o_O بدتمیز

کچھ لوگ اپنے فیصلے خود کرتے ہیں کچھ کے دوسرے کرتے ہیں اور کچھ صلاحیت رکھتے ہوئے بھی اپنے فیصلے دوسروں سے کرواتے ہیں۔ ہماری حکومت بھی اپنے فیصلے دوسروں سے کروانے کے لئے بے چین رہتی ہے اور اکثر دوسرے ممالک کے آگے گڑگڑاتی رہتی ہے۔ اسی طرح کچھ لوگ اپنے مفاد کو عزیز رکھتے ہیں کچھ دوسروں کے۔ اس پر بھی ہماری حکومت پوری اترتی ہے۔ مگر ہماری ہی حکومت کو اتنا برا کیوں کہا جاتا ہے؟ کیا ہماری حکومت ہی صاحب بہادر کے آگے پیچھے پھرتی ہے؟

اگر آپ کہیں سے امریکہ تشریف لے جا رہے ہوں تو آپ کی فلائیٹ کو راستے میں ہیتھرو ائیر پورٹ پر اتار کر تلاشی لی جاتی ہے۔ یہ تلاشی ویسی نہیں ہوتی جیسی اخباروں میں سیاستدانوں کے حوالے سے خبر چھپتی ہے۔ کہ کپڑے اتروا لئے یا کتوں سے خاطر تواضع کروائی۔ اس میں آپ کو سارے ہیتھرو کی اندر ہی اندر سے سیر کروائی جاتی ہے۔ اتنی دیر میں جہاز کی تلاشی ہر ممکن طریقے سے لی جاتی ہے پھیر جب آپ مفت کی سیر کر چکتے ہیں تو آپکو بورڈنگ پاس دیکھانے پر دوبارہ جہاز میں داخلہ مل جاتا ہے۔ حیران کن طور پر نیویارک کے ائیر پورٹ پر تلاشی کا کوئی چکر نہیں ہوا تھا۔ سب لوگ سیدھے جا کر کاغذات کی جانچ پڑتال کروانے لگ گئے تھے۔

لیکن اگر آپ امریکہ سے باہر جا رہے ہیں تو آپ کی میزبان کمپنی کا جہاز سیدھا اپنے ملک سدھارتا ہے جب تک کنیکٹنگ فلائیٹ نہ ہو یہ لندن کی طرف منہ تک نہیں کرتا۔ یا اگر آپ برٹش ائیر لائین سے سفر کر رہے ہیں تو چانسز ہیں کہ یہ لندن رکے ورنہ نہیں۔ اگر آپ ایمرٹس ائیر لائین سے سفر کر رہے ہیں تو پھر بس اللہ اللہ کریں جہاز یہاں سے اُڑا تو دبئی ہی جا کر رکے گا۔ دس گھنٹے کے مسلسل سفر میں لوگوں کا کیا حال ہوتا ہے یہ انہی کو پتہ ہے۔

سوال یہ ہے کہ ایسا کیوں ہے؟ پہلے تاج برطانیہ اپنے فیصلے خود کرتی تھی۔ آجکل ان کے فیصلے کوئی اور کرنے لگ گیا ہے۔ ٹونی بلئیر کو برطانیہ میں کھلے عام سگ کا خطاب مل چکا تھا حتی کہ ان کے تو کارٹون تک چھپ چکے ہیں۔ برطانیہ صیح معنوں میں شاہ سے زیادہ شاہ کا وفادار ہے۔ یعنی ایک طرح سے امریکی کالونی ہے۔ فرانس نے اس قسم کی خدمات سے معذوری ظاہر کی تھی جس کے بعد یہ خدمت برطانیہ کے نازک کندھوں پر رکھی گئی۔

برطانیہ کی security measurement کا اندازہ لگانا ہو تو اس بات سے لگائیں کے بی بی سی کی ایک رپورٹر دو دفعہ جعلی پاسپورٹ اور ویزے پر برطانیہ میں داخل ہوئیں۔ جب اس قسم کی سیکیورٹی ہو گی تو پاکستان جیسے ملک پر زور ڈالنا کیا معنی رکھتا ہے؟

 پاکستان سے امریکہ کا سفر آرام دہ ہے۔ سات سات گھنٹوں کی دو اڑانیں ہیں ساتھ میں پاکستان سے دبئی تک کا سفر۔ مگر امریکہ سے واپسی اللہ توبہ۔ اب پتہ چلا اکثر لوگ امریکہ آ کر واپس کیوں نہیں جاتے۔

Popularity: 3% [?]