترین مواقع دستیاب ہوئے میری صلاحیتوں کو سب نے جانا تو ہر جگہ سے آفر ہونے لگی۔ پیسہ ہن بن کر برسا۔ شادی پاکستان میں جا کر کی خوش قسمتی سے بہترین بیوی ملی۔ مگر کچھ باتوں پر میرا اس سے جھگڑا ہو جاتا تھا۔ جیسے پہلے بچے کی پیدائش اور بعد میں اس کی پرورش پر جھگڑا ہوا مجھے بچے پالنے کا پتہ نہ تھا اور اس کو اپنی جاب پر بھی جانا ہوتا تھا اور یہ جاب بھی تو اس نے میرے ہی کہنے پر کی تھی۔ پورا ایک سال بے حد بد مزگی رہی۔ میرا بیٹا ایک سال کا ہوا تو بدمزگی کچھ کم ہوئی۔

دوسرے بیٹے اور پھر بیٹی کی پیدائش تک ہم دونوں کو گزارہ کرنا آ گیا تھا۔ ایک کام پر جاتا تو دوسرا گھر رہتا پہلا واپس آتا تب دوسرا کام پر جاتا۔ جب کبھی ایسا نہ ہو سکتا تو بچے ڈے کئیر میں چھوڑ آتے اور شام کو لے لیتے۔ آج جن بچوں کے ساتھ ہم نے ایسا کیا تھا ان کے پاس ہمارے لئے وقت نہیں۔ وجہ پڑھائی اور دوسری مصروفیات۔ میری بیوی نے بہت کہا کہ بچوں کے نام ایسے مت رکھو لیکن میں نہ مانا اور ان کے نام ایسے رکھے جیسے بالکل امریکیوں کے ہوتے ہیں۔ آج بچے اگر امریکی ہیں تو اس میں میرا ہی قصور ہے۔ بیوی نے بہت کہا بچے بڑے ہو رہے ہیں پاکستان چلیں مگر میں نے منع کر دیا کہاں کیا ہے وہاں سوائے لوٹ مار اور گند کے۔

بچوں کو نماز روزہ کچھ نہیں سکھایا نہ بتایا۔ بچے جوان ہو چکے ہیں مگر ابھی تک ان کو نہیں پتہ ایک دفعہ ایک مہمان گھر پر آیا اور اس نے کہا کہ بچے بسم اللہ پڑھ کر کھاؤ تینوں نے کہا کہ شروع کروا دیں ہم باقی پڑھ دیں گے مہمان نے حیرانگی سے میری طرف دیکھا تو مجھے اتنے عرصے میں خیال آیا کہ بچوں کو ہر طرح کی معلومات زبانی یاد ہیں مگر نہیں یاد تو کلمہ، بسم اللہ اور تعوذ۔ نماز تو بہت دور کی بات ہے میرے بچوں نے تو قراآن تک نہیں پڑھا۔ اف میرے خدایا یہ میں نے کیا کر دیا تھا۔ قراآن نماز نہ پڑھیں آنی تو چاہئے مگر میرے بچوں کو تو وہ بھی نہیں آتی اس میں قصور کس کا ہے؟

اسلام کے احکامات پر میں کھلم کھلا کہنے لگ گیا تھا کہ ان میں سے کچھ آؤٹ ڈیٹد ہیں جیسے سزائیں اور عورتوں کا پردہ اور عورتوں کی آدھی گواہی جیسی باتوں کو میں تبدیل کرنے کی بات کرتا تھا اب امریکی معاشرے کا اصل چہرہ دیکھا ہے تو جانا ہے کہ اسلام جیسا بھی تھا صیح تھا اور میں غلط۔

پاکستان کو ہر کام میں برا کہنا عادت بن گئی تھی۔ کبھی سوچا ہی نہیں تھا کہ کبھی پاکستان اس بری طرح یاد آئے گا۔ آج گھر میں اکیلا پڑا ہوں یا باہر نکل جاتا ہوں اور کچھ نہیں تو کاروبار میں پیسہ لگا دیتا ہوں پھر بھی ایک خلش سی ہے۔ بیٹی تیراکی کے مقابلے میں حصہ لیتی ہے پہلے برا نہیں لگتا تھا اب لگتا ہے۔ بیٹے لڑکیوں کے ساتھ باہر جاتے پڑھتے ہیں پہلے کبھی خیال نہیں آیا اب آتا ہے۔ میں بھول گیا تھا کہ حقوق اللہ معاف تھے مگر نئی نسل کی صیح تربیت نہ کرنا معاف نہیں تھا۔

میں نے اس شخص کی طرف غور سے دیکھا تھا یہ مجھے دو دن پہلے مال پر ملا تھا۔ اس وقت میں چائینیز کے ساتھ انصاف کر کے فارغ ہوا ہی تھا کہ وہ میرے پاس آ گیا اور اس نے مجھ سے پوچھا تھا تم ہندوستانی ہو؟ میں عموماُ زیادہ منہ نہیں کھولتا میرا کزن اس وقت ویڈیو گیمز کی دکان پر play station 3 اور Nintendo wii دیکھنے میں مصروف تھا مگر چونکہ میں اس وقت اچھے موڈ میں تھا فٹ کہہ دیا نہیں پاکستان سے۔ اس نے کہا کیا میں یہاں بیٹھ سکتا ہوں؟ میں نے کہا شوق سے کچھ دیر باتیں ہوتی رہیں وہ زیادہ تر انکوائری ہی کرتا رہا جو مجھے پسند نہیں مجھے نہیں معلوم اس نے مجھے یہ سب کیوں بتایا شائد اس کا کسی مانوس چہرے سے بات کرنے کو دل کر رہا تھا یا پھر میرے برے منہ کو دیکھ کر اس نے اپنا تعارف کرایا۔

اس شخص کی عمر میرے اندازے سے کسی طرح بھی 60 سال سے کم نہیں تھی۔ لیکن active ایسا تھا جیسے جوان ہو۔ اچھے کپڑے پہنے تھے براؤن رنگ کا اوور کوٹ پہن رکھا تھا ہر لحاظ سے مکمل تھا مگر اگر نہیں مکمل تھا تو دل کی طرف سے۔ امریکہ آ کر میں نے دو قسم کے مسلمان دیکھے ہیں ایک جو ہر حال میں مسلمان ہیں اور دوسرے جو سمجھتے ہیں کہ وقت کی ضرورت کے ساتھ ساتھ ہر چیز میں تبدیلی آنی چاہئیے۔ حرام اور حلال کے چکر سے بے نیاز، مجھے مشورہ دیتے ہیں کہ کھاؤ بھائی کچھ نہیں ہوتا۔ یہاں اب حلال نہیں تو کیا کریں۔ میں ہمیشہ کہتا ہوں اچھا تو پھر مچھلی لے لو کیوں چکن لیتے ہو؟ اس کا جواب نہیں ہوتا ان کے پاس۔

میں اس شخص کو تسلی نہیں دے سکتا تھا کیونکہ اس کی آنکھوں میں آنسو نہیں تھے میں اس کو پاکستان جانے کا مشورہ بھی نہیں دے سکتا تھا کیونکہ بوڑھے ہو کر امریکہ آپ کی ضرورت بن جاتا ہے۔ اتنے میں اس کی بیٹی کا فون آ گیا کہ اس نے شاپنگ مکمل کر لی ہے صدر دروازے پر آ جائیں اور وہ صدر دروازے کی طرف چل پڑا اور میں اپنے کزن کے پاس چلا گیا۔